Bahrau taduan mek hu sa pok pandap Tết di Kapul urang kamei TP.HCM pambuak bruk haong quận Bình Tân daong ka urang ngak di tỉnh, ban karei mai ngak, hu rai diuk kan kandah, sa-ai Bạch Thị Hồng Phượng, palei daok di Đồng Tháp, urang ngak di Công ty TNHH PouYuen Việt Nam biak bui sambai. Yaom lac bahrau ini sa-ai Phượng oh daok dalam harak angan brei padeih bruk, min kayua bruk takik, công ty ngak piah khik bruk nan ye jien mek tame di sa-ai biak biar, oh ginup piah cai pandar kuhri kuhria ka rai diuk di drei:“Dahlak biak bui sambai, hu pok pandap yau hu sa kadha hagait nan pachreih ba drei, mboh bui sambai rilo. Hu pok pandap ini ye oh abih jien piah blei. Thun ini mboh kan kandah jang dom thun dahlau. Kayua xưởng hu takik pandap jang dom xưởng karei yau nan ye urak ini daok padeih harei car, thun ini takik pandap lo, bo jien thưởng jeng oh ka thau yau habar”.

Di Quận 7, “Labik pablei pandap zero đồng” akaok mereip Tết Inegirai 2024 hu peih tabiak oh lac ba bui sambai ka dom urang ngak hu rai diuk kan kandah bo daok daong pabak prein ka dom urang ngak tuk Tết daok mai jaik tal. Amuk Lê Thị Ngọc Hoa, daok di phường Tân Kiểng, Quận 7, bui sambai pan harak blei pandap “zero đồng” brei thau:“Tết bo hu pandap yau ini biak bui sambai. Ndua dhal phol urang daong brei biak rilo. Sang dahlak hu klau adei sa-ai prong thun abih, di phường hu brei harak blei pandap zero đồng. Dom danak dak meyah bo hu rilo ye dom sang kan kandah hu bui sambai taduan raok Tết jum pataom, caong mong hu kadha siam mekre di abih nao tal bhap bani dalam negar”.

Thun ini, TP.HCM kuhria buh tabiak labaih 915 tỷ đồng meng kadung jien karja ban raya piah peih ngak dom bruk saong sangka Tết Inegirai 2024, tagok labaih 34 tỷ đồng (jaik 3,9%) dut haong Tết thun blaoh, kayua patagaok dom menauc njauk sangka bahrau, yau urang prong thun hu rai diuk kan kandah, uranaih biak kandah.

Amuk Huỳnh Lê Như Trang, Phaok Akaok Sở Lao động - Thương binh saong Xã hội TP.HCM brei thau, ban raya oh lac daong brei pandap panda karang kathaot, sang kathaot, sang hu rai diuk kan kandah bo daok peih ngak rilo bruk gah tinh thần ka bhap bani ban raya taduan raok Tết bui sambai. Meng nan, dak harei dak paglaong raidiuk, pasiam bruk diuk rai, chất lượng diuk rai di urang kathaot, bhap bani ban raya:“Dom quận huyện saong dom kapul nyaom daok jak ba piah hu jien ndo, pandap panda daong ka sang kathaot, urang kan kandah piah hu pandap panda kaya mbang, daong ka urang hu mbang Tết bui sambai”.

Thành đoàn TP.HCM jeng nao jak ba jien ndo, peih bruk nao rivang iek, alin brei takik abih 22.000 pok pandap ka urang đoàn, dam dara kan kandah. Langiu si nan, jak ba jien padai daong yaok ribau harak nao radaih oh abih jien ka anek saih, sinh viên, urang ngak nao palei mbang Tết; nao rivang saong alin hadaih yaok ribau pok pandap ka dom Amaik Việt Nam Anh hùng; dom thương bệnh binh; alin brei pandap ka urang ngak lahik bruk ngak atau oh hu jien nao palei mbang Tết… Ong Doãn Trường Giang, Phaok Akaok Kapul Liên hiệp Dam dara, Thành đoàn TP.HCM brei thau: “Dom bruk sangka iek glang tal dom urang kan kandah, dom danak dak sangka oh lac tok mai alin brei pandap bo daok pambuak dom bruk ngak uan raok Tết, daoh tamia saong dom bruk ngak ba bui sambai karei karei dalam dom harei Tết”.

Meng ini tal Tết, TP.HCM hu 56 doanh nghiệp meda padeih ngak atau hu talei pambuak bruk haong urang ngak oh siam kayua daok tavak jien bilan atau oh hu thưởng. Liên đoàn Lao động jeng hu bruk sangka, daong ka urang ngak hu rai diuk kan kandah… ngan haong pok jien abih tih tui kuhria lac jaik 71 tỉ đồng.

Kadha njauk bui sambai lac, TP.HCM hu kadung jien bahrau ka an sinh xã hội. Kadung jien ini piah pambuak bruk haong dom jabat, kapul nyaom, dom tổ chức chính trị - xã hội, urang ngak pahla, kapul nyaom ngak pahla… gam hu mbaok tame padang ngak danak dak cambaih laih piah daong ka urang ngak kan kandah bo dom bruk ngak pahla urak ini oh ka pabak hu abih./.