Daa mikva saong taong abih gauk gam haong urang vak Kim Dung saong urang pambuak bruk Thảo Ngọc, daok di ban raya HCM nao tal labik chreih chrai raok tet di urang ngak:

 Salah mbang nduac radaih tuk langik bahrau kaik sup, saai Mai Danh Khuê – urang dalam kapul radaih kuan di Quận 12, TP.HCM padam app aval jang yaok harei, samar drah nduac mai sang menei raco blaoh nao tal Sang ilamo Lao động quận. Harei ini, saai Khuê bui sambai kayua saai nduac radaih hu jaik 400 rabau đồng. Bruk bui sambai yau hu tagok jeng dua tuk sa-ai hu mbaok mbang tiệc di danak dak “Tết jum pataom” di Liên đoàn Lao động ban raya peih tabiak ka 420 urang ngak kan kandah di dom nghiệp đoàn daok di Quận 12. Dom urang hu mbaok tame jeng hu taduan rilo pandap tết, pandap pandar yaok harei saong gam 500 ribau dong jien mbaok.

  Bruk nduac radaih di saai Khuê oh tani tanat, diuk saai ruak kik lavang lavaih tok daok di sang ngak lisei ia, raong 3 urang anek. Saai Mai Danh Khuê khan lac: “Pandap alin hu ahar kẹo dom janih, maong ini yau pandap piah ngak salao ngũ quả harei tết, blaoh daok hu mbang pak di labik, hu jien ba mai pablei pandap Tet tra. Ini lac sa bruk bui sambai pachreih ba biak praong".

 Gam bui sambai “Tết jum pataom” haong saai Khuê daok hu 46 urang nduac radaih kuan haong saai, dalam nan hu rilo saai kuhria nao tal sang gauk mbang tết kayua oh hu jien nao palei. Saai Đặng Văn Chuyên – akaok nghiệp đoàn radaih kuan Quận 12 brei thau, nghiệp đoàn bahrau padang tagok hu dom bilan min taduan hu rilo bruk sangka meng dom pakat công đoàn. Abih di nyu nan lac, dom urang gaok kan kandah daok hu alin sổ Bảo hiểm xã hội, thẻ Bảo hiểm y tế: “Adei saai biak chreih chrai uan tabuan lo, hu urang nao meng maong 4, gam hu pandap gam hu jien. Adei sa-ai bui sambai lo, urang daok trọ atau urang hu hộ khẩu di pak ini jeng mboh bui sambai". 

Tết daok mai jaik tal, rilo labik hu rilo urang ngak hu peih bruk raok tết aval piah gam hu chreih chrai gam ngak ka dom urang nao palei jeng hu bui sambai haong gauk. Di labik sang trọ 2/17 jalan Thạnh Lộc 16, phường Thạnh Lộc, Quận 12, ong po sang trọ Nguyễn Thành Tâm hu ngak 25 bàn tiệc ka var mbang huak tất niên haong gauk di dom urang daok trọ. Var mbang huak tất niên ini hu pambuak haong Pasak daong dam dara urang ngak TP.HCM.

Saai Lê Thị Triển, urang ngak daok di sang trọ brei thau:  “Adei mboh harei ini jeng sambai, abih di nyu nan lac hu rik hasit prein tame  di drei tame piah var mbang huak ini daok di labik sang trọ lac jeng mboh bui sambai paje. Adei yaom lac daok di labik ini 3 thun paje min ini lac mbang camriep hu mbaok tame mbang tất niên di labik sang trọ”.

 Tui saai Nguyễn Xuân Thụ, Akaok Jabat daong ka raidiuk – Pasak daong dam dara urang ngak TP.HCM, hadei di 2 thun jit ruak, raidiuk di urang ngak jeng gaok kan kandah rilo. Thun ini, Pasak peih dom danak dak “Sambai Tet haong dam dara urang ngak” di dom labik sang trọ, labik daok di urang ngak piah ba bui sambai, alin pandap ka dam dara urang ngak oh hu jien nao palei mbang tết, alin hadiah brei dom harak ve radaih. Saai Nguyễn Xuân Thụ ndem lac: “Ini jeng lac bruk sangka tal raidiuk ka dom urang ngak piah daong tani tanat raidiuk hadei di dom thun gaok kan kandah kayua jit ruak. Ini jeng lac bruk yam takai nao gam piah ka dom dam dara urang ngak tani tanat, yam tapa thun 2023 patui veik bruk ngak, diuk rai kak kajap haong TP.HCM".

 Di rilo labik, danak dak Tết ka urang ngak di dom pakat công đoàn, di dom labik sang trọ jeng daok hu peih ngak biak chreih chrai, bui sambai, daong palahik nao dom glaih glar di bruk ngak yaok harei, pachreih ba dom urang ngak gaok kan kandah. Abih gauk jeng caong hu sa thun bahrau prein yava khang kajap, urang lahik bruk samar duah hu bruk ngak bahrau, urang hu bruk ye bruk ngak hu siam makre, salamat saong patuah jamo./.