Thun ini, sang amuk Huỳnh Thị Út, daok di ấp 6, xã Mỹ Bình, huyện Đức Huệ, tỉnh Long An mbang tết dahlau jang. Taduan baoh sang bahrau praong siam, bruk camereip hu amuk Út ngak, lac pilih ruah labik tual hala dok taneh ia saong rup thaot Wa Hồ.

Amuk Út khan lac, sang amuk yaok pluh thun daok di bhum tapen negar haong Campuchia min ngak tok ginup mbang nan ye oh pasiam hu baoh sang  daning tôn tabung hala. Baoh sang daok dalam bein phun, atah di jalan khik iek tapen negar jaik 3km nan ye nao mai jeng kan. Bilan 12/2023, sang amuk hu brei tabiak daok dalam baoh sang daning kiak khang kajap, jalan anak sang hu tuh bê tông, hu điện truac hadah saong hu ia hacih...lac bruk bui sambai jang hatai caong. Bruk bui sambai hu tagok jang rilo mbang tuk sang 2 urang anek di amuk jeng taduan hu 2 baoh sang daok jaik gauk dalam labik ini. Amuk Út drut drui lac: “Dahlau daih rambah rambup lo. Urak ini urang lin saong rahra pambuak gauk, rahra hu daong brei yau ini, oh hu hagait bui sambai jang. Mikva hu raidiuk yau harei ini, oh hu hagait uan tabuan jang”

Jeng daok di ấp 6 xã Mỹ Bình, huyện Đức Huệ, sang saai Lê Văn Giếng bahrau taduan sang bahrau lac hu chip bruk ngak. Nan lac sa urang ngak pahla alin brei sang saai baoh bàn bi-a klak nan ye saai Giếng peih bruk brei pah mein bi-a saong pablei ia menyum  ka mikva dalam palei hu labik mein, labik taom gaok. Saai Giếng khan lac: “Thun ini hu mbang tết camereip dalam baoh sang tapen negar biak bui sambai, raidiuk biak kan kandah taduan hu sang bahrau biak uan tabuan. Biak thau dhar phor karja palei, bộ đội pak ini hu daong ngak sang saong daong rilo bruk karei ka kol dahlak, biak uan tabuan”

Baoh sang di amuk Út, saai Giếng daok dalam yaok ratuh baoh sang daok jaik taphia jalan tapen negar Tây Nam bahrau hu Bộ tư lệnh TP.HCM, Quân khu 7 saong dom gah chức năng, urang ngak pahla alin hadiah brei. Dom baoh sang ini hu daong ka mikva bhum tapen negar hu raidiuk tani tanat, taduan raok thun bahrau dalam bui sambai chreih chrai.  

Di tỉnh Long An, Quân khu 7 saong dom gah chức năng hu padang ngak, peih pakak, jao brei 13 labik haong 105 baoh sang daok jaik taphia bilai dân quân biên giới; 5 labik haong 25 baoh sang daok jaik đồn trạm biên phòng, piah khik ka dom sang mikva hu tani tanat raidiuk. Cty điện lực Long An brei ngak danak dak ngak bahrau jalan talei trung, hạ áp saong bilai biến áp, pabak điện tui jalan tapen negar. Meng di akaok Quý 1/2024, ia hacih jeng hu ba tal yaok baoh sang bahrau di jalan tapen negar.

Thượng tá Bùi Ngọc Thiệp, Chính trị viên Đồn Biên phòng Mỹ Thạnh Tây, huyện Đức Huệ, Long An brei thau: Dom baoh sang bahrau, oh lac bruk bui sambai di bhap bini, bo daok hu gam dom gah daok ngak bruk di mangaok jalan tapen negar. Dom labik daok bahrau yau nan, lac gah tangin pambuak atah di bộ đội drei dalam khik caga quyền ngak po bhum tapen negar: “Piah daong ka mikva hu bak bui sambai, dom đồn biên phòng jeng hu peih danak dak “Xuân biên phòng ấm lòng biên giới”. Ini jeng lac bruk ngak pamaong tal iek glang tết ka dom sang daok rah tui jalan tapen negar, abih di nyu lac dom sang daok jaik taphia chốt dân quân, trạm biên phòng rah tui jalan tapen negar.”

Karja dom labik tapen negar daok pambak tame dom prein khang daong brei piah padang ngak jalan palei pala pambuak pagam tame jalan khik iek tapen negar, ba mbuan lagaih di abih ka mikva nao mai, pablei salih saong pajeng ba kaya nong. Dom sang angaok jalan tapen negar daok hu daong brei mesriay jien di gilang pariak piah ngak mbang pablei salih, ngak dom bruk ngak nong…

Bruk sangka, iek glang di Bộ tư Lệnh Quân khu 7, Bộ Chỉ huy Biên phòng tỉnh Long An saong dom kapul nyaom di palei hu daong ka rilo sang uan raok tết camereip dalam dom baoh sang bahrau siam mekre, bak hatai anit ranam./.