Nao tame palei di ban sit Giá Rai, tỉnh Bạc Liêu dalam dom harei ini, mboh di anak meta dom mblang hamu pala padai hijao mekre, rilo labik padai sraoh samu gauk. Ong Đoàn Thanh Tùng daok di xã Phong Thạnh A chreih chrai khan lac, meng tuk ngak tui jalan “padai- hadang” di mangaok 3ha taneh, jien mek tame di sang ong tagok biak rilo. Daok bilan padai ini hu yuak di tuk jaik Tết. Thun ini, padai pala njauk, bo daok pablei hu yaom glaong jang thun blaoh, nan ye mikva chreih chrai lo: “Nyu kein laba jang dahlau biak rilo bo drei daok pala hu phun padai, drei ngak pasiam taneh, drei raong hadang jeng hu siam, hu laba. Meyah kaoh abih jien buh tame ngak ye sa công laba hu 5 triệu. Daok sa bilan hadang tra ye yaok thun dahlak laba hu meng 300 tal 400 triệu tagok. Thun halei jeng ngak, hu laba lô ”

Ban sit Giá Rai hu labaih 30 rabau ha taneh ngak mbang daok dalam 2 bhum ia mbak saong ia taba. Bhum ia mbak jaik 23 rabau ha dahlau daih bhian raong hadang. Min bruk raong hadang dak harei dak takik hu laba. Nan ye meng thun 2020, Giá Rai ba tabiak bruk urang nong ngak padai pambuak haong raong hadang, nan lac ngak sa vụ padai, sa vụ hadang pablak gauk, hu labik daok pablak tame raong hadang ginraong hijao, raong ikan kèo dalam tukvak ngak padai.

Ong Huỳnh Thanh Toàn – Akaok jabat Kinh tế ban sit Giá Rai brei thau, meng mbaok taneh praong jaik 3.000 ha di dom thun camereip, tal thun blaoh mbaok taneh ngak padai, raong hadang di ban sit Giá Rai tagaok jang labaih 2 mbang saong thun ini tagok labaih 7.000ha. “Raong sa janih hadang ye dom thun camereip hu laba, min lavik lavik nao taneh raong hadang oh daok siam, nan ye tabiak bruk jak ba urang nong ngak sa vụ padai angaok taneh raong hadang. Bruk nan ba mai kein laba lac pasiam hu taneh, nan ye raong hadang hu siam, kuhria rah tapa, sa hecta padai  hadang  yau nan, urang ngak nong mek jien tame hu labaih 100 triệu, hadei di kaoh abih phun jien buh tame ngak”

Piah paglaong jang kein laba meng bruk ngak padai pambuak haong raong hadang, tukvak jaik ini, tỉnh Bạc Liêu hu buh jien tame ngak pasaim dom ribaong, ar pacang piah ba ia tame tabiak, pacang ia mbak, khik ia taba. Ong Nguyễn Anh Thư daok di xã Phong Thạnh A khan lac, ngak padai haong raong hadang hu laba, urak ini hu ar pacang ye bruk ngak ini hu laba jang.“Urak ini ngak ar pacang blaoh ngak  cống kreik veik drei mek ia taba tame khik piah hu jang. Dom thun dahlau nyu srau kadau lô, labik oh drak padai ye urang ba ia tapa nyu njom tame tuk drei njuk ia tame. Daok urak ini ba ia tame tabiak yau ini, lac biak siam"

Ong Phạm Văn Hết - Bí thư Đảng ủy xã Phong Thạnh A brei thau lac, dahlau daih dalam xã hu labaih 400 sang kathaot saong jaik kathaot, urak ini daok 47 baoh sang kathaot min, jien mek tame kuhria tui akaok menuac hu jaik 70 triệu đồng sa thun. Xã daok kham merat dalam thun ini, jien mek tame kuhria tui akaok menuac hu meng 74 triệu đồng tagok:“Mada lac mikva biak chreih chrai, padai  hadang pambuak gauk ba mai kein laba biak glaong, kinh tế di rahra cakrok biak cambaih laih dalam 2 thun tapa. Mikva oh daok nao atah ngak mbang,  meng hu bruk ngak ini nyu pabak hu hatai caong di bhap bini dalam xã. Raidiuk di bhap bini dalam xã tagok jang, bruk jum pataom di bhap bini haong karja, Đảng bộ xã ini jeng hu kajap jang.”

Tỉnh Bạc Liêu ba tabiak jalan ngak lac tal thun 2025, peih praong mbaok taneh tagok labaih 43.000 ha. Bruk njauk biai di bruk ngak padai  raong hadang lac oh pandar jru pasiam ruak ka hadang, bo ngak tui jalan sinh học; phun padai jeng oh pandar dom janih jru khik caga phun pala. Kayua yau nan ye, meng bruk ngak ini, Bạc Liêu jeng daok pamaong tal bruk padai pahe, hadang hacih, padai haong hadang hữu cơ./.