Sang bac padang ngak danao caluai ia biak hu kein laba

Tui dom gah chức năng tỉnh Tiền Giang, thun halei di pak ini jeng hu bruk mblung ia di uranaih. Meng thun 2013 tal 2021, dalam tỉnh hu jaik 100 anek saih njauk mblung ia. Kuhria meng thun 2021 tal urak ini, di dalam tỉnh hu 13 bruk uranaih njauk mblung ia. Piah pacang caga mblung ia, gah Ilamo - Thể thao saong Du lịch hu pambuak haong gah Pato magru tỉnh Tiền Giang hu pambak praong bruk thau caluai ia ka anek saih gam haong bruk buh jien tame padang ngak danao caluai di dom sang bac, ngak habar ka taong abih dom anek saih jeng thau caluai ia, thau pacang, plaih bruk mblung ia hu siam lagaih di abih.

Tui yaok pataom di So Pato magru tỉnh Tiền Giang, dalam tinh urak ini hu labaih 38 danao caluai ia di dom sang bac; dalam nan hu 16 danao caluai ia mini dalam dom sang bac tiểu học. Daok pakat Trung học phổ thông hu 14 danao caluai ia praong saong daok peih ngak hu tani tanat, dalam nan hu 12 danao caluai ia ka oh hu jien padai tani tanat, nan ye hu kanja pabak brei 138 triệu đồng sa thun piah biyar jien ka urang khik iek danao caluai ia saong blei jru ngak hacih ia. Tapa yaok pataom tal urak ini, hu 95% anek saih tal 10 hu pato saong caluai biak gheih. Ong Đào Văn Hoàng, lac ame di anek saih daok di xã Bình Đức, huyện Châu Thành khan lac:“ Sang oh hu danao caluai ia nan ye sang bac padang ngak danao caluai ia biak hu kein laba, hu makna biak praong. Anek dahlak caluai ia biak naih kayua sang bac hu danao caluai ia, anek dahlak bac thể dục gah môn caluai ia biak naih joi, urak ini nao palei biak salamat oh huak hagait  “

Piah pacang caga bala mblung ia, dahlau di abih, Pasak Pato – pasram saong pakacah thể dục thể thao tỉnh Tiền Giang saong Thành Đoàn Mỹ Tho pambuak gauk peih pato pasram ka urang đoàn dam dara di 17 phường, xã thau bruk daong dom urang njauk mblung ia. Pato pasram ka dom huấn luyện viên di dom danao caluai ia di sang bac, dalam bruk pato caluai saong pacang caga mblung ia ka anek saih dalam ban Mỹ Tho, pachrieh tui danak dak “abih rahra pasram caluai saong pacang caga mblung ia”.

Dom thun tapa, Pasak Ilamo -Thể thao ban Mỹ Tho hu pambuak haong dom kapul halain hatain urang negar Úc di Danak dak Salamat pacang caga blung ia di kraong Mekong hu pato caluai saong pasram ilamo ka yaok ribau anek saih tiểu học dalam tỉnh saong dom uranaih jaoh jo di ban Mỹ Tho. Anak saih hu mbaok tame danak dak ini hu bac dom ilamo caluai, abih di nyu nan lac ilamo piah eng drei daong khik ka rup drei tuk blait takai laik trun kraong. Dom huấn luyện viên urang negar Úc daok hu pato tacei ilamo sơ cấp cứu ka amek ame tuk anek di drei oh patuah njauk mblung ia. Urak ini, Pasak hu 2 danao caluai ia di phường 4 saong xã Tân Mỹ Chánh, ban phố Mỹ Tho. Yaok harei, 2 danao caluai ia ini hu labaih 1.000 mbang urang mai tal caluai ia; dalam nan rilo meng lac dam dara, uranaih. Daok 2 harei lac harei jip saong harei suk, Pasak pato caluai ia oh mek jien ka dom adei jaoh jo dalam ban sit. Dalam thun ini, di tỉnh Tiền Giang hu rilo danao caluai ia praong hu buh jien tame ngak meng kadung jien kanja ngan haong yaom jien  labaih 10 tỷ đồng.

Ong Trần Phát Tài, Yam ndoc Pasak Pato – pasram saong pakacah thể dục thể thao tỉnh Tiền Giang brei thau, yaom lac bahrau ba tame ngak min 2 danao caluai ia di pak ini yaok harei dui pachreih hu yaok piluh mbang urang mai caluai; daok harei sanecar, harei adit hu jaik 100 mbang urang. Anak tal, Pasak brei patagok dom bruk pato caluai ia, njuk ia ka uranaih:“ Hu ginup pandap panda bloh, anak tal, khol dahlak roh duah jalan buh jien tame veik bộ môn njuk ia. Khol dahlak brei duah thau, bac megru piah cak rok veik bộ môn ini. Abih di nyu nan lac dom bilan hè ini khol dahlak meda nao tal dom sang bac piah ndem baai nao mai haong Ban giám hiệu saong dom gru pato thể dục,piah peih dom tal bac caluai, pacang caga mblung ia di uranaih. Caong lac, kol dahlak meda peih hu rilo tal pato yau nan piah gam haong dom labik danao caluai ia karei pacang caga hu mblung ia di uranaih”.

Piah pacang caga mblung ia di uranaih, dom sở, mban, dom gah, dom kapul nyaom padang ngak jalan pambuak gauk dalam bruk pacang caga mblung ia di uranaih, abih di nyu nan lac gah Pato magru, gah Lao động - Thương binh saong Xã hội -Kapul dam dara Cộng sản Hồ Chí Minh saong Kapul chữ thập đỏ ngak pasak dalam bruk pacang caga mblung ia, daong khik salamat ka uranaih. Daok bruk pambak praong ilamo caluai ia ka anek saih. Ong Lê Quang Trí, Yam ndoc So pato magru tỉnh Tiền Giang daok brei thau lac: “Jalan ngak anak tal, taeng pakat THPT drei meda maong iek veik saong patui bruk pok panuac likau buh jien tame ngak danao caluai ia ka dom sang bac. Dom sang bac hu buh jien tame ngak danao caluai ia bloh, meda pambuak haong dom sang bac THCS, Tiểu học di dalam bhum piah pato pasram ka dom anek saih. Urak ini, abih tih dom huyện, ban di drei jeng hu buh jien tame padang ngak danao caluai ia blaoh paje”.

Meng abih hatai ka bruk ngak saong dom jalan ngak siam lagaih di dom gah, dom pakat, jia lac bruk mblung ia ngan haong uranaih di tỉnh Tiền Giang meda hu trun biak rilo; ba mai salamat piah ka dom adei sahanang hatai main sambai, bac taa./.

Urang lang: Thu Thao – 06/06