Urang vak Nhật Trường hu kadha vak ndom ka bruk pala janih phun ini. 

Lac bhum taneh bilau bak glai tràm, phun năng meluk gauk, urak ini bhum Đồng Tháp Mười dalam huyện Tân Phước, tỉnh Tiền Giang hu jeng mblang hamu prong haong rilo janih phun pala brei kein laba glaong yau: manaih, bei li-u, padai, thanh long, kruac aik, kruac bhung, panat, durian...Dalam nan, phun manaih jeng daok lac phun pala rilo di abih, nyu kak kajap haong bhap bani bhum taneh ini meng di tuk daok kan kandah.

Sa-ai Bùi Hữu Thiện, urang nong daok di xã Phú Mỹ, huyện Tân Phước hu jaik 15 thun tame padang mbang angui di labik ini. Meng 3 ha tuk akaok mereip, tal urak ini, sang sa-ai ngak po 20 ha manaih. Yaok thun sa-ai paik hu labaih 500 tấn baoh. Sa-ai Thiện brei thau, manaih lac phun pala biak laghaih  haong bhum taneh njaom lakhun, mbuan pala, mbuan mong iek saong hu jien  tame tani tanat.

 “Duk haong dom phun pala karei, dahlak mboh phun manaih khang kajap jang, yaom pablei tani tanat. Phun manaih biak mbuan pala, labik pablei grap tanat, saong pablei nao hu rilo labik, nan ye dahlak khang hatai pala phun manaih”.

Akaok mereip tuk bahrau ba rahra tame ini peih taneh, tok hu dom ribau ha, urak ini dalam huyện Tân Phước hu labaih 17.000 ha phun manaih, dang dhi 1, dhi 2 duk haong dom labik karei dalam negar. Duk haong dom janih phun pala karei ye phun manaih biak laghaih haong raneh riya labik ini, abih di nyu lac bhum taneh daok njaom lakhun mesam saong tuk vak tapa oh njauk khat lahik kayua pandiak bhang. 

Hu bruk tacei pato ilamu pala saong mong iek, pambuak haong palih ruah pajaih baoh rilo, praong, siam di dom gah chuyên môn tỉnh, huyện nan ye sản lượng saong kein laba di phun manaih di labik ini dak harei dak tagok.

Yaok thun, huyện Tân Phước pabak brei ka darak pasar labaih 260.000 tấn baoh manaih. Jaik di ini, bruk pablei baoh manaih hu mbuan laghaih jang dahlau, tuk jalan mbak nao mai di bhum Đồng Tháp Mười hu sangka buh jien tame ngak, bruk pajeng ba, pablei salih manaih hu mbuan laghaih jang. Langiu di bruk pablei baoh manaih that, rilo doanh nghiệp, cơ sở daok hu ngak jeng keo, mức manaih, aia manaih biak hu yaom. Ong Huỳnh Văn Bườn, Akaok jabat Ngak nong saong patagok palei pala huyện Tân Phước brei thau: “Phun manaih lac phun pala rilo di huyện saong lac bhum nguyên liệu di tỉnh. Phun manaih tukvak tapa biak hu kein laba, yaom meng 8-10 ribau đồng/kg, sa ha paik hu jaik 20 tấn brei jien mek tame meng 160-200 triệu đồng/ha. Mblang taneh di huyện khik kajap labaih 15 ribau ha, oh trun, taong abih mblang taneh daok dalam ar pacang abih”.

Mai tal Tân Phước harei ini, mboh mblang hamu manaih biak praong, atah. Meng bruk pala sa janih phun manaih, rilo urang nong hu jeng kaya meda saong lac po trang trại hu rilo ha taneh pala manaih. Ong Trần Hoàng Phong, Akaok UBND huyện Tân Phước ndom lac, phun manaih lac phun pala rilo di abih saong khang kajap, hu kak kajap haong bhap bani meng di tuk peih taneh bilau: “Hadei di 30 thun peih taneh pala drak Đồng Tháp Mười ngan haong Tân Phước hu 2 janih phun pala praong lac phun manaih saong padai aia. Urak ini, khaol dahlak hu bhum pala sa janih phun manaih, tal urak ini phun manaih meblah sản lượng prong. Phun manaih thun ini yaom biak glaong mikva hu laba biak rilo, yaom manaih pablei tabiak meng 6000 đồng/kg tal 10.500 đồng/kg. Mikva tok caong khin yaom manaih labaih 5000 đồng min thun ini hu yaom, mikva biak bui sambai”.

Tapa jaik 30 thun peih taneh pala drak, pasiam bhum Đồng Tháp Mười di tỉnh Tiền Giang, tapa rilo tukvak trun tagok min phun manaih labik ini jeng daok that hijao, bak baoh. Phun manaih hu kak kajap haong bhap bini saong brei baoh yamen la-an pabak pren ngak, hatai tari tareng di bhap bani dalam tuk daok padang mbang agui di bhum taneh kan kandah, ngak jeng sa bhum palei dak harei dak salih bahrau, kaya meda, peih ngak siam jalan tacei pato di aruah Thủ tướng Võ Văn Kiệt dahlau daih. /.