taneh riya di urang nong njauk lihik abih 

Sang muk Phan Thị Yên, daok di palei Song Thạnh, xã Tân Bình Thạnh, diukrai pambak tame 2 công taneh bein thanh long. Dahlau deih, kayua oh hu jien, muk  mesraiy 70 triệu đồng di ong Trần Văn Thôi (dok ieu lac Út Lức) – urang brei mesraiy di  xã Tân Bình Thạnh ngan song yaom laba  6%/sa bilan. Kayua oh hu jien bayar, nan ye 02 công taneh bein tame tangin po sre. Urak ni, muk Yên song anek likei njauk nao ngak mbang pah , duah jien diuk tapa harei, biak gleih glar.

Jeng di palei Song Thạnh, xã Tân Bình Thạnh, ong Phạm Văn Lùn njauk jao boh sang sa trệt, 1 lầu ka ong Út Lức, kayua tavak sre jien ma- in hụi song jien sre. Urak ni, lahik sang, ong Lùn njauk nao tapa tỉnh Long An piah duah bruk ngak mbang duah jien.

Di  xã Tân Bình Thạnh, huyện Chợ Gạo, tỉnh Tiền Giang tuk vak tapa, hu biak rilo urang nong, kayua pala thanh long oh hu laba, khin hu pok jien drah samar nan ye nao nyim sre, yaom laba glong meng urang ni. Oh hu jien bayar laba song jien sre, nan ye lahik sang, lahik taneh.  Amuk  Phạm Thị Bé Nhỏ, pala 1,3 ha phun thanh long di xã Tân Bình Thạnh njauk khat lahik, nao mesraiy 200 triệu đồng di ong Út Lức song yaom laba  6%/ sa bilan. Biak metuah, muk mesraiy di gilang pariak ngak nong  patagok palei pala- hu 700 triệu đồng , bayar veik ka po sre, jeng khik hu mblang bein:

Hulin njauk jit Covid-19, pala thanh long khat, nao mesraiy di Út Lức pabak tame nan. Hulin mesraiy Út Lức sa triệu ye yaok harei đóng 2.000 đồng. Laba glong lo, hulin huac lo, hadei di nan, hulin ngak harak mesraiy gilang pariak.  Mesraiy di gah langiu mbuan lo, drei mbaoh tangin tame lac mek hu jien, mesraiy jien karja kan lo, nan ye drei  nyim gah langiu”.

Tuk mesraiy jien langiu  xã hội, yaom lac laba glong, min, harak gar biak mbuan, urang mesraiy tok mbaoh tangin tame harak biên nhận lac hu jien. Min, urang mesraiy brei bayar jien laba, jien phun njauk harei, meyah oh ngak njauk yau nan, po sre nyu mai preo puac, khin taong, ngak srau kadau puk paga.  Ong N, daok di xã Tân Bình Thạnh khan lac, bruk brei mesraiy laba glong, gam haong ma- in hụi di pak ni rah tabiak rilo, ba tal kan kandah kan si thau hu, abih di nyu nan lac ngan song dom boh sang kan kathaot, takik thau…, mbuan laik tame dak di kol ngak bruk ni.  Kayua yau nan ye, karja song dom gah  chức năng puk palei brei hu jalan ngak khang , jhul kandun likuh bruk ni . Ong N. ndom lac:

“ Brei mesraiy laba glong, mboh bruk nan jeng hu rilo, drei ngak sa bilan duah hu oh hadom, thanh long njauk jit ruak lap lo, đóng jien laba dok oh hu jien, ngak habar bayar phun truh, bo gar jien  lo, nan ye bhap bini nao mesraiy. Jien laba mesraiy di karja nyu bier, min brei hu điều kiện ni, deih biak kan kandah. Tui hulin mboh, khin trun bruk ni, karja brei ba tangin tame pacang cakak”.

Ndom menyai song urang vak di rayao sap ndom VN, urang pal akaok Đảng ủy- UBND xã Tân Bình Thạnh, huyện Chợ Gạo, tỉnh Tiền Giang  brei thau lac hu bruk urang nong mesraiy yaom labsa glong di gah langiu xã hội; dalam nan, mikva rilo meng mesraiy di urang angan  Trần Văn Thôi (daok ieu lac Út Lức). Karja, kapul nyaom pak ni meda hu jalan langyah bruk ni. Ong Mai Văn Việt, Bí thư Đảng ủy xã Tân Bình Thạnh lac:

"Urang ni, dahlak hu thau, meng lavik mai ngak bruk brei mesraiy meng yaok pluh tỉ đồng, yaom laba meng  5-7%, biak glong, biak trak. Jalan pacang cakak lac, drei pathau khan, jak ba bhap bini, ngak mbang njauk mesraiy di gilang pariak. Hulin tacei pato dom kapul nyaom, pataom mbaok  urang  hội jak ba, tuk urang hội gaok kan kandah ye tacei tapa gilang pariak brei mesrait. Daok urang brei mesraiy ni, hulin ginum biai hong ủy ban xã song dom gah, kapul nyaom daa tame ndom menyai, brei thau dom kan kandah di bhap bini bloh drei pato pakai, ngak brei huac ”.

Pandik hatai anak bruk brei mesraiy yaom laba trak, hu rilo menuac di xã Tân Bình Thạnh hu ngak đơn tố cáo payua tal dom gah  chức năng, cong tame pasang iek, langyah, pacang cakak bruk nan di ong  Trần Văn Thôi, piah rai duik di bhum palei pala ni hu sron mbon salamad./.

Urang lang: Hanipha- 22/7