Meng thun 2021, Cảng du thuyền Mỹ Tho di takai kraong Tiền, phường 4, ban Mỹ Tho hu peih tabiak, jeng sa labik hu angan di gah Yu lit tỉnh Tiền Giang. Danak dak Cảng du thuyền Mỹ Tho hu ngak haong yaom jien abih tih 665 tỷ đồng, hu labik taneh pambuak labik mblang bein takai kraong, duh ka tuai ravang iek Mỹ Tho – Campuchia.

Urak ini, hu labaih 1.000 tuai atah jaik mai tal Cảng du thuyền Mỹ Tho yaok harei. Mai tal ini, tuai hu mbang dom janih pandap mbang angan je di pak ini, hu blei dom pandap lưu niệm ndung bak kraong ia miền Tây; hu daok dalam langik tasik la-an bingi di kraong Tiền. Amuk Lương Thị Diễm Trang, Yam ndok Cảng Du thuyền Mỹ Tho lac:“Tuk mai tal Cảng du thuyền Mỹ Tho, tuai mboh biak chreih chrai, meng labik ini drei meda nao ravang me-in dom labik. Kol dahlak caong yaih khan tal tuai damuai dom janih pandap mbang, dom ragu ragam daoh bhap bini, dom urang kamei pablei pandap lưu niệm cuk ao bà ba, ao kamei, mbang hủ tiếu Mỹ Tho, dom janih baoh kayau di bhum kraong ia Nam bộ”.

Di labik taneh bein, sang ong Đoàn Văn Khanh – sa urang dahlau daih ngak bol lin di xã Song Thuận, huyện Châu Thành bahrau peih labik Yu lit “Ve chai thần kỳ”. Labik Yu lit ini biak gheih, biak karei, biak siam ka langik tasik, hu dom baoh sang sit hu ngak meng kanduh klaok katak biak gheih mekre. Langiu di bruk mbang dom pandap mbang angan je di palei, mai tal ini, tuai daok hu me-in dom kadha ma-in cuh baoh pacah meng gai paneh, brei mboh veik hatai sahneng hadah krah di urang lin bhum Vành đai Bình Đức katung baoh pacah tame đồn bót kol khamang. Yaom lac bahrau peih tabiak, min labik Yu lit “Ve chai thần kỳ” dui pachreih hu biak rilo tuai atah jaik mai ravang iek, duah thau, abih di nyu lac dom urang dahlau daih ngak bol lin. Ong Đoàn Văn Khanh khan lac: “Urak ini drei ba mikva nao ravang iek phun la-u gam menyum cà phê. Pandap mbang camereip lac lẩu masin ikan raong, patui di nan lac bánh khọt srau la-u dừa sáp, gỏi dừa sáp, baoh bao… Daok menyum ye menyum ia kruac bung, ia hajan, pandap lưu niệm hu 42 janih pandap, dalam nan njauk ndom tal di abih lac menyek bingu kruac bhung ngak brei mbuk tamuh,  kem pasiam kalik ngak brei ranaih veik”.

Di bhum kaoh pulao Tân Phong, huyện Cai Lậy, tỉnh Tiền Giang jaik ini bruk ngak mbang Yu lit hu cakrok gilac veik, abih di nyu lac Yu lit sinh thái pambuak haong dom bein phun mbang baoh hu angan je di palei yau ye baoh sak mao, baoh durian ... Thun blaoh, Cty Du Ngoạn Việt hu padang ngak veik  darak angaok kraong ia di palei Tân Thái, xã Tân Phong, ngak jeng labik biak gheih, mekre, pabak ka bruk Yu lit di tỉnh Tiền Giang. Ong Lê Văn Hà, urang tuai mai meng Hà Nội hadei di tuk ravang iek labik Yu lit kaoh pulao Tân Phong brei thau:"Harei ini dahlak mai tal kaoh pulao Tân Phong, huyện Cai Lậy, Tiền Giang, hu mboh bruk gheih mekre di langik tasik, kayau patau, ilamu, hatung hatian di anek menuac. Abih di nyu lac hu tame iek tapak dom kadha daoh đàn ca tài tử di dom adei sa-ai likei kamei dalam palei. Dahlak bui sambai lô, haniem phul lô saong lac sa bruk kan var hu ngan saong rup dahlak".

Labik raong ula Đồng Tâm di xã Bình Đức, huyện Châu Thành lac sa dalam dom labik dui pachreih rilo tuai di tỉnh Tiền Giang bo oh ka mboh labik halei hu yau nan, langiu di bruk brei ka tuai ravang iek dom janih ula, cim, athur praong, bahrau ini daok hu peih dom kadha ngak iek bruk mek “nọc rắn độc”, brei ula mbang… ngak ka tuai biak takre. Yaok harei, labik ini hu labaih 1.000 tuai mai ravang iek, dalam nan rilo meng lac dam dara, urang daok ranaih umo.

Tui UBND tỉnh Tiền Giang, dalam 6 bilan akaok thun ini, dalam tỉnh hu taduan raok labaih 790 rabau mbang tuai, rilo jang jaik 15% duk haong tukvak ini thun blaoh. Tiền Giang daok jeng sa dalam dom labik hu prein khang piah cakrok Yu lit bhum ĐBSCL, pamaong tal jeng gah ngak kinh tế praong dang akaok./.