Công ty TNHH Meisheng dalam labik ngak kong Ngãi Giao, huyện Châu Đức, Bà Rịa - Vũng Tàu bhian ngak tabiak marai, manjim khan bai pablei tabiak darak pasa Châu Âu, Malaysia saong Trung Quốc. Urak ini, doanh nghiệp daok caong pabak 500 urang ngak piah ngak bruk yaok harei. Ong Phạm Ngọc Hùng, Yam ndok nhân sự Công ty Meisheng brei thau, piah dui pachreih urang ngak, doanh nghiệp ba tabiak rilo bruk daong brei, yau ye urang ngak hu mbang jien bilan samu haong bhum 2 (tui adat lac bhum 3), hu daok di ký túc xá oh mek jien, thưởng tari taring, thưởng hiệu suất bruk ngak… Sarak daong lac yau nan min doanh nghiệp jeng kan duah hu ginup kayua urang ngak daok kurang. Ong Hùng ndem lac: “500 urang ngak ini urak ini jeng ka oh ginup, jeng daok kurang nan ye pilih ruah tal tuk halei ginup meng padeih, kayua ini lac urang ngak suai lavik. Piah dui pachreih  urang ngak, langiu dom chế độ tui adat, doanh nghiệp daok hu dom adat mbang tui jien bilan ngak lavik thun, hu ilamo, thưởng tari taring, thưởng hiệu suất biak rilo paok jien thuong langiu di jien bilan”.

Oh lac doanh nghiệp ngak pandap pablei tabiak negar langiu, dom labik ngak mbang gah du lịch jeng daok caong pilih ruah urang ngak tui bilan piah caga ka bilan du lịch tabung glaong di puac thun. Ong Đoàn Minh Dương, urang khik ramik labik du lịch mbuan ceik pabo sinh thái – Bưng Riềng, huyện Xuyên Mộc brei thau, meng bilan 10 labik ini hu kubhria bruk pilih ruah urang ngak: “Tui kuhria tuk Tết 2023 meda hu yaok rituh tuai sa harei, kayua yau nan ye njauk patagok urang ngak, meda pah veik meng 7 tal 10 urang ngak pabak ka bruk di puac thun, lễ Tết. Kayua sit, nan ye pataom tame khik ramik, eng drei dang tabiak ngak nan ye pilih ruah urang ngak rilo meng lac menuac di pak ini”.

Tui Sở Lao động thương binh saong Xã hội tỉnh Bà Rịa – Vũng Tàu, hadei di tuk jit ruak COVID-19 pasang iek hu, bruk ngak mbang pablei salih di doanh nghiệp hu pasiam veik, bruk caong pilih ruah urang ngak tagok glaong. Kuhria meng akaok thun tal bilan 10 meng blaoh, tỉnh hu labaih 11.600 urang duah hu bruk ngak, dalam nan urang ngak hu tapa bac magru meblah labaih 80%.

Ong Trần Quốc Khánh, Yam ndok Sở Lao động thương binh saong xã hội tỉnh Bà Rịa – Vũng Tàu khan lac, meng ini tal puac thun, doanh nghiệp dalam tỉnh caong pilih ruah pabak labaih 15.000 urang ngak. Dalam nan, dom bruk ngak yau ye: jhik manjim, kalik takhaok, padang ngak saong dịch vụ du lịch meda caong hu biak rilo urang ngak. Urak ini Sở daok kham merat pambuak bruk haong dom labik dalam saong langiu di tỉnh piah duah pabak manuac ngak. Ong Khánh brei thau: Anak tal Sở Lao động meda ngak bruk haong dom jabat chuyên môn, mban khik ramik dom labik ngak kong ngan haong hatai caong lac: tuk dom doanh nghiệp daok buh jien tame, tỉnh njauk pabak manuac ngak dalam tukvak katut, tukvak mbaih saong suai lavik piah ka Sở lao động kakei saong dom Sang bac pato bruk ngak, ba jalan bruk ngak ka dom sinh viên piah lang yah bruk caong hu urang ngak”.

Piah khik ka bruk ngak hu tani tanat, tỉnh Bà Rịa – Vũng Tàu hu ba tabiak  rilo sarak dui pachreih urang ngak langiu di tỉnh mai ngak bruk saong tani tanat raidiuk. Taphia di nan, Sở Lao động thương binh saong xã hội meda hu panuac ka HĐND tỉnh ba tabiak danak dak paglaong ilamo urang ngak piah pabak ka bruk cak rok patagok dom gah kinh tế praong; pachreih doanh nghiệp pandar công nghệ bahrau, pandar urang ngak hu chất lượng glaong piah meng nan trun hu bruk kurang urang ngak saong paglaong chất lượng menuac ngak./.

Urang lang: Thu Thảo