Thun ini, ong Lê Văn Ít, daok di puk palei Tân Trung, xã Long Bình, ban sit Ngã Năm, tỉnh Sóc Trăng patui gac bruk buh jien tame rami ramik caik halam vang vil mblang hamu yuak kaoh padai blaoh piah peih bruk raong ikan bilan ia ndik. Ong raong ikan di mblang taneh praong labaih 3ha. 2 thun dahlau, gam haong bilan ia ndik, ong gam raong ikan gam mek bau, raong ada brei jien mek tame labaih jaik 100 triệu đồng. “Dom harei dalau deih ia tagok ia ndik ye drei palao tabiak mblang hamu, urak ini maong mboh biak bingi jang. Jien mek tame meng bruk ngak padai oh samu do raong ikan biak ia ndiak. Raong ikan vang vil dalam ia hamu mboh phun jien buh tame takik, dom dom piluh trieu haja min. Tapi tal tuk kuac mek drei laba labaih mateh. Dalam danao ravang raong meda daok mek hu bau, rilo bruk piah ba jien mek tame yau ye, raong ada raong ini deih dalam ia,…”

Raong ikan vang vil dalam ia bilan ia ndik ia tagok pak di ban sit tanah lima Ngã Năm rahtabiak biak rilo. Tui urang nong di ini, ieu lac sa bruk ngak buh phun jien tame takik, mbuan si ngak, min tapi mek laba glaong. Mikva njauk ngak halam pacang vil mblang hamu piah khik ikan dalam mblang hamu. Ndap mbang di ikan hu sagait hareik harem di dalam ia mblang hamu. Ong Huỳnh Văn Dần, daok di puk 3, phường 1, ban sit Ngã Năm lac sa dalam dom baoh sang raong ikan bilan ia ndik jaik 4ha dalam mblang padai di sang brei thau lac, ngan haong mblang taneh ini, ong caong lac hu jien mek tame labaih 100 triệu đồng bilan ia tagok thun ini: “Ngak mbang bilan ia ndik meng 2 tal 3 thun blaoh paje, mboh biak lagaih jang ngak hamu padai, kayua lac raong ikan bilan ia tagok oh bih ralo prein yawa masa iek glang min tapi ikan praong biak siam. Dom thun dahlau raong hu brei laba mbaik, thun ini peih praong jang, ikan biak hu, ikan biak praong, ikan mè bingu trak meng 3-4kg sa drei dut saong dom thun dahlau, jien mek tame meng 60-80 triệu đồng.”

Bruk kaya mada ralo ikan ia taba daong ka mikva pak ini cak rok patagok paralo bruk ngak masin, ngak rik, pak halam, saong dom bruk ngak karei karei. Pagap yau ye di labik ngak masin rataong di saai Trần Văn Loan daok di puk palei Tân Trung, Phường 2, ban sit Ngã Năm. Tui saai Loan, tukvak masa tabung glaong di nyu meng bilan 8 tal bilan 11 yaok thun, labik ngak mbang di saai njauk ieu lac tame bilan ngak masin ikan ia taba biak ralo labaih 100 tấn masin, rilo di nan mboh ikan kuak sặc saong ikan kuak piah pabak tabiak darak pasar. Yaok thun ngak saai laba hu labaih 200 trieu dong: “Ngak masin meng bilan 7 tal bilan 10 saka ia bulan drei ngak hu labaih 3-4 bilan, mayah hu ia meng hu ikan, drei yuak kuak padai blaoh, brei ka tanah mblang hamu padeih padai ye meng hu ikan. Drei pamanek bruk ngak ka mikva meng 15 tal 20 urang, daong ka mikva drei hu jien tame.”

Yaok thun, tui kuhria ban sit Ngã Năm raong mek hu meng 12.000-14.000 tấn ikan, ba jien mek tame biak rilo ka mikva di ini. Ngan haong mbang ngui, yau ye bruk raong ikan vang dalam mblang hamu bilan ia ndik, ikan hamu padai, bruk raong ikan dalam danao vang vin sir… brei laba meng 40-50 triệu đồng/ha. Ong Trần Văn Liêm, Phaok akaok UB bhap bini ban sit Ngã Năm brei thau lac, di ini daok pachreih urang nong peih ngak hu siam lagaih bruk ini: “Jak ba rahra dalam bruk khik ramik, peih ngak hu siam kaya ikan di mblang hamu ngak habar ka nyu lagaih, njauk caik hatai lac urang mek iakan meng tut điện, urak ini bruk tut điện ph lagaih brei ka cak rok patagok oh siam lagaih brei ka ikan khang praong paralo. Kayua yau nan ye, dalam tukvak masa mai tal, ban sit Nga Nam njauk pato tacei jalan hu adat cambat caga khik ramik ikan ia dalam hamu, njauk ieik caga bruk pandar điện taong mek kaya ikan.”

Urak ini, Pakat karja di ban sit Ngã Năm daok pato tacei, brei kein lagaih ka dom labik, ngak mbang blai salih padang ngak angan je ndap nda bingi meng ikan ia taba yau ye rik, masin saong dom ndap nda karei karei piah paglaong phun dhan dom ndap nda meng kaya ikan ia taba ini./.