Daok TP.HCM, Tổng Bí thư lac menuac ba jalan, tacei pato padang ngak saong salih bahrau mbaok mata Mintri Chính trị, hu mbaoh tangin tapak tame Sarak ka 31 harei 30/12/2022 ka jalan ngak, bruk ngak cak rok patagok Ban raya Hồ Chí Minh tal thun 2030, pamaong tal thun 2050. Nan jeng lac jalan peih tabiak praong ka Quốc hội patabiak Sarak ka 98/2023 ka bruk ngak iek sarak karei piah cak rok patagok TP.HCM bo Ban raya daok kham marat peih ngak. Nyaom urang vak di rayo sap ndom VN daok di TP. Hồ Chí Minh hu kadha vak: Taong Bi thu Nguyễn Phú Trọng saong mbang rivang puac abih hu makna sajarah haong TPHCM. 

Mbang rivang puac abih di Taong Bi thư Nguyễn Phú Trọng rahtabiak di harei 23/9, njauk tuk pahadar 77 thun Harei Nam bo khang chien (23/9/1945 - 23/9/2022). Dalam hatai hadar di rahra daok jaik Hội trường ban raya tuk dah page harei 23/9 atah di ini dua thun meda oh var hu bruk mbuan mbiah tuk Tổng Bí thư tabiak mbaok. Oh hu sap danei radaih cei ba jalan, oh hu kapul radaih dui atah, tok hu sa sruh radaih mô tô cảnh sát ba jalan gam haong 3 sruh radaih ô tô nduac dhal dhal di mangaok jalan.

Di mbang ngak bruk, ong biak caik hatai maong iek asal kadha, pang panuac ndem di yaok urang pathau khan, cih vak, saong hadei di tuk pang dom pathau khan di Thành ủy, mintri, mban, gah Trung ương, Tổng Bí thư taong yaom lac: “dalam tuk kan kandah, mala bruk pan akaok, tacei jalan khang saong samar drah di Trung ương Đảng saong Kanja, gam haong taneh ia, Ndang bo, kanja saong rahra Ban raya Hồ Chí Minh  kham marat, mek hu rilo jak jeng hu yaom glaong”.

Bruk njauk menyai nan lac,  meng sap ndem bingi pang, ndem dhal dhal, bak drut drui meng hatuang hatian, Tổng Bí thư sa mbang tra klah rabha haong rahra TP.HCM saong mikva gah Maraong negar ka dom pandik harao, dom khat lahik biak praong ka manuac saong jien padai ka oh bhian gaok kayua jit praong Covid-19 tamuh tabiak.

Taong Bi thư hu tacei tabiak dom cuang kandah, tavak tavaiy di Ban raya yau patagok kinh te ka oh samu haong labik dang, bruk ngak saong prein khang di Ban raya. Bruk ba akaok nao dahlau, prein khang cak rok, patagok bruk pambuak bhum di Ban raya haong bhum Đông Nam Bộ, bhum taneran kraong Cửu Long saong dalam taneh ia mboh trun dalam dom thun jaik di ini…

Piah ka TPHCM hu rik tame praong haong abih labik dalam taneh ia, Tổng Bí thư Nguyễn Phú Trọng ndem lac:

"Dahlak caong dom urang dalam Mban Chấp hành Đảng bộ Ban raya haong abih hệ thống chính trị njauk patui veik roh duah, thau cambaih makna, dom ilamo saong samar drah hu dom sarak, jalan ngak pasiam hu kein lagaih. Dom bruk hagait tapa tham quyen ye pathau khan Trung ương, Quốc hội, Rajaei pasang iek, daong palagaih piah taoh talaih; dalam nan hu jalan ngak, sarak biak karei, patagok jang dut saong Sarak ka 54 di Quốc hội mbang XIV".

Mbang rivang ka 15 - lac mbang rivang puac abih tal Ban raya angan Wa praong uranam di Tổng Bí thư Nguyễn Phú Trọng hu bao chi saong urang pan akaok Ban raya pilih ruah lac sa dalam 10 bruk praong dalam thun 2022 di TPHCM.

Langyah ka mbang rivang saong ngak bruk puac abih di Tổng Bí thư Nguyễn Phú Trọng pak TP.HCM jaik dua thun dahlau, TS Bùi Ngọc Hiền, Akaok Jabat Khik ramik ilamo, khau tin, asal kadha, Học viện Cán bộ TP.HCM ndom lac, nan mbang rivang sajarah. Meng dom tacei pato di taong bi thu ka khik kajap bruk biak karei di drei, bo dom Sarak bahrau hu tabiak rai saong hu dom jak jeng praong yau harei ini:

 "Bruk praong Wa hu pato tacei nan lac brei khik kajap bruk siam jang urang, bahrau jang urang di Sarak bahrau salih ka Sarak 54. Saong bruk nan kol drei hu mboh biak cambaih dalam Sarak ka 98 haong 44 jalan ngak di 7 gah. Meda ndem lac, meng dom panuac pato tacei di Wa bo kol drei hu dua sarak ini".

Dalam luac tukvak ngak bruk, abih di nyu nan lac labaih 13 thun dang akaok Ndang, Tổng Bí thư Nguyễn Phú Trọng hu buh abih prein ka bruk dak padang, cak rok patagok di taneh ia./.