Nyaom Cội Xưa

Dom sap capi, panuac daoh yamen la-an di kapol đờn ca tài tử daok biak ranaih umo nan lac nyaom Cội Xưa kayua Thạc sĩ Phạm Thái Bình - Urang di Kapul daoh tamia bhap bini Việt Nam padang tabiak. Tui sa-ai Bình, piah khik ramik saong patagok đờn ca tài tử, bruk camereip njauk ngak lac duah saong pato dom urang ranaih patui veik. Meng 10 thun dahlau, sa-ai hu caik hatai sangka tal bruk nan.  

Ban raya HCM lac bhum taneh pataom urang daok ranaih meng dom tỉnh bhum Đông Nam bộ saong Tây Nam bộ bac megru, diuk rai, dalam nan hu rilo urang praong tagok meng dom baoh sang hu ilamu đờn ca tài tử. Di Ban raya daok hu Sang bac Đại học Sân khấu điện ảnh saong Nhạc viện TPHCM hu pato ragu ragam bangsa, meng nan hu manuac umo ranaih  piah patui veik đờn ca tài tử. Tui thạc sĩ Phạm Thái Bình, brei duah mboh dom adei thau daoh, hu hatai takre, hadei nan pato pasram pabak veik piah padang jeng dom kapol nyaom parang me-in, pabak hatai takre di bhap bini urak ini:“Nyaom Cội Xưa ini, lac dahlak hu pataom manuac meng tuk dom adei daok sit kayua caong khin khik veik inem krung saong hu bruk ngak kahng kadang ye brei hu manuac patui. Di labik ini  drei hu rilo cei gru nai gru naih joi, rilo nghe nhan joi, hu chuyen gia, urang roh duah…daong ralo ka Ban raya dalam bruk pato pasram. Bruk pato pasram ye yaok thun dahlak hu peih dom tal  đờn ca tài tử, hu thun peih tal pato ka uranaih, hu thun peih tal pato ka urang praong…”

Dom urang ilamu daok mboh lac, piah khik ramik saong patagok đờn ca tài tử, daok njauk pato pakai ka dom rairah urang maong iek hu thau piah tui iek tui pang ragu daoh ini. Ban raya meda ba ragu ragam bangsa, dalam nan hu đờn ca tài tử tame yaih khan, pato dalam dom sang bac. Daok tui nghệ sĩ ưu tú - Thạc sĩ Huỳnh Khải, dahlau diah ngak Akok Khoa Nhạc bangsa - Nhạc viện Ban raya HCM lac urang hu mbaok tame padang ngak rilo kadha đờn ca tài tử ka dom danak dak praong di Ban raya mboh lac, Ban raya njauk peih ngak rilo danak dak parang iek đờn ca tài tử jang, abih di nyu lac pablak tame dalam dom bruk ilamu, rija roya. Yau nan min, tuk peih ngak njauk brei sahaneng ngak birau habar ka nyu jaik haong bhap bini , mbuan pang takre jang ngan haong bhap bini.

Daok asal kadha, langiu dom kadha klak, bhian randap ye brei hu ralo kadha birau ndung bak suan yava raidiuk bahrau, yau ye: pok meyaom bruk salih birau, patagok puk paga, palei negar, pok meyaom dom urang naih gheih birau…Khan ao, bruk parang iek, padang ngak dom kadha jeng njauk brei salih birau, hadah krah  piah lagaih haong labik parang iek ilamu nghe thuat birau.

Rik tame dalam bruk khik ramik, patagok yaom glaong di đờn ca tài tử, dom labik du lich di Ban raya HCM ba janih nghe thuat ini tame parang iek  duh ka tuai damuai. Yau ye di Palei du lịch Bình Quới, di dom harei puac adit meda hu đờn ca tài tử pambuak haong danak dak buffet pandap mbang menyum ngan haong kadha “Khẩn hoang Nam Bộ”.

Ban raya HCM hu biak ralo mbuan lagaih piah khik ramik saong patagok yaom glaong di inem krung đờn ca tài tử. Piah ngak siam bruk nan, brei hu bruk pambuak gauk, tame bruk khang jang di Sở Ilamu – Thể Thao, Sở Du lịch Ban raya saong dom gah karei./.

Urang lang: Ai Nghiem -16/7/2022