Tui ong Nguyễn Văn Lâm, Phaok Yam ndok Sở Lao đông Thương binh saong Xã hội TP.HCM, puac thun dahlau, bruk ngak mbang kan kandah di dom doanh nghiệp nyu ngak ka urang ngak hu hatai saneng karei jang. Thun ini, bruk salih bruk ngak, klak bruk ini tapa ngak bruk karei hadei di  Tết oh daok tra, jaik abih urang ngak caong khin hu bruk ngak tani tanat. Langiu di nan, rilo urang ngak daok veik ban raya tuk Tết, doanh nghiệp hu đơn hàng dahlau di Tết nan ye bruk ngak hu siam laghaih jang. Dom sarak iek glang siam hu daong ka urang ngak kak kajap jang haong doanh nghiệp.

Dom sang mac hu rilo urang ngak di TP.HCM hu peih tabiak ngak bruk di harei 9 bingun yau Công ty Freetrend Industrial (jaik 20.080 urang ngak), Công ty Pou Yuen Việt Nam (labaih 52.000 urang) tui kuhria hu jaik 70% urang ngak nao ngak, daok veik hu tame ngak bruk meng akaok bilan 2.

Di Công ty TNHH Platel Vina, Khu Công nghệ glaong, Ban Thủ Đức, ong Nguyễn Triều Đại, akaok Công đoàn brei thau, doanh nghiệp hu peih ngak bruk dalam harei 28/1, nan lac harei 7 bingun Tết, ngan haong jaik 80% urang ngak tame ngak bruk. Dom urang ngak padeih Tết saong nao ngak njauk harei hu lì xì 200.000 đồng. Ong Đại brei thau: “Yaom lac dalam thun 2022, Công ty gaok kan kandah ka đơn hàng, min urang ngak padeih bruk biak takik. Dom urang ngak gilac veik ngak bruk thei jeng bui sambai chreih chai, halar hatian kak kajap haong doanh nghiệp”.

Ngan haong sa-ai Lê Thị Thúy Kiều, Công Ty TNHH Iwasaki Electric Việt Nam, Khu chế xuất Linh Trung 2, phường Bình Chiểu, ban Thủ Đức, kayua daok veik TP.HCM mbang Tết nan ye sa-ai jeng nao ngak njauk harei. Dalam thun bahrau, sa-ai Kiều caong khin hu pren yava siam piah ngak siam bruk ngak di drei dalam sang mac, caong khin doanh nghiệp hu biak rilo đơn hàng, ba bruk ngak gam gam ka urang ngak: “Bruk ngak lac jalan duah jien piah raong anek, kayua yau nan ye dahlak caong khin nao ngak avan jang. Drei nao ngak ye hu jien bilan, hu jien tari tareng, daok hu công ty lì xì, mong yau pachreih hatai ka urang ngak kham merat, tari tareng, rik daong ka công ty rilo jang, caga ka sa thun ngak bruk biak siam”.

Ndom ka bruk palih ruah urang ngak hadei di Tết, hu 499 doanh nghiệp di TP.HCM caong palih ruah 14.379 urang ngak dalam quý 1/2023, dalam nan gah jik pet – kalik takhaok hu 5.000 urang, điện - điện tử hu 2.200 urang, hóa nhựa hu 800 urang, pablei salih caong khin palih ruah 1.000 urang...

Ong Hoàng Văn Thắng, Phaok akaok Pasak Dịch vụ bruk ngak TP.HCM brei thau, meng  harei 6 bingun Tết, hu 26 doanh nghiệp tut angan palih ruah urang ngak dalam bilan 2, caong hu 3.800 urang ngak. Dalam nan hu 3 doanh nghiệp gah jik pet caong khin palih ruah jaik 2.000 urang ngak. Langiu di nan, hệ thống pablei lẻ di FPT caong palih ruah jaik 1.200 urang ngak.  

Pasak Dịch vụ bruk ngak TP.HCM pambuak bruk haong dom doanh nghiệp, caga băng rôn, tờ rơi, caik bàn tư vấn di labik mblang radaih piah taom gaok hu urang ngak  meng di tuk dom urang ini yam takai tal  TP.HCM saong caong khin duah bruk ngak. Kadha ini meda daong ba tabiak jalan parabha hu hatai caong khin duah bruk ngak meng akaok mereip, gam haong nan patrun hu bruk “cò” urang ngak, daong ka urang ngak oh lahik jien. Ong Hoàng Văn Thắng ndom lac: “Dom thun dahlau hu rah tabiak bruk hu dom doanh nghiệp oh hu chức năng tư vấn meyaih khan bruk ngak, pandar urang ngak tut angan tame, hadei di nan nao taom gaok dom công ty blaoh mek jien. Urang ngak meng mblang radaih meda njauk kol cò mồi ndom lac meyaih khan bruk ngak ini, bruk ngak diah, jien bilan glaong, hadei di nan mek jien meng 300-500 ribau, gaok tuk mai abih jien triệu”.

Piah pambuak doanh nghiệp haong urang ngak, dalam bilan 2 ini, Pasak Dịch vụ bruk ngak TP.HCM meda pambuak bruk peih ngak sàn tư vấn, meyaih khan bruk ngak ka urang lin xuất ngũ meng thun 2018 tal thun 2022 di ban Thủ Đức, saong daok hu tư vấn, pambuak bruk meyaih khan bruk ngak ka jaik 750 công an xuất ngũ dalam ban./.