Saai Nguyễn Thị Tú palei daok di bhum kreih negar tame TP.HCM daok saong ngak bruk hu labaih 15 thun ini mai. Meng jien bilan di urang ngak daok di labik pandap panda yaom chit ini, saai kuri kuhria biak tani tanat ka mbang cai. Nan ye, saai Tú tuk halei jeng pilih ruah blei pandap tani tanat yaom kaom, yau ye brah, ralaow, baoh manuk ada, manyek mbang… sanang hatai ka chất lượng saong yaom bier jang dut saong yaom di darak pasa meng 5-10%, trun hu jien cai pandar ka sang: “Dahlak caong hu rilo labik pablei rilo pandap tani tanat yaom kaom jang. Urak ini, brah, njam patam, ralaow…labik pablei oh hu, caong peih rilo labik, peih praong labik pablei, oh njauk lac pataom tame sa labik siêu thị”.

Danak dak tani tanat yaom kaom darak pasa di TP.HCM hu prein pambak praong. Urak ini, oh njauk lac doanh nghiệp di Ban raya bo doanh nghiệp hu phun jien negar langiu (FDI) jeng hu mbaok tame. Tuk camriep, bahrau hu 2 doanh nghiệp kanja hu mbaok tame danak dak, tal urak ini hu 69 doanh nghiệp hu mbaok tame. Abih tih yaom jien pablei pandap di danak dak thun ini tui kuhria hu jaik 22.400 tỷ đồng.

Dom pandap tani tanat yaom kaom darak pasa meblah meng 25% tal jaik 70% pandap pandar yaok harei hu pablei di ban raya, Ban raya pasang iek hu darak pasa, pacang hu bruk padauk pandap piah tagok yaom, jhul yaom tagok glaong tuk gah pabak pandap gaok sarau kadau. Danak dak oh lac ba mai kein laba ka urang blei pandar bo daok hu gam doanh nghiệp hu mbaok tame danak dak.

 Piah peih ngak hu danak dak ini, TP.HCM hu ba pandap meng dom tỉnh karei mai. Sở Công thương di dom tỉnh daok pabak pandap ndom lac, TP.HCM njauk gam gam peih dom bruk pambuak gauk, ndem biai online di dom gah parabha pandap saong dom doanh nghiệp, labik ngak pandap piah samar lang talaih dom tavak tavaiy, kan kandah dalam bruk pabak pandap.

Ong Nguyễn Hữu Dũng, yam ndok Sở Công thương tỉnh Đồng Tháp ba tabiak bruk lac TP.HCM haong dom tinh, ban padang ngak cơ sở dữ liệu brei thau ka labik pabak, pandap ngak praong, prein ngak di yaok tỉnh, ban saong bruk caong blei pandar di ban raya. Ngak hu yau nan, ban raya haong dom tinh, ban meda pambuak bruk hu khang kajap, hu siam lagaih jang: “Mayah kol drei hu cơ sở dữ liệu, pagap yau urak ini darak pasa pandap halei daok hu takik, yaom tagok samar. Đồng Tháp, An Giang bilan ini hu hagait, TP.HCM  daok kurang hagait. Pandap di tinh, ban halei hu meda thau cambaih, meng nan bruk pambuak gauk saong pacang caga piah tani tanat yaom kaom darak pasa meda samar jang”.

Rilo chuyên gia kinh tế mboh lac, Danak dak ini meda jeng angan je di Ban raya HCM, nan ye lac tal tuk ban raya peih praong bruk ngak, angan dom pandap saong ieu kakei glaong jang ka chất lượng ngan haong Danak dak tani tanat yaom kaom. Tuk nan, urang blei pandap oh daok saneng tal pandap tani tanat yaom kaom lac yaom siam, bo daok lac pandap chất lượng hu jabat chức năng pok brei angan.

Tui Tiến Sĩ Trần Tiến Khai- Sang bac Đại học Kinh tế TP.HCM, Danak dak brei hu bruk pambuak bhum tui adat hukum piah pasang iek catang jang gah hacih saat pandap panda. Kayua urak ini, bruk pasang iek hacih sa-at pandap, adat salamat sinh học di dom tinh ban ka oh yau gauk.

Ong Bùi Tá Hoàng Vũ, Yam ndok Sở Công thương TP.HCM brei thau lac, tal urak ini, bruk pambuak gauk di dom gah ka oh khang kajap, njauk ngak pasiam veik: “Danak dak jeng brei hu rami ramik veik pambuak tal bruk caga dahlau pandap panda, gam khik salamat, gam khik tani tanat bruk pambuak bhum dalam tuk ngak saong pablei pandap. Danak dak taong yaom angan je piah ngak siam jang dom bruk hu jak jeng bloh dalam tukvak urak ini”.

20 thun ini mai, Danak dak tani tanat yaom kaom darak pasa di TP.HCM hu ngak siam bruk tani tanat yaom kaom darak pasa, pambak khang tabiak saong rilo urang blei pandar hu kein laba. Gam haong nan, danak dak jeng hu rik daong padang angan ka doanh nghiệp hu mbaok tame. Piah paglaong chất lượng, jak jeng di danak dak dalam tukvak bahrau, biak caong hu jalan pambuak bhum khang kajap jang di dom tinh, ban dalam bhum haong TP.HCM saong dom adat hukum samu gauk dalam talei pambuak bruk ini./.

Urang lang: Thu Thao – 01/11