Saai Lê Thị Kim daok di quận Tân Phú hu 2 anek daok bac phổ thông nan ye jeng huac lac pandap pandar ka anek saih tagok yaom tuk jaik tame thun bac bahrau. Min tapa duah thau di rilo labik pablei salih ye saai mboh yaom kaom tani tanat. Di dom labik pablei online saong offline jeng hu yaom meng 220.000- 380.000 đồng sa bộ khan aw anek saih; 180.000- 500.000 đồng sa kadung teik, ba lô ka anek saih: “Pandap pandar ka anek saih thun ini hu rilo saong hu rilo labik pablei ka amaik ame pilih ruah. Dahlak blei khan aw ka anek di sang bac saong meda blei di dom cửa hàng, yaom mbiah, tanyiak siam. Daok ba lô, kadung teik jeng hu rilo janih, yaom oh tagok, daok hu danak dak khuyến mãi.”

Rilo cửa hàng, siêu thị pablei pandap pandar ka anek saih daok hu ba tabiak rilo danak dak khuyến mãi. Pagap yau di SaiGon Co.op hu 800 siêu thị, siêu thị praong, cửa hàng tiện lợi jeng hu peih danak dak “pandap ba tui tal sang bac”. Tui nan hu labaih 1.000 pandap panda pabak ka bruk bac taa hu trun yaom meng 10% - 40%. Abih tih dom pandap panda ini jeng daok dalam danak dak tani tanat yaom kaom di TP.HCM ngan haong rilo angan Việt yau ye: takhaok Bitis,  kadung teik Mr.Vui, jhik khan aw Bình Phước, pandap panda bac taa Thiên Long… Dom pandap panda tani tanat yaom kaom darak pasa di SaiGon Co.op meda pabak hu meng 35% - 50% bruk pandar di anek saih, sinh vien Ban raya.

Amuk Hồ Hồng Đào, Phó Yam ndok Maketing SaiGon Co.op daok brei thau lac: “Thun ini, SaiGon Co.op hu rilo khan aw đồng phục praong sit, ginup ka yaok umo thun anek saih piah ka urang blei mbuan pilih ruah jang. Yaom kaom ye khol dahlak jeng khik kajap tani tanat darak pasa, SaiGon Co.op tuk halei jeng pambuak haong dom gah pabak lac doanh nghiệp Việt Nam piah hu pandap siam di abih, ngak habar piah hu ưu đãi siam di abih ka urang blei”.

Yaom lac yau nan, darak pasa pandap panda ka anek saih di TP.HCM mboh lac menuac blei biak takik. Saai Ngọc Mai, urang pablei pandap di sa cửa hàng khan aw ka anek saih di Quận 1 brei thau: “Prein blei thun ini jeng takik jang, nan ye oh khin jhik rilo huac kadaong labaih, yaok thun tal tukvak ini, dahlak pablei biak rilo, blaoh tal tuk anek saih nao bac meng joa oh hu urang blei. Min thun ini, urak ini lac tukvak tabung glaong bo dahlak pablei hu takik, thun ini prein blei oh khang. Dahlak bahrau pablei hu jaik di ini min, ye dom thun dahlau pablei meng bilan 4, bilan 5 tal bilan 7 lac tukvak tabung glaong, min thun ini prein blei biak takik.”

Langiu di dom labik pablei pandap meng kan ye dom labik pablei salih online jeng hu pabak rilo pandap panda meng khan aw đồng phục, ba lô, kadung teik saong rilo pandap panda bac taa ka anek saih ngan haong yaom kaom tani tanat saong rilo danak dak khuyến mãi. Dom labik pablei jeng khik tani tanat yaom kaom, gaok mai trun hasit piah caong lac dom harei anak tal prein blei meda tagok jang./.