Yaom lac daok di kreih kraong Cổ Chiên bak ia yau tasik saong atah di ban Trà Vinh oh ka tal pluh mbaik jalan, min Cồn Chim dalam xã Hòa Minh, huyện Châu Thành lac sa bhum palei sron mbon, labik diukrai siam mekre di rilo menuac, abih di nyu lac tuai daok di ban praong caong mai veik haong raidiuk palei pala dahlau daih. Meng kein lagaih di drei, dom sang daok pak ini jak gauk ngak du lịch. Hu sang ngak homestay, sang ngak bánh xèo, ngak ahar, sang ngak lisei, pablei ia la-u, peih dom kadha me-in meng kan di bhap bini, sang pablei pandap palei…Abih di nyu nan lac, tuk mai tal ini, tuai daok hu eng drei cap mek hadang, arieng, ikan, chai tapung, ngak ahar… Sa-ai Lê Thị Bích Liên, urang tuai mai meng TP. HCM brei thau hatai sahneng di drei tuk mbang camereip hu mai tal labik du lịch Cồn Chim: “Tuk mai tal Cồn Chim drei mboh biak tatuak drei. Kayua lac maong meng atah ye mboh rahra urang tuak nduan, pan payong tabiak taduan raok drei. Drei mboh urang biak rap ar saong tuk nao tame dalam, drei hu vah arieng, vah hadang. Vah blaoh drei cap mek drei arieng blaoh kak nyu veik, bui sambai lo. Drei hu nao rilo labik, min drei oh ka mboh hu bruk nan”.

Dahlau daih, tuai mai Cồn Chim tok hu daok dalam harei, oh daok tapa melam hu, kayua kurang labik daok. Min meng thun 2019, Cồn Chim hu Danak dak Patagok Doanh nghiệp sit haong mbiah saong tỉnh daong brei labaih 2 tỷ đồng, meng nan rilo bilik ndih, ging ngak mbang huak hu padang ngak, lagaih ka tuai daok veik rilo harei. Di palei du lịch ini, yaok sang ngak sa janih pandap nan ye oh thei meriak gauk. Amuk Nguyễn Thị Bích Vân, sa urang dalam kapul pambuak gauk ngak du lịch Cồn Chim brei thau:  “Pak ini hu padang Kapul pambuak gauk piah khik iek bruk ngak saong taduan tour meng gah langiu tame. Drei tacei gauk dalam mbang nyaom dom bruk halei ngak oh ka siam. Di labik ini dahlak jeng hu ngak sa “biểu mẫu” piah thau hatai sahneng di tuai mai ini, njauk hatai hu hadom…Meng nan drei paglaong hu bruk ngak saong ngak siam jang ka labik ravang me-in di drei”.

Piah ngak tabiak dom pandap du lịch karei jang dom tỉnh, ban di bhum taneran kraong Cửu Long, daong ka urang nong mek jien tame hu rilo jang, tỉnh Trà Vinh daok brei patagok rilo bruk du lịch "tui hatai langik tasik" pambuak haong danak dak bruk ngak negar padang ngak palei pala bahrau. Tỉnh hu tabiak sarak daong cakrok du lịch, daong sang buh jien padang ngak homestay saong padang veik bruk ngak meng kan duh ka bruk ravang me-in....

Ong Dương Hoàng Sum, Yam ndok Sở Ilamu tỉnh Trà Vinh brei thau, tal urak ini hu 7 dalam 9 huyện, ban padang ngak hu blaoh danak dak cakrok du lịch di drei. Urak ini tỉnh daok jhul khang pato, pasram, paglaong ilamu ngak bruk ka dom urang jakar khik ramik saong dom urang ngak dalam gah du lịch, pabak hu bruk ba tabiak.

 “Meng danak dak SME haong Sarak di  HĐND tỉnh, kol dahlak hu daong dom labik peih praong homestay di bhap bini. Ka dua lac kol dahlak yaih khan thaot binguk saong dom pandap du lịch di tỉnh pak di TP.HCM, TP. Cần Thơ saong dom tỉnh Đông Nam bộ. Caong lac tal thun 2025, gah du lịch cakrok hu yau bruk ba tabiak di tỉnh, piah tal thun 2030, ba gah du lịch di Trà Vinh jeng gah ngak kinh tế praong di tỉnh”.

Meng dom jalan ngak samu gauk, 5 thun mai ini, dom tuai mai tal Trà Vinh thun hadei jeng rilo jang thun dahlau, dom labik mai tal dak harei dak dui pachreih jang. Ini lac jalan peih tabiak ka tinh dak padang saong cakrok pandap du lịch lac tal thun 2025, du lịch jeng gah ngak kinh tế praong saong tal thun 2030, du lịch jeng gah ngak kinh tế dang akaok di tỉnh./.