Dalam langik lahơi bingi, mblang hamu 132 di xã Cư Êlang, huyện Ea Kar pahe padai daok tathak. Diuk pasang ong Y Teng Ksor, puk Ea Knốp, xã Cư Ni chreih chrai tabiak rivang mblang hamu saong samar langyah piah khik kajap năng suất padai. Ong khan lac, mblang hamu praong jaik 4.000 m2 ini hu Kanja pabak brei ka sang ong meng thun 2004 piah pala drak. Meng nan 5 urang dalam sang oh daok huac eik lipa tuk cang bilan yuak, bo daok labaih hu jaik pulih triệu đồng jien pablei padai yaok thun. Ong Y Teng chreih chrai brei thau: “Sang dahlak hu 5 urang saong hu pabak brei jaik 4 sào hamu. Langiu di nan, daok hu Kanja daong jien peih taneh bilau saong daok hu brei yaok sào 6 kg pajaih padai T25. Yaok thun, yaok sào yuak hu labaih 6 tạ padai, kuhria abih tih dalam thun hu labaih 2 tấn. Hu mblang hamu blaoh urak ini oh daok huac eik lapa tuk cang bilan yuak padai yau dom thun dahlau deih.”

Ong Nhữ Đình Tuyến – Akaok UBND xã Cư Ni huyện Ea Kar brei thau, dalam xã hu 544 baoh sang urang bangsa takik pak di labik daok di 3 puk. Tapa pasang iek hu 201 sang gaok kan kandah kurang taneh ngak mbang, pala dral saong daok dalam angan hu pabak brei taneh. Abih tih taneh hu pabak brei lac 68 ha, yaok sang hu meng 3.500 – 4.500 m2 taneh padai 2 vụ. Ong Tuyến taong yaom, padai ngak di pak ini tuk halei jeng brei năng suất tani tanat, yaok ha bhian mek hu meng 5 – 6 tấn/1vụ. Xã daok kuhria padang dom kapul pambuak gauk, tacei jalan ka mikva pala drak saong cak rok patagok mblang padai hu siam lagaih jang dalam dom bilan ngak padai hadei.“Paglaong kein laba dalam bruk ngak di mblang hamu Cư Êlang ka mikva, karja palei daok hu pathau khan jak ba mikva padang hợp tác xã padang talei pambuak gauk. Gam haong bruk ngak padai mbang, meda brei salih meneing mblang taneh tapa ngak padai pajaih pablei piah ka mikva hu jien mek tame glaong jang.”

Tui ong Nguyễn Đăng Kai, phó Akaok Jabat Bangsa huyện Ea Kar, tuk camriep danak dak oh hu lagaih yau hatai caong kayua kurang ia pruh, kurang jalan mbak nao mai dalam mblang hamu, taneh bahrau peih oh lagaih ka phun padai tamuh siam. Piah langyah dom cuang kandah nan, UBND tỉnh Đắk Lắk saong huyện Ea Kar hu buh jien tame jaik 17 tỷ đồng piah padang ngak jalan kraong ribaong pambuak haong binek thủy lợi Ea Rớt; la-ua ka mbaok hamu tapak samu, tuh bê tông rilo jalan dalam mblang hamu, daong pajaih pala drak 2 vụ… Meng nan, mblang hamu padai ia bahrau Cư Êlang patagok hu dom siam lagaih tuk mek hu năng suất glaong saong tuk halei jeng tani tanat. Ong Nguyễn Đăng Kai brei thau, mblang hamu 132 di Cư ÊLang oh lac mblang hamu padai siam, bo daok hu padang ngak jeng blang hamu gheih mata, lagaih ka bruk pala drak: “Jabat Bangsa hu daong bruk ka UBND huyện Ea Kar pathau khan, jak ba mikva pala phun hijao di taong abih dom jalan dalam mblang hamu ngak halui piah ka mikva padeih padai dalam tuk yuak kuak, sangka iek glang padai. Dua tra lac, padang ngak dom baoh sang di langiu mblang hamu piah ka mikva pataom kaya nong dalam tuk hajan ia dauk, pandiak hangin dui atah tuk ka oh pajeng ba mai sang hu.” 

Meng bruk daong abih drei di gah chức năng, bruk kham marat pala drak di mikva bangsa, bhum taneh thu lagu dahlau deih urak ini hu jeng pasak padai daong plaih eik lipa tuk cang bilan yuak, daong ka mikva yam tagok tabiak truh  kan kathaot. Tapa nan brei mboh Sarak 132 di Rajaei lac jalan ngak njauk, daong ka yaok rituh baoh sang mikva bangsa pak huyện Ea Kar, tỉnh Đắk Lắk hu raidiuk trei sil, bhum palei Tây guyên dak harei dak kaya mada, khang kajap./.