Raya tet Ula Naih 2025 meng blaoh hu ralo bui sambai brei ka diuk pasang amuk Hồ Thị Xô (di xa Minh Hòa, huyen Dầu Tiếng, tinh Binh Duong). Di umur taha tatuak hu brei hadiah lin sa baoh sang bahrau gheih ghang mboh biak chreih dalam hatai. Baoh sang hu 100 trieu đồng hu Mban jak ba pataom di Kadung jien "Brei ka urang kathaot" tinh ieu Kongti Xo so kien thiet Binh Duong daong padang.

Muk Xô brei thau, raidiuk daok kan daman, harei harei amuk ngak ahar tapei bilik nao pablei. Jien mek tame takik yau nan ye bruk padang sang bahrau oh khin sahneng tal. Urak ini hu sang bahrau padang gheih ghang mboh biak chreih bui sambai hatai. Muk daok hu jien kaya hadiah di mikva, karja palei. 

“Meng dahlau sang di drei taik tahak tuk hajan angin ye draoh bruk. Hu karja palei daong, hu urang rik brei hu sang, sang hulin dahalak ndua dhar phol”. 

Hu raok raya Tet Ula Naih di dalam sang bahrau, ong Dương Hoàng Trinh (umur 65 thun daok di ban palei Hòa Lạc, ban sit Phước Hải, huyen Long Đất, tinh Ba Ria – Vung Tau) bak dom hatai chreih.

Ong Trinh khan, meng 13 dahlau, tuk nao tasik, ong Trinh mabuh bala, jaoh talang raong, oh daok nao ngak mbang hu. Jeng tuk nan anek drei mabuh ruak thần kinh njual, diuk di ong jeng mabuh ruak mãn tính. Mboh sang danaok di gait, Mat tran Negar dom pakat daong 80 trieu đồng piah padang sang, ngak ka ong Trinh biak drut hatai:

“Dahlau diah meng sang hala sang gak, raidiuk tagok trun, oh hu jien pasiam sang danaok. Dahlak ndua dhar phol Uy mban Mat ran Negar huyen, ban hu padang brei ka baoh sang drei ngak meng krah, diuk pasang drei biak uan tabuan. Sang bahrau padang gheih ghang sampurna, oh yau meng dahlau, oh hu labik daok huak mbang, angin yuk dhun par bak. Urak ini drei sa sajanih ngak duah jien biyar sraiy”.

Langiu di dom baoh sang bahrau gheih ghang, urak ini jeng hu ralo baoh sang daok taik tahak tandie jaleih mblaing mblang. Mboh yau nan gam saong caong "yuk apui" papandiak brei ka grauk baoh sang, dom tinh ban Dong Nam Bo kham marat ngak tui patacei di pakat nagar, kham marat padam yah sang taik tahak.

Di tinh Ba Ria - Vung Tau, taong yaom mboh hu 222 baoh sang daok caong khin hu sang daok. Di tinh Binh Thuan, hu 1.838 baoh sang daok caong padang dan pasiam sang danaok daok. Tinh Binh Thuan kham marat padang bahrau jeng ye pasiam sang ka baoh sang urang klak rup buh prein ka katmang meng dahlau harei 30/4; sang kathaot, sang jaik Taphia kathaot ganap taka gah hukum harak taneh dahlau harei 30/6. Ong Huỳnh Văn Duy, Phaok akaok UB Bhap bini xa Phan Hòa, huyen Bắc Bình, tinh Binh Thuan khan brei thau:

“Tapa taong yaom iek mboh di bhum palei hu 9 baoh sang daok di sang taik tahak, sang draoh sang tandie, dalam nan hu 7 baoh sang kathaot, 2 baoh sang daok kan daman. Hu taom mbaok mboh mikva biak bui sambai kayua hu thau Karja daong jien pasiam sang danaok. Tui dom baoh sang khin caong hu sang barau ye brei dakvah jakba gauk hatian, masraiy nyim gilang jien”.

Di Binh Duong, tapa iek yaom mboh daok 305 baoh sang ganap taka brei padang sang bahrau, pasiam dan saong daok 117 baoh sang oh ganap taka gah tanah (sổ chung). Tinh kham marat ngak blaoh abih 100% di abih bilan 6 anak ini. Di tinh Binh Phuoc, tui danak dak daok labaih angak 660 baoh sang bahrau saong pasiam. Min, tui bhum palei di Dong Nam Bo hu phun jien karei atau jak ba di dom urang daong di dalam rah ra. Taong abih dom tỉnh jeng hu daong glaong jang dak caik.

Ngak tui danak dak yah padam sang taik tahak blaoh Thu tuong Rajaei peih ieu ngak, urang pan akaok di dom tinh Dong Nam Bo jeng jan ji ngak siam ngak blaoh, ba mai dom baoh sang bahrau gheih ghang, karo kajap, daong bhap bini rahra kan daman brei karo dalam raidiuk. Bruk ini daok brei ngak ka siam tani tanat, dalam nan oh brei tamuh tabiak bruk tabak mbang tame sarak karja./.