Dalam tuk kinh tế kan kandah yau urak ini, rilo doanh nghiệp saong rahra di TP.HCM daok caong maong sarak ini samar drah hu ba tame ngak piah trun yaom ngak tabiak, pachreih bruk blei pandar. Kadha vak di Lệ Hằng, urang vak daok di TP.HCM.

Saai Nguyễn Thị Tâm daok di TP.Thủ Đức brei thau, jaik di ini jien mek tame di saai trun rilo, nan ye bruk cai pandar dalam sang njauk kuhri kuhria biak tani tanat. Tuk blei pandap pandar yaok harei, yau ye ia tasau, ralaow, baoh manuk, manyek mbang… atau dom pandap panda karei, saai Tâm jeng duah thau dom mbang trun yaom blaoh meng blei. Tui saai Tâm, mayah sarak trun jien je VAT 2% ka taong abih dom janih pandap panda, dịch vụ daok njauk kak je 10% ye urang pandar yau saai jeng hu mbang tui: "Dalam tuk kinh te gaok kan kandah, jien mek tame trun, bruk trun jien je VAT ka doanh nghiệp ngak pandap, drei blei pandap  yaom jeng hu trun, nan lac sa paok jien drei patak pataom hu labaih tabiak. Drei meda mek jien ini piah blei veik pandap mbang ka anek bhik atau dom pandap mbang pabak veik dinh dưỡng ka anek di drei. Kayua yau nan ye, bruk trun jien je ini hu makna biak praong ngan haong dahlak". 

Doanh nghiệp ngak pandap, pablei salih, ngak mbang dom dịch vụ hu trun jien je ini jeng biak chreih chrai caong sarak samar drah hu brei tapa, hu peih ngak. Tuk nan, yaom pandap tamo piah ngak di doanh nghiệp kak je VAT hu trun 2% dut saong dahlau deih. Dom doanh nghiệp pabak dom dịch vụ logistics, đại lý hải quan…jeng lac gah hu trun VAT. Mayah bruk trun 2% jien je GTGT hu peih ngak ye doanh nghiệp meda trun yaom phun jien ngak pandap, trun yaom pablei tabiak di dom pandap panda, rik tame pachreih bruk blei pandar dalam taneh ia. Ong Võ Thanh Tú, Yam ndok tacei jalan Công ty ONEX Logistics caong maong lac:  "Tuk ba tabiak bruk trun VAT ye dahlak jeng caong lac dom harak gar hu mbuan jang, piah oh tamuh tabiak rilo jien sahui jang ka doanh nghiệp. Thun 2022, Rajaei hu ba tabiak pok daong trun VAT ka rahra saong doanh nghiệp, min oh trun yaom ka taong abih dom pandap panda saong dịch vụ, bo trun tui janih. Kayua yau nan ye, tuk bahrau peih bruk trun jien je, bruk pato tacei ka oh cambaih laih ba tal bruk doanh nghiệp pandar suan code pandap panda nan ye njauk phat saong njauk pataom mek jien je".

Tui Kapul Doanh nghiệp TP.HCM ye oh njauk lac darak pasa dalam taneh ia daok kan kandah, prein blei takik, njauk pachreih blei, bo darak pasa pablei tabiak negar langiu jeng biak kan kandah. Kayua yau nan ye, doanh nghiệp caong lac bruk trun jien je VAT mbang ini meda lac bruk pachreih ba dalam taneh ia saong patagok prein maraik gauk gah yaom kaom ka pandap panda pablei tabiak negar langiu. Luật sư Phạm Ngọc Hưng, Phó akaok Kapul Doanh nghiệp TP.HCM brei thau lac, Kapul doanh nghiệp TP likau tukvak trun 2% VAT dui atah tal abih thun 2024: "Kol dahlak caong lac bruk trun jien je ini njauk dui atah, kayua 6 tal 7 bilan blaoh abih trun jien je, salih tapa karei ye bruk salih nan biak kan kandah. Hóa đơn hu ngak di tukvak ini min tamat hadei di tukvak nan. Pagap yau harak pambuak ini hu mbaoh tangin di puac bilan 12.2023, min tapa bilan 1/2024 meng jao pandap je hóa đơn vak yau habar?"

VAT lac jien je gián thu, urang blei pandar meda hu mbang tui kein laba tapak meng sarak ini. Kayua yau nan ye, TP.HCM jeng kuhria tal jalan langyah mayah sarak hu pandar ye samar drah pato tacei urang blei pandar hu mbang tui quyền lợi di drei tuk blei pandap, pandar dịch vụ./.