Mentri Y tế birau hu panuac haong Mban tacei jalan pacang caga jit pakat negar trun tukvak brei daok karei ngan saong urang tame meng negar langiu, dut iek mboh âm tính haong SARS-CoV-2 meng PCR dalam 72 tuk atau dut  iek samar kháng nguyên am tinh dalam 24 tuk (oh kuhria uranaih umo 2 thun) dahlau tuk mai Việt Nam. Dalam 24 tuk camereip, urang tame negar brei dut iek SARS-CoV-2. Meyah tapa dut iek mboh am tinh ye tabiak nao mai, min njauk ngak tui dom jalan pacang caga jit tui bhum palei. Meyah dut iek mboh dương tính brei khan chip ka jabat y tế pak nan thau piah hu tacei pato langyah sumu tui bruk ba tabiak.

Vịnh Hạ Long (tỉnh Quảng Ninh) song  địa đạo Củ Chi (ban raya  Hồ Chí Minh) bahrau hu blah  du lịch Thetravel.com palih ruah tame  top 10 labik  nao ravang me-in dui pachreih dunya  bo tuai damuai njauk nao tal . Tui  Thetravel, địa đạo Củ Chi hu pok meyaom lac  labik  ravang me-in duah thau biak dui pachreih gam song dom jalan lubang dalam haluk atah labaih  200km, cagar nao mai, hu rilo tal. Labik inem krung dak rai  địa đạo Củ Chi hu: Địa đạo Bến Dược (căn cứ Quân khu Sài Gòn - Gia Định (khu A), căn cứ Khu ủy Sài Gòn - Gia Định (khu B) song địa đạo Bến Đình (căn cứ Huyện ủy Củ Chi).

UB bhap bini tỉnh Vĩnh Long birau ba tabiak danak dak “Paglong chuỗi giá trị bruk ngak lan bhong meriak Vĩnh Long, tukvak 2021 -2025”. Danak dak peih ngak haong yaom jien abih tih jaik 9 tỷ đồng, pataom tame paglong tangin ngak, prein ngak pandap, khik ramik tapa dom tal pato pakai pabak ilamu ka dom labik ngak, salih mẫu mã pandap ka lagaih haong darak pasar saong ba tame panda số hóa. Danak dak hu peih ngak piah khik ramik saong cakrok patagok bruk ngak pandap lan, rik daong khik ramik palei ngak, ba bruk ngak, patagok jien mek tame ka bhap bini.

Tapa tuk vak kham merat pacang caga, taong ruak, urak ni tỉnh Bến Tre pacang hu ruak  viêm klik tagok boh  angaok tapol athur rong. Dom bruk ngak mbang, pablei salih athur rah tabiak yau dahlau veik. Urak ni, labaih 87% dom tapol athur rong hu klauk vắc xin pacang ruak viêm tagok boh. Bruk pruh jru pametai anek ruak labik rong glang hu peih ngak samu gauk di labik praong. Ruak viêm klik boh rah tabiak angaok tapol limo di Bến Tre meng bilan  8 thun bloh di  53 xã dalam  8 huyện, ban,  song hu labaih  830 drei limo njauk njom ruak.

Kayua jit ruak praong Covid-19, darak pasar pandap alin Harei Dunya urang kumei 8/3 mboh joa kandang jang duk saong dom thun dahlau. Yaom lac dom cửa hàng, siêu thị jeng hu ba tabiak rilo danak pachreih urang blei biak ralo, mon tuai mai blei jeng takik jang dom thun dahlau, abih di nyu nan lac dom pandap alin rilo jien. Salih tame nan, thun ini urang brei palih ruah dom pandap hu makna, brei mboh bruk sangka jeng yau hatung hatian di urang alin brei. 

Dalam 2 harei puac adit meng bloh, yaom menyek di dunya tagok samar tal having akaok, hu tuk tagok jiak  140 USD/sa thung. Tui rilo chuyên gia kinh tế, yaom menyek tagok khang kayua bruk  cấm vận hu batabiak ngan song menyek tamo  song dom pandap karei di Nga. Urak ni, dom jalan tong phạt bo  phương Tây mong tame Nga jeng dok brei  adat  giao dịch năng lượng di  Nga hu khik veik. Min, jiak abih tuai blei jeng dok nyaik atah menyek di  Nga kayua huac gam tal bruk tong  phạt atau kan hu bayar jien.

Cao ủy Liên hợp quốc ka urang tị nạn, Phi-lip-pô Gran-đi (Filippo Grandi) brei thau, labaih 1,5 trieu urang tị nạn meng Ucraina nduac tapa dom taneh ia jaik taphia saong ndom lac “ bruk sraw kadau urang tị nạn rah tabiak samar abih di châu Âu kuhria meng tuk Kalin kan Dunya mbang ka 2”. Dom taneh ia karei yau Ru-ma-ni, Hung-ga-ry saong Ba Lan, jeng brei taduan urang meng Ucraina. Adit dahlau, LHQ kuhria mboh labaih 1 trieu urang Ucraina tabiak truh taneh ia, meblah 2% dom menuac sia dalam taneh ia.

Urak ni, rilo taneh ia di dunya dok kham merat peih dom jalan ngak piah meda duik  song virus SARS-CoV-2 song iek  COVID-19 lac sa janih ruak đặc hữu-hu makna lac sa ruak hu dom mbang tamuh tabiak tui bilan hajuan saong anek menuac meda duik hong nyu yau ruak cúm. Mintri Y tế công cộng Thái Lan dok hu jalan pathau khan  COVID-19 lac ruak  đặc hữu dalam 4 bilan tal. Dalam tuk nan, Tây Ban Nha  dok hu panuac ieu  mong  COVID-19 yau ruak đặc hữu. Rilo  bang di  Mỹ jeng dok pacadu bruk cuk pataih pacang mbaok song dom bruk pacang caga jit karei karei. Ralo taneh ia yau  Anh song  Đan Mạch brei klaak tong abih dom jalan pacang jit, pamong tal bruk duik haong gauk song mong COVID-19 yau sa janih ruak đặc hữu./.

Urang lang: H.Pha & A.Nghiem – 7/3/2022