Urak ini jaik abih dom sang bac di TP.HCM pabak var mbang tui dua jalan lac mbaoh tangin haong Cty pabak var mbang công nghiệp haong dom sang bac oh hu labik ngak mbang huak di sang bac, atau tahanek ngak  pak di sang bac.

Amuk Đỗ Ngọc Chi, Akaok Sang bac Tiểu học Nguyễn Bỉnh Khiêm (Quận 1) brei thau, sang bac daa amaik ame anek saih mai rivang iek ghing tahanek lisei di sang bac, pasang iek bruk kuhria caga ka dom paok lisei jala pandiak ka anek saih. Sang bac hu lagaih tuk ngak ghing tahanek dalam sang bac. Bruk ini daong ka sang bac hu  lagaih dalam bruk pasang iek meng bruk blei pandap tame, ngak, khik piah mẫu…

Jeng deih yau nan, ong Lê Văn Lực, Akaok Sang bac THCS Đặng Tấn Tài (ban Thủ Đức) brei thau lac, sang bac urak ini jeng hu mbaoh tangin pambuak bruk haong gah tahanek lisei công nghiệp min tahanek ngak tapak di sang bac. Nan ye sang bac meda pasang iek hu bruk tahanek, pandap ngak, pajeng ba, khik piah… Dom gru pato, urang ngak dalam sang bac jeng mbang yau dom anek saih. Langiu “mẫu lưu” pandap mbang di gah ngak pandap, sang bac jeng hu khik veik mẫu karei, khik piah di sang bac yaok harei. Ong Lực ndem lac: “Sang bac, mban lambaok saong labik ngak ghieng jeng pasang iek prein piah pilih ruah labik tahanek ngak. Dalam tuk ngak, pak ini bhian pasang iek oh khan brei thau dahlau, yaok adit sa mbang.” 

Urak ini gah sang bac, bruk pasang iek ghieng tahanek var mbang jala pandiak daok iek tui harak gar, saong prein di dom labik pabak pandap mbang. Yaom lac yau nan, ong Cao Đức Khoa, Akaok Sang bac THCS Huỳnh Khương Ninh (Quận 1) brei thau lac, bruk mbaoh tangin haong labik pabak lac ghieng mbang công nghiệp hu iek tui rilo asal kadha, dahlau di abih lac tapa to yaom, taong yaom prein peih bruk tahanek ngak var mbang jala pandiak. Sang bac jeng nao tal labik piah duah thau ka labik ngak, pasang iek harak gar caong hu, công thức dinh dưỡng tuk tahanek ngak ka anek saih. Ong Khoa daok brei thau lac:  “Mayah hu mbaok taneh, hu ginup labik, dahlak mboh lac njauk tahanek eng, meng nan meda khik ramik hu chất lượng biak siam, var huak di anek saih meda hu siam mekre jang. Ini lac bruk bo dahlak biak caong hu, mayah sang bac hu labik ye njauk peih bruk tahanek lisei di pak sang bac.”

Min, urak ini oh njauk lac labik pato bac halei jeng hu ginup mblang taneh piah peih bruk tahanek lisei jala pandiak pak di sang bac. Nan ye langiu di bruk pasang iek di sang bac, di amaik ame ye  njauk hu bruk pambuak gauk dom gah pambuak tal yau ye gah y tế, salamat pandap mbang. Akaok sa Sang bac THCS di quận Bình Thạnh brei thau lac, tuk kakei var huak công nghiệp, yaom lac pasang iek harak gar njauk adat min akaok sang bac ini jeng biak haduh hatai kayua oh njauk lac harei halei sang bac jeng nao tal labik tahanek piah pasang iek.

Bác sĩ Vương Anh Tài, Akaok Jabat Y tế Quận 11 brei thau lac, urak ini  UBND quận huyện tok hu adat ngak brei harak lac salamat pandap mbang ka dom labik sit, dom labik praong jang lac daok dalam thẩm quyền di Sở Salamat pandap mbang TP.HCM. Jabat y tế quận hu brei bruk daong ka quận piah taong yaom dom ghieng tahanek huak sit di sang bac, labik pablei salih pandap mbang dalam ban: “Mban khik ramik salamat pandap mbang hu panuac ieu kol dahlak peih ngak chuỗi salamat pandap mbang. Bruk ngak ini hu taong yaom tapa bruk nao tal dom tinh, ban piah pambuak bruk haong dom công ty, dom labik ngak nong pabak pandap mbang salamat ka dom sang bac pandar. Nan ye kol dahlak pachreih dom sang bac hu mbaok tame blei pandap mbang di dom gah ngak salamat pandap mbang di dalam ban.”

 Urak ini, bruk pasang iek di dom gah pambuak gauk bhian hu peih ngak meng 1 tal 2 mbang sa thun bac, nan ye ka oh pasang iek hu abih bruk haci hacih pandap mbang kayua sang bac oh hu ginup quyen piah pasang iek taong abih dom bruk ngak di ghing tahanek lisei. Dom sang bac tok meda pasang iek rilo meng lac di mangaok harak gar, asal di nyu saong harak hacih saat salamat pandap mbang. Nan ye, piah oh daok haduh hatai tui iek dom var mbang jala pandiak di sang bac, njauk hu bruk pasang iek gam gam gah pabak harak gar, padang dom kapul pambuak gauk nao pasang iek di dom labik tahanek, pabak pandap mbang ka anek saih./.