Rilo bac sy ranaih umo mai tal phuong xa dong iek ruak ka urang F0

Hiệp Thành lac phường hu rahra labaih  110.000 urang  song hu dom urang njom  Covid-19 glong di abih dalam  11 phường di quận 12, ngan song  6.000 F0  dalam mbang jit ka  4. Bác sĩ Nguyễn Thị Quỳnh Trang song  bác sĩ Hà Duy Việt (jeng hu umo  25 thun, bac tamat  khoa Y sang bac  Đại học Y khoa Phạm Ngọc Thạch thun bac  2015-2021) halan hatain tut angan daong pabak ka cơ sở song hu ba nao ngak bruk di  Bilai Y tế Hiệp Thành. Langiu di bruk dong ka y bác sỹ  klauk vaccine Covid-19, 2 urang daok hu brei bruk taduan iek ruak  thông thường song tacei pato  taong ruak ka F0 di bilai. 

Bác sĩ Quỳnh Trang khan lac: “Tuk bahrau mai ngak bruk, kol dahlak jeng oh ka bhian randap, kayua  tuk camereip taduan ngak di  labik cơ sở, saong daok kayua labik laboa, pandap panda di bilai oh hu ginup. Min, mbuan lagaih lac ranaih umo, song abih di nyu nan lac taduan hu bruk dong abih drei di dom adei saai nao dahlau, nan ye, hadei di sa bilan, bruk ngak hu siam mekre. Meng nan, rahra jia tame kol hulin jang dalam tuk iek ruak, tong ruak ka rahra. Piah pabak veik bruk jia tame nan, dahlak hu panuac sinya haong rup drei lac kham merat jang, piah iek glang pren yava ka mik va dak harei dak siam jang ”.

Duah tal bilai  Y tế xã Tân Phú Trung (Củ Chi), njauk di tuk bác sĩ Mai Thị Kim Trân, Akaok biai, dok gam song  bác sĩ ranaih umo Lê Nguyễn Ngọc Trân thar var iek ruak, brei jru ka rahra. Tuk mon 9 harei  10-3, hu labaih  150 urang mai bilai iek ruak. Yar thẻ bảo hiểm y tế ka urang ngak gah y tế pasang iek, Saai Hà Mai Trang (umo 26 thun) brei thau: “Dom harei ni langik pandiak, hulin tuk pandiak tuk liar … mboh taom dar drei rilo urang njom Covid-19 lo, nan ye tal bilai cong bác sĩ iek ruak. Hu bác sĩ Ngọc Trân khan lac njauk pandik tarakon min, bloh dok hu tacei pato biak cambaih laih, tangi sua urang ruak, hu panuac  kakei … hulin mboh dok siam jang balik iek ruak tư”. 

Xã Tân Phú Trung hu labaih  50.000 urang song yaok pluh ribau urang ngak, di labik ngak cong Tân Phú Trung pah dok dalam dom labik sang trọ. Mbang jit ka  4 meng bloh, dom urang ngak gah y tế njauk quá tải kayua kurang urang ngak, oh hu tuk vak padeih padei. Bác sĩ Kim Trân khan lac: “Tuk bilai hu taduan  bác sĩ  Ngọc Trân mai ngak, kol hulin biak uan tabuan. Bruk njauk ndom tal di abih, lac lac sang  bác sĩ Ngọc Trân daok di  Phú Nhuận, min, dalam dom adit ngak bruk di bilai, adei tuk halei jeng hu mbaok meng avar, piah dong ka abih gauk yaom lac bruk oh gam hagait tal bruk ngak di drei. Meng bruk abih hatai jai di dom bác sĩ ranaih umo yau  Ngọc Trân bo nyu dui pachreih rahra mai tal bilai iek ruak”.

Atah di bilai  Y tế xã Tân Phú Trung labaih  25km, Bilai  Y tế xã Nhuận Đức  dalam dom harei kreh bilan  3 hu yaok rituh rahra mai iek ruak. Bác sĩ ranaih umo  Lê Huỳnh Hải Mi tuk iek ruak ka urang ruak, tuk taduan phone ieu  jalan talei pandiak, piah taduan dom mbang ieu dong di F0. Meng nan, Bác sĩ Hải Mi thau cambaih bruk glaih glar  bo dom urang ngak di bilai y tế njauk ndua naong dalam luac bilan jit. Bác sĩ Mi ndom lac: “Mai pak ini, hulin song dom bác sĩ halan hatain hu iek glang tani tanat meng pandap panda tal hatai sahneng, yau nan ye thei jeng khang hatai”.

Bak sa bilan, jiak 300 bác sĩ ranaih umo bahrau bac tamat di sang bac mai ngak bruk di dom bilai  y tế phường, xã, ban sit  dalam ban raya. Urang daok bhain randap haong labik bahrau, thei jeng kham merat abih drei dalam bruk ngak. Kayua urang jeng sahneng mboh yau gauk: Ni lac labik piah pasram ka rup drei, gam song nan pandar siam tuk vak  biak hu yaom ini  piah dong ka menuac sia, ka rai duik./.

Urang lang: Hanipha- 19/3