Van pataom mbaok dom adei sa-ai dalam Nghiệp đoàn radaih kuan quận Bình Tân di “Labik padeih takai” (ka 44 jalan Liên khu 16-18, phường Bình Trị Đông, quận Bình Tân) page mesup ini bui sambai, chreih chrai jang. Jaik abih adei sa-ai oh taduan mek tuai piah nduac, bo ba gauk padeih padei, daok cang Gah Jien padai Vi mô CEP mai brei jien mesre. Yaok đoàn viên nghiệp đoàn hu mesre meng 10-30 triệu đồng, ba-yar dalam 6 bilan haong jien jhung biar tok 5%/thun.

Urang peih radaih Grab Huỳnh Hữu Thảo, umo 49 thun, hu mesre mbang ka  klau brei thau, ini lac sa dalam dom sarak bo dom đoàn viên hu kein laghaih tuk tame công đoàn:“Rilo danak dak lo, oh njauk lac tok hu sa danak dak ini. Mesre jien gah công đoàn ye jien jhung biak biar. Sarak di Karja siam rilo, daong ka urang peih radaih gaok kan kandah, daong pasiam veik sang danaok, pasiam veik radiah... Daong palaghaih ka adei sa-ai biak rilo”.

Nghiệp đoàn radaih kuan, radaih công nghệ quận Bình Tân hu padang tagaok 4 thun ini mai, meng tuk camereip tok hu 28 urang, tal harei ini hu jaik 800 urang. Ong Lê Tấn Lưu - Akaok Nghiệp đoàn brei thau, ong padang dua kapul, nan lac kapul hu đóng jien đoàn phí yaok bilan (labaih 300 urang) saong kapul oh ka đóng jien đoàn phí. Ngan haong dom urang hu đóng jien đoàn phí blaoh, quyền lợi hu karei gauk cambaih laih, hu iek glang ginup abih meng nghiệp đoàn. Nan lac oh ka ndom tal dom bruk daong karei meng Liên đoàn Lao động quận atau Liên đoàn Lao động TP.HCM dalam tuk lễ, Tết atau Bilan Urang ngak. Lavik lavik harei, mboh hu kein, laghaih di công đoàn, adei sa-ai urang peih radaih tut angan tame nghiệp đoàn rilo jang. Ong Lê Tấn Lưu brei thau: “Tame nghiệp đoàn ye hu rilo sarak ka urang peih radaih, pagap yau adei sa-ai salih radaih siam jang, mesre jien pasiam radaih piah nduac hu salamat jang. Tok hu mbaok tame kapul ini meng hu yau nan, meng hu nghiệp đoàn bo adei sa-ai urang peih radaih hu thau rilo thong tin, ilamu jang, hu taom gaok haong sarak siam jang.”.

Daok amuk Nguyễn Thanh Tâm, umo 60 thun brei thau, hadei di tuk hu jak ba tame Nghiệp đoàn daong bruk ban Thủ Đức, thau hu dom sarak di Karja, amuk ieu rilo urang karei ba gauk tame công đoàn. Amuk Tâm hu pok ngak urang dang akaok Nghiệp đoàn daong bruk quận Thủ Đức (klak), abih hatai daong dom đoàn viên karei:“Dahlau di tuk tame nghiệp đoàn ye drei tok thau drei min, oh thau hagait karei. Hadei di tuk tame nghiệp đoàn ye drei mboh hu rilo siam gheih. Pagap yau adei sa-ai kamei daong gauk, thau ka rai diuk di urang ini urang diah. Rilo sa-ai lahik bruk ngak, dalam tuk drei hu biak rilo bruk ngak ye iew adei sa-ai mai piah daong bruk, piah ka adei sa-ai hu jien cai pandar dalam sang”.

Ong Nguyễn Thanh Xuân, Phaok akaok Liên đoàn Lao động Ban Thủ Đức brei thau, dalam ban hu jaik 10 nghiệp đoàn. Urak ini Liên đoàn lao động daok peih bruk pasang iek piah brei tabiak mbaok nghiệp đoàn pablei salih vé số:“Pablei vé số bhian takik hu thei daok dalam umo ngak bruk, rilo meng lac urang prong thun saong uranaih nan ye njauk pasang  iek ka nyu tani tanat haong karja phường meng padang hu. Taphia di nan, hu rilo urang pablei vé số lac urang jaoh jo nan ye brei pambuak bruk haong gah chức năng piah hu sarak ka nyu cambaih laih. Rilo tuk padang tagok bo oh sangka iek glang hu ye jeng lac bruk ngak oh siam, oh gheih”.

Tal harei 31/5/2024, TP.HCM hu 137 nghiệp đoàn, haong 12 ribau 700 đoàn viên. Tui ong Trần Đoàn Trung, Phaok akaok Thường trực Liên đoàn Lao động TP.HCM, bruk daong dom urang ngak oh chính thức hu jeng đoàn viên nghiệp đoàn saong hu tame công đoàn oh lac tok langyah hu bruk an sinh xã hội bo daok ngak tabiak sa kapul nyaom urang ngak khang kadang jang. Công đoàn Ban raya daok daong palaghaih ka urang ngak di labik oh chính thức hu sangka iek glang, hu daong, hu mbaok tame sinh hoạt, bac megru, grap tanat rai diuk./.