Urak ini mikva daok di palei Dân Hiệp, xã Thuận Hòa, huyện Hàm Thuận Bắc bhian randap haong bruk diukrai bahrau, dah page ba gauk tagok radaih pajeng ba nao ngak di labik ngak kong. Amuk Lê Thị Hòa, Chủ tịch UB bhap bini xã Thuận Hòa, kuhria mboh lac hu jaik 100 urang ngak lac dam dara urang bangsa takik daok di palei Dân Hiệp urak ini daok ngak công nhân ka dom Cty, xí nghiệp di ban Phan Thiết.

Langiu di palei Dân Hiệp, mikva daok di Lâm Thuận, palei harat urang Cam xã Hàm Phú jeng hu mbaok di dom labik ngak kong. Urang parabha gauk bruk hit dalam sang, pasang jao ka diuk atau diuk jao ka pasang bruk iek glang puh cakak, bein phun pala, sang danaok, athur raong piah nao ngak công nhân, duah jien pasiam raidiuk. Akaok UB bhap bini xã Hàm Phú - ong Võ Văn Tâm brei thau, dom menuac oh ka ginup umo thun ngak bruk haong urang taha meng daok di sang pala drak, raong glang, daok veik lac nao ngak công nhân nan ye kinh tế mikva di Lâm Thuận daok tagok mboh di anak meta. Oh lac palei Lâm Thuận bo di rilo palei karei dalam xã Thuận Minh, mikva jeng nao ngak công nhân.

Nan lac bruk daok rah tabiak di huyện Hàm Thuận Bắc, labik hu 16.548 urang bangsa takik. Taong abih gauk jeng daok kham merat yam tapa eik lipa kan kathaot, yam tabiak truh adat cambat tanarakun klak oh daok lagaih piah nao tal dom labik ngak kong, ngak krein, ngak randap haong jamriak, mac moc, dom dây chuyền sản xuất bahrau. Mikva oh lac nao ngak di labik ngak kong dalam tỉnh, bo daok nao tal TP.HCM, Bình Dương … saong hatai caong duah jien pasiam raidiuk. Sa-ai Huỳnh Thị Thu Ngân, Akaok jabat Lao động Thương binh - Xã hội huyện Hàm Thuận Bắc brei thau: kuhria ta-eng Cty TNHH Quốc tế Right Rich di labik ngak kong Hàm Kiệm, Hàm Thuận Nam hu tal 2.000 urang daok ngak bruk, nan oh ka kuhria tal dom labik ngak kong di Phan Thiết.

Amuk Mang Thị Thồi daok di palei Dân Hiệp, xã Hàm Kiệm khan lac: harei halei jeng nao ngak, meng mesup tal biar harei sup, yaok bilan duah hu 7 triệu đồng. Meng nao ngak công nhân ye hu jien daong sang cai pandar. Dahlau daih 2 diuk pasang tok ngak hamu, abih menuac dalam sang pataom tame pala drak, raong glang. Meyah thun halei langik tasik oh siam, pala oh hu, gaok jit ruak ye tavak sraiy, oh thau pambak tame halei.

Dalam tỉnh Ninh Thuận hu labaih 100.000 urang bangsa Cam, K’Ho, Rai, Raglai...daok di dom xã bhum glaong. Mikva diukrai rilo meng bruk raong glang, pala drak saong tame glai man pateok…Dom thun jaik di ini, biến đổi khí hậu ngak kan kandah tal bruk pala drak; glai dak harei dak takik veik, kaya glai jeng takik tui nan ye raidiuk kan kandah, yaom lac Đảng saong Karja abih hatai sangka yau ye brei taneh pala drak, pato pakai, paglaong ilamu, pato bruk ngak...min mikva jeng oh ka tabiak truh hu kan kathaot.

Meng hu dom pakat, dom gah dalam palei sangka jak ba nan ye rilo mikva nao bac bruk ngak piah likau tame ngak công nhân di dom labik ngak kong. Tuk camereip toh hu dom urang nao, hadei di nan mboh lac bruk nao ngak hu jien tame tani tanat, bo oh glaih glar yau bruk ngak nong... nan ye rilo mikva ba gauk nao ngak công nhân.  Meng nan, yaok thun dom dam dara tal umo thun ngak bruk hu bac bruk ngak saong hu ngak bruk tagok rilo, raidiuk mikva jeng hu siam tagok saong tani tanat.

Yaom lac yau nan, min sa-ai Hoàng Thị Kha, Chủ tịch UB bhap bini xã Mỹ Thạnh, huyện Hàm Thuận Nam brei thau, jeng daok hu rilo bhap bini oh ka bhian randap haong bruk ngak tui mon, tui tukvak di dom labik ngak kong, oh ka tui samu raidiuk bharau, daok takre tame glai, trun hamu, tagok puh. Rilo tuk urang jakar nao tal sang jak ba mikva nao ngak công nhân min oh hu mikva pachreih tui, rilo urang nao hu dom harei ye mai sang veik, kayua oh bhian randap haong labik ngak bruk./.

Urang lang: M.Phuong – 29/7/2022