Amuk Nguyễn Thị Kim Nguyệt daok di Khu phố 5, ban sit Tân Túc, huyện Bình Chánh daok hu urang đoàn dam dara di Công an huyện pato tacei dom jalan  pataom veik dom harak gar yau ye harak adat peih radaih, cà vẹt radaih tame căn cước công dân pagam chip. Caong thau meng lavik mai, harei ini hu urang jakar mai trun tal labik sang tro pato tacei cambaih laih, amuk Nguyệt biak uan tabuan: "Dahlak mahit lac drei ngak căn cước blaoh oh cang ngak hagait tra, nan ye dahlak pan harak ini tabiak sua tangi lac njauk pabak hagait veik halei oh. Urak ini ndem yau nan lac thau cambaih paje. Yau nan lac njauk paje, pato tacei yau nan ka rahra mbuan thau, meyah drei oh thau, drei thau jalan halei piah ngak.. kamuan ini ndem ye drei thau paje. Mayah hadei di ini drei nao halei ye drei tok pan căn cước công dân ye mbuan paje, oh cang ba harak gar hagait ka nyu kandaih kandaiy".

Jeng dreih yau nan, saai Thu Hà daok di xã Vĩnh Lộc A, huyện Bình Chánh, hu dom urang đoàn dam dara di xã mai tal labik bhap bini daok piah pato tacei jalan ngak dom bruk di mangaok cổng dịch vụ công, biyar jien điện tapa tài khoản gilang paraik chip di mangaok phone par tangin. Saai Hà brei thau, dahlau deih dom bruk yau ini njauk nao tal UBND xã, tabiak gilang paraik, abih rilo tukvak, urak ini 15, 20 minit meda ngak hu dom dich vu bo drei caong.

Oh klaak saoh dom harei padeih puac adit, Thượng uý Nguyễn Văn Thành, Bí thư kapul dam dara cơ sở Công an huyện Bình Chánh haong dom urang đoàn dam dara nao tal yaok labik, yaok baoh sang piah pathau khan, daong tame ứng dụng VNeID saong ngak căn cước công dân pagam chip, langyah dom tangi sua di rahra ka mã định danh điện tử. Gaok mai, dom urang đoàn dam dara daok ngak brei dom harak gar piah ngak căn cước công dân pagam chip ka rahra. Thượng uý Thành brei thau, ini gam lac bruk bo kanja jao brei, gam brei mboh bruk ngak di urang đoàn dam dara di cơ sở:  “Tapa mbang pathau khan piah ndom ka dom kein lagaih di định danh điện tử tanut 1, tanut 2. Kayua drei daok dalam tukvak salih số, bruk pandar công nghệ thong tin ba kein lagaih, ngak trun manieng dom harak gar tuk hu mbaok tame dom bruk njauk ngak, abih di nyu nan lac dalam bilan dam dara. Tapa ini, meda patagok hu bruk ba akaok nao dahlau di kapul công an dalam bruk salih số ini.”

Tui ong Võ Đức Thanh, akaok UBND huyện Bình Chánh, tukvak tapa, huyện caik hatai sangka tal dom bruk ngak piah paglaong bruk ngak di karja. Min, di dalam huyện hu biak rilo rahra meng labik karei mai daok, rilo harak gar gah hành chính, taneh riya, padang ngak sang danaok saong rahra biak huac kadha yaok tuk nao ngak dom janih harak gar ini. Bruk urang đoàn dam dara nao tal labik daok piah daong ka rahra peih ngak dom dịch vụ công online lac bruk njauk ngak saong siam lagaih. Tapa nan, dom công chức, viên chức ranaih umo mboh cambaih jang bruk ngak công vụ saong bruk ngak brei ka rahra. Ong Thanh caong kapul urang công chức, viên chức ranaih umo biak caik hatai tal dom harak gar hành chính daok ngak kan kandah tal rahra, doanh nghiệp: "Bruk njauk biai nan lac dom urang đoàn dam dara jeng caik hatai tal bruk ngak harak gar hành chính hu rilo kan kandah. Urak ini yaom lac daok peih ngak dịch vụ công online pakat 3, pakat 4 di rilo gah. Min piah ka rahra peih ngak tapak dom asal kadha ini lac brei hu biak rilo bruk saong dom urang đoàn dam dara, dom urang jakar công chức ranaih umo lac dom urang pambuak bruk pato tacei, daong ka rahra, meng nan piah ka rahra peih ngak dịch vụ công ini dalam tukvak anak tal".

Piah salih bahrau hành chính saong salih số hu siam lagaih, biak caong urang đoàn dam dara daok ngak bruk dalam dom jabat kanja, gah chức năng, ba akaok nao dahlau, lagaih samar haong ilamo công nghệ saong kham merat daong ka rahra, doanh nghiep peih ngak./.