Gah dulich tỉnh Bạc Liêu meda lac kareih pabah mbang abih luac tukvak suai lavik kayua jit ruak  Covid-19. Hadei di tuk jit ruak hu pacang, Bạc Liêu brei peih pabah mbang meneing, pamaong tal bruk salih bahrau salamat, sami samar saong pacang siam jit ruak Covid-19. Urak ini, dalam tỉnh hu 15 labik rivang ma-in, dalam nan ban Bạc Liêu hu 8 labik rivang ma-in hu Hiệp hội Du lịch Bhum taneran kraong Cuu Long brei angan lac lac labik rivang ma-in gheih mekre, nan ye gah dulich caong lac samar hu taduan raok rilo tuai mai veik rivang main.

Daok di Cà Mau hu patabiak danak dak “ Cà Mau labik rivang ma-in thun 2022” piah yaih khan dom kein lagaih, prein khang di bhum palei. Mai tal Cà Mau dalam thun ini, tuai damuai meda hu mboh di anak meta dom mbang pakacah vah ghe angaok kraong Đất Mũi, pakacah ghe ba lá angaok kraong Cái Tàu, adat padang kỷ lục ngan saong sruh hani danko praong abih di Viet Nam, hu mbang dom pandap hu ngak meng ariang tasik lamek bingi abih di bhum gah Pei…

Dalam tuk nan, gah dulich Đồng Tháp daok kham merat kuhria caga ka bruk yaih khan, pacheih bruk dulich, ngak birau pandap dulich. Tỉnh jeng hu sanya nao gam daong ka doanh nghiep, baoh sang,  bhap bini peih bruk salih pandar số, patagok bruk ngak birau, padang ngak hệ thống bản đồ số dulich.

Meng thun 2019, dom danak dak pambuak dulich Ban raya HCM saong dom bhum praong gah rivang ma-in dalam negar hu peih ngak praong saong lagaih, pambak tal bhap bini saong D.N dulich. Dalam nan, danak dak pambuak bruk cak rok patagok dulich Ban raya HCM saong Bhum taneran kraong Cuu Long lac sa dalam dom danak dak hu makna praong patagok D.N, peih bruk ngak mbang hadah krah saong patagok pandap hu makna praong di Ban raya HCM.

Muk Nguyễn Thị Ánh Hoa, Yam ndoc Sở Du lịch Ban raya HCM brei thau, Ban raya HCM saong Bhum taneran kraong Cuu Long njauk jhul tagok khang jang  bruk tuai nao saong mai, rik tame lang talaih dom kan kandah anak meta ka D.N saong ngak brei lahik nao jalan sahaneng huac nao dulich di bhap bini. Ban raya HCM thau lac labik pabah mbang dulich, ye brei hu dom pandap piah dui pachreih tuai mai rivang main dom danak dak dulich pambuak gauk, meng ban raya nao bhum taneran.

  Daok tui ong Trần Đoàn Thế Duy, Tổng Yam ndoc Công ty Du lịch Vietravel, bruk pambuak dulich haong dom tỉnh, ban dalam nan hu pambuak gauk di Ban raya HCM saong Bhum taneran kraong Cuu Long brei mboh bruk ngak cambaic laic jang, parabha jeng cụm miền Đông, cụm gah Pai saong yaok tỉnh jeng hu pandap dulich siam gheih  karei di  bhum palei drei, pagap yau ye oh njauk lac labik halei jeng hu đờn ca tài tử atau bein kayau bhum kraong ribaong…Ini lac bruk lagaih, kayua tuai nao ma-in tui tour hu thau cambaic laic bruk siam gheih karei di yaok labik nao tapa.

Rilo D.N ngak dulich jeng mboh lac, langiu di bruk sumu gauk gah pacang caga jit, njauk patagok bruk pambuak gauk gah jalan mbak, cơ sở hạ tầng; patui bruk quy hoạch  saong pambuak pandap dulich, he thong pabak dich vu dulich. Tui ong Trần Đoàn Thế Duy, Tổng Yam ndoc Công ty Du lịch Vietravel, yaok tỉnh, ban brei hu pabak sarak daong dom D.N dalam chuoi pabak dich vu samar peih ngak gilac. Dalam nan brei padang kapol nyaom ngak bruk di Ban raya HCM saong dom tỉnh, ban pambuak gauk piah lang talaih kan kandah ka D.N, pabak prein khang ka gah dulich  cak rok patagok gilac. Dom tỉnh, ban brei pok panuac  likau brei adat ka dom D.N gah dulich hu mesraiy phun jien laba biar, hu taneh, daong gah je piah ngak mbang cak rok patagok. Tỉnh, ban jeng njauk brei miễn, trun jien vé tame rivang ma-in piah dui pachreih tuai damuai./.

 Urang lang: Ai Nghiem -24/3/2022