Bhum taneh glai U Minh hạ bhian hu ikan hamu biak rilo. Meng kan dahlau, yaok mbang rahra thaik thu ia bingun ye mek hu yaok tấn ikan pathoc, ikan kan, daok ikan katho ba brei ka gauk yaok mbao piah ngak rik thu, ngak ikan pandam piah mbang.

Bruk nan urak ini tok daok lac bruk meng kan. Tui rahra pak ini, dahlau deih ikan hamu hu 10 ye urak ini tok daok 1 – 2 min. Makna ngak ka ikan hamu trun daok takik lac mai meng alam moi truong. Dahlau deih, mikva pala gilai tràm, dom danao, ribaong oh hu hagait ngak brei srau kadau nan ye ikan hamu hu labik caih mebaoh, cak rok patagok. Dom thun jaik di ini, glai hu rahra pala tui jalan thâm canh rok ribaong dalam piah pok ro pala, dom lakhun kadaong mala ribaong dak harei dak rilo, ngak jhak tal labik daok di ikan hamu rilo jang nan ye hu biak takik ikan hamu. Ong Trần Minh Đức, daok pak xã Nguyễn Phích ndem lac:“Pala phun keo lai haong tràm thâm canh ye lakhun kadaong veik, oh tuk halei abih lakhun. Hu dom labik, hala keo lai jruh truh danao, ia jangaih yau mata mareo, raong ikan oh hu. Ngak yau janih dalam hala tabiak, blaoh gam haong lakhun  raong ikan oh hu”.

Taphia di bruk moi truong ye bruk taong mek biak rilo, taong mek abih di rahra jeng lac makna ngak ka ikan hamu trun khang. Tui ong Lê Văn An, urang daok di xã Khánh Lâm, huyện U Minh, bruk taong mek ikan urak ini takik rahtabiak, bruk pandar xiệc điện taong ikan dom thun blaoh biak rilo. Xiệc điện mbuan mek ikan min drei halei daok veik jeng oh praong hu, daok ikan sit ye metai abih:“Dahlak mai daok pak ini labaih 20 thun paje. Ikan hamu dak harei dak takik, tal thun 2014 tuk rahra salih tapa pala phun keo lai ye lakhun mala tagok ngak khut moi truong habar nan bo ikan hamu oh caih mebaoh hu. Abih di nyu nan lac bruk pandar xịêc điện, dua bruk ini ngak ka ikan trun nao labaih 90%.

Piah pasiam veik ikan hamu, jaik di ini, jabat chuc nang huyện U Minh brei patagok khik iek dom bruk taong mek ikan dalam huyen. Meng akaok thun tal ini, hu duah mboh, langyah 19 urang pandar xiệc điện taong mek ikan, pataom mek bộ xiệc điện. tapa bruk pathau khan, rahra hu thau dom kanjak jhak di bruk pandar xiệc điện saong halain hatain jao 281 bộ xiệc. Saai Nguyễn Hữu Lâm, uranghalan hatian jao xiệc điện daok pak xã Nguyễn Phích, huyện U Minh khan lac:“Dahlak mboh kanja pathau khan lac biak njauk, pandar xiệc điện gam ngak ka drei gaok kan kandah, gam ngak jhak tal urang karei. Nyu ngak lahik kaya ikan, ngak trun daok takik ikan di langiu kraong, ribaong. Meng nan, halain hatai buh veik, blaoh duah bruk karei piah ngak”.

Bruk cak rok patagok dom bruk ngak kinh te pambuak haong pasiam ikan hamu jeng hu jabat chuc nang sangka. Dalam nan, hu dom bruk ngak ba mai kein laba glaong saong khang kajap, yau pala njam pambuak haong raong ikan hamu, pala patei haong raong ikan hamu; pala padai haong raong ikan hamu.

Tuk akaok thun 2024, UBND huyện U Minh hu pambuak haong Kapul urang ngak nong tỉnh Cà Mau ngak pasiam veik, khik ramik saong patagok ikan hamu tukvak 2024 -2025. Danak dak pamaong tal bruk pasiam veik, paglaong kein laba kinh te saong khik ramik gen dom janih ikan hamu. Meng nan, patagok  ikan hamu jeng pandap hu prein khang. Amuk Trần Hồng Ửng, Akaok Jabat Ngak nong saong patagok palei pala huyện U Minh ndem lac:“Jabat Ngak nong pambuak haong kapul urang ngak nong pasang iek, pilih ruah 4 labik di 4 xa piah padang bruk khik ramik saong cak rok patagok ikan hamu. Dom janih ikan hamu oh daok rilo, meda brei pabak piah ka rahra cak rok bruk raong, pasiam veik. Blaoh dalam bilan taong mek ikan ye pakauk bruk taong mek ikan daok sit. Tal tuk cap mek jeng njauk raong veik ikan amaik ame piah khik, cak rok patagok veik kaya ikan”.

Ikan hamu dahlau daih hu tuk ba mai kein laba praong ka rahra daok pak bhum taneh glai U Minh hạ. Urak ini trun biak rilo, min, piah pasiam veik lac oh kan. Bruk praong nan lac hatai sahaneng di rahra dalam bruk taong mek ikan nao gam haong khik caga, pamaong tal cak rok patagok khang kajap ikan hamu./.