Tuk mboh hu dom kadha di bruk njaom HIV, sa uranaih umo 14 thun daok di Rạch Giá, tỉnh Kiên Giang nao duah bruk daong di kapul “đồng đẳng viên” angaok mạng xã hội saong gaok hu laik phone daong di kapul The Sun. Tapa ndom biai nao mai angaok zalo, ayut daok ranaih ini brei thau, dahlau di nan hu ndih daok haong urang đồng giới yau drei. Kapul đồng đẳng viên samar pabak brei test samar saong mboh lac ayut ini dương tính haong HIV, njauk nao tal sang iek ruak dut iek dalam jang piah thau cambaih laih. Sa-ai Nguyễn Trọng Phúc, phaok akaok kapul The Sun brei thau, tuk thau lac caong khin dut iek di sang iek ruak piah thau tantu, cambaih laih, brei hu amaik ame atau urang khik iek nao gam saong mbaoh tangin tame harak, ayut nan oh nao saong oh taong ruak: “Kol dahlak gaok kan kandah tuk gaok dom uranaih oh ka ginup umo thun piah nao dut iek ta-eng drei. Tuk kol dahlak ieu dom adei nan khan brei amaik ame thau piah ba tame sang iek ruak dut iek piah thau tantu cambaih laih, ye ayut nan javap jalei lac oh ngak hu bruk ini saong meng nan oh daok taom gaok hu uranaih umo 14 thun ini.”

Tapa bruk taong ruak saong khik iek urang ruak HIV/AIDS, bác sĩ Lưu Thị Quỳnh Nga, Pasak pasang iek ruak kik ban Rạch Giá brei thau dom cuang kandah, tavak tavaiy tuk uranaih umo 15 thun njaom HIV tapa jalan tình dục. Bác sĩ Lưu Thị Quỳnh Nga: "Dom menuac praong njaom HIV ye hatai sahneng hu tani tanat, min dom uranaih umo ala 15 thun njaom HIV ye kol nyu biak huac. Hu dom adei khan brei amaik ame thau saong hu amaik ame ba nao dut iek. Hu dom adei kayua mebuk hatai bruk sang danaok, nao tui kol tình dục đồng giới, tok hadei di sa melam ye njaom mbak HIV..."

Uranaih umo ala 15 thun  njaom HIV tapa jalan tình dục – jalan ndih daok haong gauk, jeng daok lac kan kandah mblo tabiak di rilo puk palei. Bác sĩ CK1 Vương Thế Linh, Akaok khoa HIV, Pasak pasang iek ruak kik tỉnh Bình Dương brei thau, tukvak tapa, tỉnh ini hu 2 uranaih likei njaom HIV tuk umo bahrau 14 thun kayua tình dục đồng giới. Dom adei jeng huac urang thau drei saong bruk njaom HIV di drei. Daok gah chức năng, meyah ngak njauk tui dom adat, hukum urak ini, lac biak kan piah ba dom adei umo ala 15 thun nao dut iek piah thau tantu cambaih laih, jeng yau piah taong ruak: “Bruk dut iek piah thau cambaih saong taong ruak ka dom urang ruak ini gaok biak rilo kan kandah kayua dom adei oh khin brei sang di drei thau, abih di nyu lac dom adei njaom HIV tapa jalan tình dục đồng giới nam. Dalam tuk nan, tui adat hukum urak ini, urang meng ginup 15 thun tagok meng eng drei nao dut iek HIV hu, daok meyah umo ala 15 thun ye brei hu amaik ame atau urang khik iek nao tui.”

Anak bruk ini, Thạc sĩ Cao Kim Thoa, Akaok Jabat pacang caga  HIV/AIDS (Mintri Y tế) brei thau, thun 2020, Hukum pacang caga HIV/AIDS pasiam veik hu patrun umo thun uranaih hu quyền ieu likau sang iek ruak dut iek brei thau cambaih HIV meng umo 16 thun trun 15 thun tagok. Min tal urak ini, dom ramik veik ini oh daok lagaih, tuk hu dom uranaih umo ala 15 thun njaom HIV tapa jalan tình dục.

Tui yaok pataom di Mintri Y tế, 6 bilan akaok thun ini, tapa dut iek mboh hu jaik 7000 urang njaom HIV, dalam nan hu labaih 70% njaom mbak tapa jalan tình dục oh salamat saong labaih 80% lac lakei. Dom tavak tavaiy dalam adat hukum urak ini daok ngak ka bruk pandik harao di uranaih umo ala 15 thun njaom HIV kan duah hu jalan tabiak, daok eng drei duh hatai dalam bhap bini./.