Tijuk bilan tapa, abih tih tanut pablei le pandap panda saong jien mek tame meng bruk blei pandar di TP.HCM tagok labaih 10% dut saong tukvak ini thun blaoh, taeng bilan 7 tok tagok 4,3% dut saong bilan dahlau. Tui panuac di rilo doanh nghiệp, makna lac kayua prein blei pandar biak suai saong oh hu yau hatai caong. Kayua lac, kinh te jeng ka oh abih kan kandah, nan ye urang pandar jeng cai pandar kali kalih jang. Ong Nguyễn Đức Hưng- Yam ndok Công ty Napoli coffee brei thau, 7 bilan tapa, jien mek tame meng bruk pablei salih pandap panda di doanh nghiệp trun 40% dut saong tukvak ini thun blaoh: "Dahlau deih, tuai sa bilan manyum labaih 20 ly cà phê ye urak ini sa bilan trun daok 12 ly. Tukvak ini, urang blei pandar jeng kali kalih dalam bruk cai pandar nan ye dom quan caphe, tiem pablei salih pandap pandar yaok harei, siêu thị... prein blei jeng trun khang. Doanh nghiep jeng jhul khang bruk pachreih urang blei meng rilo jalan khau tin, maketing… piah ngak jeng bruk bhian randap blei salih bahrau".

Tui ong Hà Ngọc Sơn, Phó Tổng Yam ndok Tổng Công ty Pablei salih Sài Gòn (Satra), yaom lac yaom kadung pandap dalam dom sieu thi jeng daok di tanut samu dut saong tukvak ini thun blaoh, min kayua daok njauk laik yaom nan ye anak mata oh hu patagok. Tuai jeng tok pataom prein tame blei pandap pandar yaok harei. Piah jhul khang prein blei meng urak ini tal puac thun, Satra pambuak haong dom doanh nghiệp, gah pabak peih ngak 14 danak dak khuyến mại, dalam nan tukvak tabung glaong lac tuk lễ Harei negar 2/9 saong Tết Dương lịch. Ong Hà Ngọc Sơn caong lac:

"Sở Công thương njauk peih ngak danak dak khuyen mai praong haong tukvak katut jang, dalam 1 bilan, mateh bilan atau sa adit, min khuyen mai yau gauk. Gam haong nan, Sở hu danak dak pathau khan praong ka taong abih urang blei pandar hu thau tukvak nan lac dom doanh nghiep jeng khuyến mại. Yau nan meda ngak brei pambak tabiak ye tuk nan meng hu kein laba, siam lagaih ka urang blei pandar saong gam hu kein ka doanh nghiệp".

Piah jhul khang bruk dui pachreih blei pandar dalam taneh ia, meng ini tal puac thun, TP.HCM meda peih ngak 2 mbang khuyen mai praong. Labaih 60 doanh nghiep praong di ban raya hu mbaok tame meda hu adat pandar trun yaom bier abih tagok tal taong abih yaom di pandap. Ong Nguyễn Minh Hùng, Phó Akaok Jabat khik ramik pablei salih, Sở Công thương TP.HCM brei thau: "Drei meda pataom prein tame trun yaom rilo abih, min khang hatai oh trun chat luong. Nan lac makna bo Sở Công thương Ban raya saong Ủy ban Mặt trận negar ban raya ba tabiak peih ngak “tích hijao bruk ngak”, pambuak gauk pasang iek chat luong pandap panda. Kapul dang akaok dui tui danak dak ini lac dom he thong parabha".

Piah patagok kein lagaih di danak dak khuyen mai pataom gauk, dui pachreih bruk cai pandar, ong Bùi Tá Hoàng Vũ- Yam ndok Sở Công thương TP.HCM brei thau, Ban raya daok peih ngak gam gam dom danak dak pambuak gauk brei masaiy piah patagok prein ngak saong maraik gauk di doanh nghiệp. Gam tui di nan, Sở jeng meda pambuak bruk cung cầu, pambuak bruk haong dom tinh, ban gah maraong negar piah peih ngak danak dak: "Taphia di bruk khuyen mai ye kol dahlak daok patui veik peih ngak dom jalan langyah piah daong ka doanh nghiep dalam bruk ngak, meng bruk pambuak haong phun jien, pachreih bruk pablei salih, pambuak gilang paraik saong doanh nghiệp. Taphia di nan, Ban raya daok hu Danak dak pambuak haong dom tinh, ban meng nan dom doanh nghiệp di Ban raya tapa danak dak ini piah cak rok patagok darak pasa pablei lẻ, parabha pandap panda ngak tabiak meng TP.HCM".

Pachreih bruk cai pandar dalam taneh ia lac sa dalam klau jalan ngak praong bo TP.HCM ba tabiak pamaong tal jalan patagok kinh te thun 2024 meng 7-7,5%. Dom jalan langyah bahrau, njauk ngak dalam bruk dui pachreih cai pandar piah ka doanh nghiep saong rahra gam hu kein laba meda rik tame bruk dui pachreih prein blei di ban raya meng ini tal puac thun./.