Dalam dom herei ini, rilo baoh sang urang Cam Awal daok kuhria caga piah tame bilan iek Ramawan. Dom bruk kuhria caga bhian yau ye puh mblang ramik veik sang danaok, kuhria caga ndap nda kaya mbang brei ka harei bilan eik.

Sang amuk Tồn Thị Mộng Loan daok di palei Dik - Bình Thắng, xa Phan Hòa, huyen Bắc Bình, daok puh ramik sang danaok saong ngak har ginraong ya, baoh kayau saong dom janih ndap nda  kaya mbang karei piah kuhria caga ka harei nao gur jaruah hareik pahacih saong da-a raok amuk akei. 

Amuk Loan brei thau, jeng yau dom thun dahlau, amuk saong dom urang dalam sang jak gauk puh ramik sang danaok piah caong khin taong abih bruk hu siam laghaih jang:

“Dalam dom harei jaik tame bilan eik Ramawan, di dom palei Cam Awar chreih chai sambai bui be. Dom adei sa-ai kamei jak gauk nao darak blei ndap nda kaya ngui mai pandar, ngak har meneng, ndap nda saong blei khan ao bahrau ka uranaih.” 

Daok dom hahlau janeng Cam gah Awal jeng kuhria caga rilo janih, srap gap akhar tapuk harak gal, khan ao saong dom janih ndap piah ngak adat. Ong Gru Sa (Dụng Sa), Po Gru sang megik palei Panat - Bình Thắng, xa Phan Hòa, huyen Bắc Bình, tinh Binh Thuan brei thau: 

“Adat nao mek hareik nan ieu lac sa dalam dom adat njauk ngak peih mbaok ka bilan Ramawan, kayua yaok but pajaih, yaok palei peih ngak. Ngan haong anek taco urang Cam Bani, adat nao mek hareik hu mong yau sa mbang yolyang mai haong ong akaok ong kei. Tamat bih blaoh harei mek hareik, dalam but pajaih jeng hu paling yang kakuh likau mukkei di drei mai mbang Ramawan. Kayua yau nan ye, yaom lac daok nao ngak mbang di pak halei, bruk hagait jeng njauk ramik mai sang nao mek hareik ka mukkei akaok keit.”

Ong Tồn Thất Đình, brei thau, yaom lac diuk rai di tinh Dong Nai min tal bilan Ramawan dalam hatai gilac pandiak, caong khin gilac mai palei:

“Oh yau bilan iek Ramadan di urang Cam Islam nan lac taong abih urang tui ugama thei jeng iek dalam harei luac sa bilan, khik rup ka nyu hacih piah sabahyang, daok dalam bilan Ramawan di urang Cam Bani ye tok hu dom ong car, ong imum tame iek dalam sang megik.”

Dom ong car ong imem lambaok ka bhap bani Awal tame dalam sang megik, bac gal bac katap kakuh likau Po. Bhap bani jeng hu mbang menyum, ngak bruk yau bhian harei dalam luac bilan Ramawan.

 Binh Thuan urak ini hu labaih 40.000 urang Cam, dalam nan hu labaih 20.000 urang Cam Awal. Dom thun tapa, hu bruk sangka daong ba di dom pakat dom gah saong bruk kham merat yam tagok di yaok baoh sang, rai diuk di sa binah rilo mikva urang bangsa takik di dalam tinh Binh Thuan jang yau bhap bani Cam Awal hu salih bahrau biak rilo.

Ong Lưu Văn Bê daok di palei Paanat - Bình Thắng, xa Phan Hòa, huyen Bắc Bình, tinh Binh Thuan khan brei thau:

“Ramawan nan lac harei eik harei raya parong abih dalam thun di urang Cam Awal. Asal di nyu ieu lac adat  di bilan iek Ramadan brei ka urang bini Islam, yau nan min tuk urang Cam taduan mek, gilac peih ngak pasiam jeng sa harei ilamo ndung bak asal karei di drei.”

Kayua yau nan ye, bilan eik Ramawan di urang Cam Bani oh lac tok sa janih bilan eik, bac da-a gal harak, kakuh likau po Aluah blaoh nyu daok hu bruk nao gur mek hareik, mbang mukkei, gam haong dom bruk daoh tamia, padhih di dom palei Cam. Dom kadha nan pambuak gilac haong gauk, ngak ka harei Ramawan hu jeng sa harei biak karei di urang Cam Bani.

Bilan Ramawan oh lac tok hu vaktu ka dom urang dalam but pajaih jum pataom gauk, dhar phol tal ong akaok ong kei, urang menek drei tabiak, bo daok lac vaktu piah pambuak pagam bhap bani Cam Awal haong gauk piah jak gauk yam tal dom kadha siam gheih dalam raidiuk saong piah khik ramik veik ilamo, asal biak karei di urang Cam pak di bhum taneh riya ini./.