Jit ruak ngak ka dom pandap panda karei di mik va bangsa njauk kreih pabah mbang

Ngak bruk di mBan đại diện urang Cam Islam An Giang, yaok harei taom gaok rilo mik va, saai Sity Hara, xã Khánh Hòa, huyện Châu Phú, mboh hu bruk gleih glar di mik va tuk jit prong  COVID-19 tamuh tabiak. Jit ruak tamuh khang, bruk pacang veik ngak ka mik va  Chăm nao ngak mbang atah njauk mai veik palei, nan ye, gaok biak rilo kan kandah. Meng hatai abih drei ka bhap bini, thun 2021, saai Sity Hara hu jak ba dom urang ngak pahla  rik dong hu labaih  7 tỷ đồng , piah dong ka dom sang gaok kan kandah. Langiu di nan, saai Sity Hara jeng pataom hu labaih 300 triệu đồng piah dong ngak lisei huak, pandap mbang, ia menyum ka mik va dok dalam labik brei dok karei, pacang caga jitCOVID-19: “Dalam tuk jit Covid-19 tamuh khang di  Việt Nam,  mboh hu bruk kan kandah di mikva, abih di nyu nan lac urang kan kathaot. Ngan song dom urang kaya meda, 1kg rilaow limo  atau sa boh sang ye nyu biak mbuan; daok ngan song urang kathaot nan lac abih rai urang jeng oh padang hu sang. Kayua yau nan ye, drei kham merat siam di abih, piah dong ka bhap bini di drei”.

Xã Châu Phong, ban sit  Tân Châu lac labik hu urang Chăm daok rilo abih dalam  tỉnh An Giang ngan song jiak 1.100 sang. Anak bruk rah tabiak kan kandah di jit Covid-19, tuk vak tapa, karja pak ni pambuak bruk khang kajap song  m Ban đại diện urang Cam Islam, dom hakiem, na-ib, tuan tuan, urang hu angan je dalam bhap bini jhul khang bruk pathau khan , paglong hatai sahneng ka bhap bini dalam bruk pacang caga jit. Rilo bruk hu makna cambaih laih hu peih ngak yau “Labik pablei pandap 0 đồng”, “Sruh radaih 0 đồng”, “Sruh radaih anit ranam” pabak pandap mbang ka mik va Chăm. MBan đại diện urang Cam Islam An Giang jak ba hu labaih 14 tỷ đồng piah daong ka urang kan kathaot, urang gaok kan kandah ka sang dok …Kuhria dalam mbang jit ruak ka 4, mBan đại diện jak ba hu labaih  1 tỷ 300 triệu đồng, dalam nan hu jien song pandap mbang, pandap pandar yaok harei piah dong ka rahra kan kandah, kapul urang labik pacang jit.

  Ong Nguyễn Văn To, Paok akaok UBND xã Châu Phong brei thau:“Jit ruak ngak kan kandah trak tal rai duik di urang Chăm, abih di nyu lac rilo palei ngak  di urang Chăm yau : menyim khan bai, tung lomo song dom pandap panda karei di mik va bangsa njauk kreih pabah mbang. Min, hadei di tuk peih bruk pacang caga jit, dalam siam mekre bahrau bruk pablei salih di mik va meda hu siam jang. Dalam tuk Tết ni, dom pandap panda di urang Chăm mek hu angan di OCOP như: tung lò mò, lạp xưởng, bò viên, ahar…hu tagok siam”.

Tui ong So Ro Les, Akaok jabat bangsa di UBND ban sit  Tân Châu, pren khang di mik va bangsa Chăm daok di  Châu Phong lac bruk ngak meng tangin  yau : menyim, pet…gam song bruk patagok du lịch. Min, luac 2 thun kan kandah di jit COVID-19, palei ngak brei padeih ngak ka rai duik di mik va gaok rilo kan kandah. Piah dong ka mik va patagok pren khang ka bruk menyim khan bai  song patagok du lịch, thun 2022 ni dom danak dak dong ka palei ngak hu peih ngak. Ong So Ro Les daok brei thau lac, danak dak ni hu rami ramik veik palei ngak, pambuak gauk khang kajap song peih ngak hu kein laba dom prein khang hu blaoh nan. Bruk prong di abih lac bhap bini hu patao bruk ngak biak siam. “Meng danak dak ni, mik va bangsa meda patagok. Kayua mik va hu pato pakai, pasram megru ngak  du lịch. Kayua lac tuk danak dak kapan  Châu Đốc hu padang tabiak, meda hu sa tua du lịch, gam hu palei Chăm. Cong khin rai duik mik va bangsa hu patagok, dui tui biak rilo palei ngak karei. Kayua gah mik va Chăm hu menyim khan bai tuai du lịch biak takre, dui tui rai duik hu patagok.”

Meng dom bruk ngak siam lagaih, kein laba di mBan đại diện urang Cam Islam tỉnh An Giang, danak dak dong patagok kinh tế di karja pak ni brei ka bhum urang Chăm, cong khin lac thun 2022 ni, rai duik di mik va hu siam mekre jang./.

Urang lang: Hani Pha - 29/01