Nao rivang bruk pala li-u gam haong raong ikan di saai Tạ Văn Thuyết, urang Cam ngak nong daok di xã Phan Hòa, huyện Bắc Bình meng mboh hu prein yava di saai Thuyết buh tame pak ini rilo yau habar. Saai Thuyết brei thau, hadei di rilo thun ngak padai gaok cuang kandah, thun  2018, di mblang taneh praong 3 sào bhian njauk ia ndauk, saai pala 110 phun li-u xiêm dứa, pandar dom labik taneh saoh dalam bein li-u kuac rok danao raong ikan piah patagok jien mek tame ka sang. Bruk ngak ini hu daong ka saai Thuyết pandar ia dalam danao piah pruh ka bein li-u, saong li-u hu pacang halui ka danao ikan nan ye ikan praong samar saong brei nang suat glaong jang.

Hadei di 5 thun pala saong sangka iek glang, tal urak ini, bein li-u di saai brei paik baoh hu 2 thun ini mai, tui kuhria yaok phun hu meng 70 tal 80 baoh, di darak pasa pablei yaok baoh 8.000 tal 10.000 đồng saong biak mbuan pablei. Pala li-u phun jien blei pajaih, khak drak oh rilo, takik prein sangka, bo jien mek tame tani tanat. Saai Tạ Văn Thuyết, xã Phan Hòa, huyện Bắc Bình, tỉnh Bình Thuận ndem lac: "Hadei di tuk paik baoh dahlak mboh bruk pala ini jeng hu, pala li-u hu laba glaong. Tuk drei pala li-u, drei kuac rok danao piah mek ia pruh ka li-u. Blaoh pandar ia dalam danao nan drei raong ikan duah jien mek tame, raong pabak manuk, ada. Sa thun drei mek hu jien pablei ikan jaik 20 triệu, daok li-u pala 2 thun meteh paik hu baoh, pala 3 sào hu 110 phun li-u, phun jien buh tame tuk camriep jeng takik min".

Siam lagaih di phun li-u xiêm dứa lac baoh biak rilo, ia bingi pahe di dứa nan ye hu rilo urang takre. Li-u xiêm dứa tuk paik baoh oh ndik tagok, meng tuk pala tal tuk paik baoh jeng katut jang dom janih li-u phun glaong karei labaih 3 thun. Mayah dut saong phun padai yau dom thun dahlau deih di sang, ye pala li-u lahaiy jang, hanjul jang min jien mek tame glaong jang, pala sa mbang jien mek tame rilo thun. Langiu di nan, saai daok pandar mblang taneh mbaok ia di dom danao dalam bein piah raong ikan. Dua thun ini mai, meng hu jien mek tame meng pala li-u saong raong ikan bo daong ka sang saai Thuyết hu tani tanat raidiuk, raong anek nao bac hu tal labik tal dhua.

Dom thun tapa, oh lac saai Thuyết bo rilo urang nong Cam daok pak xã Phan Hòa, thei jeng kham marat salih janih phun pala, athur raong, takre roh duah, bac taa meng dom kadha pachreih nong, dom blah mạng xã hội ka dom jalan ngak bahrau siam lagaih piah pandar di mblang taneh di palei drei, rik tame parilo dom janih phun pala, athur raong dalam xa harat urang Cam ini. Taeng bruk pala li-u, raong ikan di sang saai Thuyết oh caong hu rilo phun jien buh tame, ilamo pala mbuan, oh abih rilo prein yava saong tukvak, min jien mek tame tani tanat, nan ye hu kapul urang ngak nong di xã pachreih pala rilo. Ong Thổ Tiến Dô, Phó akaok kapul urang ngak nong xã Phan Hòa, huyện Bắc Bình brei thau: "Kapul urang ngak nong xã hu ba tabiak jalan cak rok patagok danak dak urang ngak nong ngak mbang, pala drak, pablei salih naih joi yaok thun, tapa bruk peih ngak trun tal urang dalam kapul, rilo urang nong kham marat hu mbaok tame salih janih phun pala yau ye phun panat, pala li-u, rilo urang dalam kapul eng drei bac megru, bac tapa tapuk, siphau. Tal urak ini hu rilo mblang taneh pala phun hu brei paik baoh, daong pasiam raidiuk dalam sang".

Piah palagaih ka bruk mek ia dalam danao raong ikan pruh ka bein li-u, saai Thuyết hu ngak tabiak sa sruh gilai mac sit hu caik nding pruh ia, meng hu sruh gilai mac pruh ia ini, saai patak pataom hu biak rilo tukvak pruh ia ka bein li-u, piah pataom prein tame ngak bruk karei dalam sang. Saai Tạ Văn Thuyết khan lac: " Ikan praong tagok siam jeng kayua nyu daok dalam halui, la-u dak praong ye ikan dak halui, drei blei pandap mbang ginup nan ye nyu praong samar. Gilai pruh ia ini drei sahaneng blaoh ngak tabiak di pak sang, piah pruh ka bein li-u, piah trun manieng prein ngak, pruh tui jalan ini nyu pruh hudua gah, nan ye trun prein pruh biak rilo, bhian drei buh prein tame pruh luac var, hu gilai ini drei pruh tok sa maong min lac salah bruk, nan ye li-u jeng praong tagok siam jang".

Tari tareng, kham marat oh huac glaih glar, duah jalan ngak bahrau dalam bruk ngak mbang lac dom bruk bo urang ngak nong urak ini njauk hu, saai Tạ Văn Thuyết, urang Cam daok di xã Phan Hòa, huyện Bắc Bình ngak hu bruk nan, nan ye hu ba mai kein laba ka sang drei. Meng peih ngak hu jak jeng bruk pala li-u gam haong kuac rok danao raong ikan, hu peih tabiak jalan tabiak truh kan kathaot khang kajap ka sang saai saong dom baoh sang urang Cam daok pak ini./.