Khánh Ly Farmstay dui pachreih tuai meng dom pandap mbang meng kan di urang Cam ndung bak ilamu bhum palei 

Palei Cam Tuấn Tú, xã An Hải, huyện Ninh Phước, hu rilo tuai thau tal haong rilo bruk biak karei saong labik ravang me-in biak gheih, dane angan abih dalam taneh ia lac mbon cuah Nam cương. Palei hu labaih 500 sang diukrai rilo meng bruk pala drak, raong glang. Tuai mai tal Tuấn Tú langiu di bruk hu mbaok tame danak dak daoh tamia, ba drei tame bruk ngak mbang ngak huak yaok harei haong bhap bini daok pak nan yau ye: pala njam hacih, brei pabe, pabo mbang…, daok hu maong iek, ba drei tame haong langik tasik hacih sa-at saong thaot binguk di mbon cuah Nam Cương. Tapa nan, daong ka urang var nao dom glaih glar di raidiuk yaok harei.

Bahrau ini, sa-ai Vũ Thị Hương, urang dalam Kalup kapul nhiếp ảnh nghệ thuật Du Mục Hà Nội haong 10 ayut di drei mai tal mbon cuah Nam Cương piah ravang me-in saong thaot binguk nghệ thuật. Yaom lac, ini mbang ka 2 sa-ai mai veik, min langik tasik siam saong thaot binguk dom kumei dara Cam mekre meta dalam blah ao tah Cam meng kan, dom tuk hu ba drei nao pala njam, brei tapon pabe, pabo mbang…, labik ini jeng daok dui pachreih sa-ai yau mbang camereip. Gam haong nan, meng dom harei daok haong bhap bini, hu daong ka sa-ai saong dom ayut thaot hu rilo blah thaot nghệ thuật hu yaom glaong saong mek hu giải di dom mbang pakacah thaot binguk nghệ thuật dalam taneh ia saong langiu dunya. Sa-a Hương khan lac: “Pak ini ngak bruk biak gheih, di labik mbon cuah ini jeng biak mekre. Mbon cuah saong rup binguk di urang kumei Cam nao angaok cuak maong biak mekre. Gah du lịch biak dui pachreih. Kol dahlak mai tal ini tuk halei jeng khin thaot, hu menuac thaot piah hadar veik, hu menuac ba nao pakacah saong parang iek dom blah thaot di drei … piah yaih khan bruk gheih mekre di Ninh Thuận brei ka rilo menuac thau.”

Du lịch cộng đồng daok tagok khang saong ba mai kein laba biak rilo ka dom sang urang Cam daok di palei Tuấn Tú jeng yau bhum urang Cam Ninh Thuận meng bruk pambuak gauk biak gheih di du lịch haong yaih khan ilamu bangsa.

Lac urang ba jalan ravang me-in di palei Tuấn Tú, urang “mẫu ảnh nghệ thuật”  ka dom kapul tuai du lịch dalam saong langiu taneh ia tuk mai ravang me-in, sa-ai Châu Thị Thùy Vân brei thau: yaok bilan, sa-ai taduan raok jaik 10 kapul tuai mai ravang me-in, yaok kapul meng 8-10 urang. Kuhria rah tapa, yaok sa tour ravang me-in, ba drei tame pala njam, iek tapon pabo saong thaot binguk lưu niệm angaok cuah... dalam 2 tal 3 mon, sa-ai Vân hu bayar brei 300 rabau tal 400 rabau đồng sa mon. Meng nan, jien duah hu di sa-ai jeng tagok biak rilo. Sa-ai brei thau:“ Ngak hagait tuai damuai jeng takre bruk nan. Ka sa lac drei njauk thau cambaih ilamo, thau mek thaot binguk biak ghieh..”  

Di palei Cam Hữu Đức, xã Phước Hữu, huyện Ninh Phước, tỉnh Ninh Thuận, palei hu thau tal lac labik tamuh tabiak ilamu bangsa Cam. Urang Cam pak ini hu khik ramik saong cakrok dom yaom glaong ilamu Cam meng kan yau ye: dom rija, roya, dom adat cambat tanarakun di bangsa. Gam haong nan, pak ini jeng hu rilo nghệ nhân ngak alat ragam bangsa yau ye: Ginăng, Paranưng haong Saranai. Tuk rah tabiak dom rija, roya di bangsa atau dom harei Lễ, Tết, dui pachreih hu yaok ratuh rabau tuai dalam saong langiu taneh ia mai ravang iek, duah thau ilamu hadah krah. Patagok prein khang hu bloh nan, rilo sang urang Cam pak ini thau pagam pambak tame kein lagaih di palei piah cakrok bruk du lịch yau: padang dom tour, tuyến, labik ravang me-in saong sang daok homestay piah dui pachreih tuai damuai.

Padang tagok hu labaih 2 thun ini mai,  Khánh Ly Farmstay – labik hijao di sang sa-ai Đàng Thị Saly hu rilo tuai thau tal, kayua nyu la-an bingi dalam baoh sang Cam meng kan bo daok dui pachreih tuai meng dom pandap mbang meng kan di urang Cam ndung bak ilamu bhum palei yau: ia bai tapung, ralow takuh hamu xào hăng, ralow pabe kahon mbang haong njam (rau ghém), ia bai ralow menuk…Sa-ai Saly khan lac:“Tuai mai pak ini biak takre dom pandap mbang meng kan di bangsa Cam…”

Dom thun dahlau daih, bhum urang Cam Ninh Thuận bahrau hu dom labik ravang me-in, rilo meng lac dom palei ngak meng kan, ye urak ini, labaih 20 palei Cam dalam tỉnh jeng hu meng 4 tal 5 labik daok ka tuai mai ravang me-in, du lịch sinh thái, labik du lịch tâm linh…dui pachreih yaok rabau tuai du lịch saong ngak ka tuai kan var hu. Kayua lac, tuk mai tal dom labik ini, tuai oh lac hu ba drei tame bruk ngak mbang ngak huak yaok harei, bo daok thau jang ka dom yaom glaong ilamu hadah krah saong biak rilo janih di urang Cam Ninh Thuận. Sa-ai Nguyễn Thị Lan – urang tuai mai meng ban raya Hồ Chí Minh brei thau: “ Mai tal Phan Rang dahlak hu ayut ba nao daok haong sang di urang, nan lac 1 baoh sang urang Cam oh ka bhian randap kayua mbang camereip abih dahlak hu taom gaok urang Cam. Drei hu mboh di anak meta dom pandap mbang bo drei mbang yaok harei hu urang pala, iek glang yau habar? Glaih glar yau habar? Hu daok la mala pandiak paik dom njam meda…mboh biak chreih chrai”.

Tui bruk tuai du lịch caong duah veik dom yaom glaong hu meng langik tasik pambuak haong ilamu pak nan, anak tal oh atah, jia lac du lịch cộng đồng di dom bhum bhap bini Cam hu cakrok khang kadang, ba brei rilo bruk hit ngak mbang saong ba jien tame ka bhap bini tapa dom bruk duh ka tuai mai ravang me-in, pasiam veik saong ngak tabiak dom pandap thủ công mỹ nghệ meng kan, pandap mbang huak saong đặc sản di palei, Tapa nan,  Du lịch cộng đồng hu rik daong khik ramik saong cakrok dom yaom glaong ilamu mboh saong oh mboh di meta, khik caga môi trường sinh thái môi trường xã hội  di puk palei./.

Urang lang: M. Phương – 06/03