Nan ye, yaom lac daok atah di gauk yaok ratuh, yaok rabau mbaik jalan min meng hu smartphone, urang jeng mboh yau hu daok biak jaik taphia gauk tapa mbang ieu video. Kadha vak “Urang Cam uan raok Harei Negar dalam zaman số” di Jasi – urang vak di rayo sap ndom Viet Nam daok di TP.HCM hu daong ka kol drei thau cambaih jang ka bruk ini:

 Mai dom palei urang Cam tỉnh Bình Thuận dalam dom harei caga raok Harei Negar 2/9 thun ini, băng rôn khẩu hiệu hu tuan bak dom canah jalan, sang halei jeng tual hala dok taneh ia, bruk bui sambai chreih chrai hu mboh cambaih di angaok mbaok yaok rahra.

 Ong Thông Đinh Phụng, sa urang Cam daok di palei Lâm Thuận, xã Hàm Phú, huyện Hàm Thuận Bắc, tỉnh Bình Thuận brei thau, Harei Negar 2/9 lac tuk piah brei mboh hatai thau dhar phor Đảng, thau dhar phor Chủ tịch Hồ Chí Minh, thau dhar phor Rajaei hu ba mai độc lập, tự do ka bhap bini dalam taneh ia, jeng yau ka urang Cam. Raidiuk di mikva Cam palei Lâm Thuận hu yau harei ini meng hu sarak di Đảng, hukum di Karja:

Dalam dom harei ini, taong abih bruk puh cakak di mikva dalam palei jeng brei padeih, mikva caik tukvak ka dom bruk bui sambai uan raok Harei Negar. Harei Negar thun ini hu padeih 4 harei, ini jeng lac tuk piah ka bhap bini dalam palei mai ravang gauk, tadhau yuh gauk dom siam mekre saong daok la tapen dom salao pandap ba gauk mbang menyum bui sambai.

 Anai kamei Đặng Thị Noel daok di xã Phan Hiệp, huyện Bắc Bình, tỉnh Bình Thuận brei thau, thun halei sang sa-ai jeng chreih chrai cang tal Harei Negar piah nao palei ngoại daok di tỉnh Ninh Thuận, nao ravang gauk gar dalam but pajaih, biak bui sambai, chreih chrai. Min thun ini, yaom lac Harei Negar hu padeih rilo harei, min sa-ai oh ba anek nao palei ngoại me-in.

Ong Đặng Xuân Lộc, pasang likei di anai Noel brei thau, yaom lac oh ba anek nao palei, min zaman số, tok ieu video, dom anek di ong Lộc jeng mboh hu bruk bui sambai, bruk anit ranam gauk dalam sang di drei:

Urang Cam tỉnh Bình Thuận hu labaih 8.300 sang gam haong 42.000 menuac, meblah 3,26% menuac sia dalam tỉnh, dang ka 2 duk haong urang bangsa Kinh. Urang Cam daok di 9 palei pablak gauk saong 4 xã harat urang Cam lac: Phan Thanh, Phan Hiệp, Phan Hoà di huyện Bắc Bình saong xã Phú Lạc di huyện Tuy Phong. Urang Cam labik ini rilo meng tui agama Bà-la-môn saong Bà-ni. Harei praong dalam thun di urang Cam pak ini, lac Katê saong Ramưwan.

 Hu bruk sangka di Đảng saong Karja, raidiuk di bhap bini dak harei dak cakrok patagok, nan ye langiu di bruk mbang Tết meng kan di bangsa, mikva Cam jeng hu ba drei tame bui sambai haong dom harei lễ, tết di taneh ia. Abih di nyu lac Harei Negar, kayua ini lac tuk caik ka bhap bini brei mboh hatai thau dhar phor Đảng, Wa Hồ meblah hu độc lập, tự do ka bangsa.

Amuk Văn Thị Kim Nương, urang Cam daok di xã Phan Hiệp, huyện Bắc Bình brei thau, dalam dom thun jaik ini, sang amuk maong Harei Negar yau ye harei Tết Độc lập. Kayua ini oh lac tuk piah taom gaok gauk, bo daok patagok bruk jum pataom di dom bangsa adei sa-ai. Gam haong nan, daok pato pahadar rai ranaih thau anit ranam tự do saong mboh hadah mbaok mata ka bangsa.

 Amuk Nương daok brei thau lac, zaman ini kong nghe thong tin cakrok, ngak ka menuac sia mboh hu jaik taphia gauk jang. Tuk uan Harei Negar 2/9 ini, 2 urang anek di amuk oh mai ravang sang hu, min meng ieu video, amuk meda mboh hu dom anek di drei:

Tal urak ini, jalan talei cáp quang, internet, phone pan tangin saong phone daok sa labik hu pabak ginup tal taong abih dom puk, palei, dom xã bhum urang Cam, oh lac daong dalam bruk cakrok ngak mbang, pablei salih, bo mạng xã hội jeng daok lac talei pambuak yaih khan kaya pandap meng kan, bruk ngak ilamu, daoh tamia dalam dom harei lễ praong, jhul patagok du lịch di bhum urang Cam dalam tỉnh Bình Thuận. 

Meng makna biak praong glaong saong biak ginreih, Harei Negar nyu jeng sa harei bui sambai, bak makna dalam raidiuk di bhap bini urang Cam./.