Labaih 10 thun dahlau, sang sa-ai Nguyễn Văn Linh daok di palei Khe Giềng jeng daok tui jalan ngak meng kan di ong muk amaik ame, tame glai jah puh pala padai. Tal thun 2007, tuk mboh rilo sang pala quế, sa-ai jeng khang hatai buh jien tame pala quế di mangaok taneh puh di sang daok klaak saoh. Hadei di rilo thun kak kajap haong quế, raidiuk sang sa-ai Linh saong rilo sang dalam palei hu salih karei biak rilo, oh lac tabiak truh kan kathaot bo daok hu labaih jien padai, drap ar. Jalan daok kuhria ngak di thun 2023 ini di sang sa-ai lac blei radaih ô tô saong buh jien brei ka anek ngak mbang tuk anek abih tukvak nao nghĩa vụ di tapon nyaom bol pan phao kraong, mai veik sang: " Ngak glaih glar luac thun, thun ini sang jeng hu jien mek tame rilo, nan ye mbang Tết bui sambai, chreih chrai jang. Sang brei ngak sa drei pabui praong 70kg ngak 15 salao lisei piah da-a but pajaih, puk paga saong ayut sahabat mai mbang me-in. Daok Tết blaoh lac hu me-in dom kadha meng kan di bhap bini yau ye đá cầu, dui brak, hu mbaok tame dom bruk daoh tamia uan đảng, uan xuân di xã bui sambai lo".

Xã Quang Minh, huyện Văn Yên, tỉnh Yên Bái hu labaih 84% urang bangsa Dao. Dahlau daih kayua pala drak tui jalan klak oh lagaih nan ye raidiuk di mikva kan kandah lo. Min dom thun jaik di ini, meng hu phun quế, raidiuk mikva jeng yau mbaok meta palei pala hu salih bahrau biak siam. Kadha ini hu brei mboh tapa bruk mikva rik daong hu labaih 25 tỷ đồng piah padang ngak palei pala bahrau, dom jalan palei hu peih praong saong hu tuh bê tông. Urak ini xã hu labaih 72% sang hu sang danaok padang ngak khang kajap, jien mek tame kuhria rah tapa hu jaik 50 triệu đồng sa urang, dalam xã tok daok 78 sang kan kathaot.

Ong Triệu Quý Đức, Chủ tịch UBND xã Quang Minh, huyện Văn Yên brei thau, dalam xã urak ini hu labaih 18.500 héc ta quế. Phun quế hu ba mai ka mikva dom bilan xuân trei sir, bui sambai: " Trieu Quy Duc. Ct xa Quang Minh: "Dahlau daih mikva pala tui jalan klak oh lagaih nan ye hàm lượng menyek jeng hu takik. Urak ini xã hu pambuak bruk haong doanh nghiệp pato pasram ka mikva ilamu pala, iek glang phun quế tui jalan hữu cơ nan ye hàm lượng menyek nyu tagok, pandap pablei hu yaom glaong jang".

Meng labaih 81 ribau héc ta, meblah labaih 1/3 taneh glai pala di tỉnh Yên Bái; ta-eng huyện Văn Yên urak ini hu labaih 55 rabau héc ta, dom thun tapa, phun quế hu jeng phun patruh eik, patrun kathaot, daong ka bhap bini yam tagok ngak kaya meda.

Kuhria dalam thun 2022, huyện Văn Yên hu pabak ka dom puk palei dalam saong langiu tỉnh 55 triệu phun quế pajaih; mek hu 6 rabau tấn kanduh quế sa thun, labaih 65 rabau tấn hala, dhar quế ka dom labik ngak menyek, ba mai labaih 800 tỷ đồng. Quế jeng hu ba bruk ngak tani tanat ka yaok pluh rabau urang ngak dalam palei. Daok jalan patagok phun quế khang kajap, ong Hà Đức Anh, Chủ tịch UBND huyện Văn Yên, tỉnh Yên Bái brei thau:  "Kol dahlak daok iek phun quế lac sa dalam dom janih phun pala praong di huyện. Padang bhum quế hữu cơ piah ngak tabiak dom pandap quế siam di abih, pabak hu darak pasar pakat glaong, dui pachreih urang blei, ngak rilo pandap meng quế, abih di nyu lac dom pandap pablei tapa darak pasar châu Âu; pilih ruah pajaih hu chất lượng glaong ba tame pabam pajaih, pasiam pajaih hu yaom biar tapa pajaih hu yaom glaong jang..."

Meng bruk sami samar di mikva, bruk sangka di pakat ủy Đảng saong Karja palei, phun quế hu jeng phun pala praong di mikva urang Dao jeng yau di rilo puk palei dalam tinh Yên Bái. Quế daok ba mai raidiuk trei sir, haniem phul, ba mai dom bilan xuân ginup meda ka bhap bini bhum ceik glaong Yên Bái./.