Di harei taom mbaok, ong Mohammed Amine, urang bangsa Cam, brei mboh hatai bui sambai, hadah mbaok ka hatai gul pataom di dom bangsa, gam haong nan jeng brei mboh hatai caong khin ban raya patui sangka jang tal bruk khik ramik saong patagok ilamo bhap bini di dom bangsa:

“Dahlak hulin caong khin taneh ia nagar drei dak harei dak patagok, bol bhap bangsa takik dak harei dak hu raidiuk trei sir saong ginup meda jang. Dahlak hulin jeng hu panuac likau brei khik tani tanat saong patagok khang jang dom danak dak ilamo adaoh tamia bhap bini di dom bangsa takik, jeng yau dom harei adat praong di dom bangsa takik”.

Payua panuac dhar phol tal urang dang akaok Ban raya Ho Chi Minh tuk halei jeng caik hatai sangka iek praong raidiuk di rahra dom bangsa takik, amuk Lý Kim Mai, urang bangsa Hoa, caong takre dalam tukvak anak tal, dam dara dom bangsa takik patui daong dalam bruk bac megru saong patagok bruk ngak mbang karo kajap.

“Hu taom mbaok di harei ini drei mboh biak chreih chrai, bui sambai lo! Njauk ndom mayai lac sarak di Karja drei brei ka urang bangsa Hoa tuk halei jeng hu sangka, rilo dalam nan mboh hu dom kamuan anek saih, sinh vien hu kein lagaih ka bruk bac megru, paglaong ilamo, hu bac magru, harei hadei brei rik daong prein yawa, padang taneh ia palei nagar”.

Gam tame bruk bui sambai saong mikva urang dom bangsa takik di harei akaok thun, amuk K’ Thị Kim Hồng, urang bangsa K’Ho, Bi thu Chi bo Khu pho 26, phuong Linh Xuân, ban raya Thủ Đức ndom mayai lac bruk pambuak pagam, gul pataom gauk di dom bangsa ieu lac asal kadha hu angan makna piah truh tapa kan kandah, ngak ka raidiuk dak harei dak siam gheih jang.

“Yaok thun hu harei taom mbaok yau ini piah grauk urang hu taom mbaok, tangi rivang jirah saong daong prein ka gauk, me-in bui sambai haong gauk piah patagok saong khik ramik ilamo di bangsa, ba gauk rik daong tame bruk patagok di ban raya Ho Chi Minh jeng ye dalam nagar.”

Dalam tukvak masa ndung bak hatai anit ranam di dom harei akaok thun Ula Naih Bak 2025, ong Nguyễn Phước Lộc – Phaok Bi thu Ban uy, Akaok Uy mban Mat tran MT Negar Ban raya Ho Chi Minh hu ndom mayai rilo ka bruk hu makna di hatai gul pataom di grauk bangsa dalam bruk padang saong patagok di Ban raya. Gam haong di nan brei mboh hatai sangka iek praong di urang dang akaok Ban raya Ho Chi Minh brei ka mikva urang bangsa takik, dalam nan sangka iek praong bruk ngak di dom urang hu angan je dalam bol bhap rahra:

“Lambaok vakil ka urang pan akaok Ban raya HCM, akau dahlak hulin taduan, taong yaom glaong 200 urang lambaok wakil labaih 468.000 mikva urang bangsa takik daok di ban raya ieu lac urang yau ye baoh asal pambuak hatai gul pataom dalam bol bhap mikva urang dom bangsa takik saong hu hatai gul pataom dalam bol bhap bangsa drei. Ini lac talei pambuak biak khang kajap di pakat uy, karja palei haong mikva dom bangsa takik, rik daong gheih mekre ka bruk patagok kinh te xa hoi saong an ninh chinh tri, siam mekre salamat di ban raya; padang, pasiam veik saong paglaong prein khang di hatai gul pataom grauk bangsa dalam bruk padang saong pacang khik Taneh ia Nagar”.

Mikva urang dom bangsa takik di ban raya mek angan Wa Ho tuk halei jeng hadah mbaok, chreih chrai anak bruk sangka di dom pakat uy Ndang, karja, mat tran negar ban raya saong pakacah ba gauk rik daong tame bruk cakrok patagok ban raya anit ranam./.