Mik va Cham biak sambai hatai tuk dalam palei hu rilo urang hu angan je 

Hu nao tal palei Cam daok di ấp 4, xã Xuân Hưng, huyện Xuân Lộc (tỉnh Đồng Nai) ye oh klah di tatuak drei anak bruk salih bahrau biak samar drah di puk palei labik ini. Sang danaok praong, siam, jalan hu tuh bê tông tapak, mekre, hu bingu hadah dua gah jalan. Raidiuk sron mbon, oh hu menyum alak, me-in mbia… Taong abih lac meng hu bruk jum pataom gauk, anit ranam gauk di mikva saong bruk kham merat di mban jamaah Hakim, abih di nyu lac di ong Hakim AB-ĐU-HA-MIT.

Lac urang hu angan je dalam bhap bini saong hu hatai sahneng duah bharau, ong Hakim AB-ĐU-HA-MIT hu daong ka mikva salih bahrau jalan sahneng, jalan ngak piah yam tagok dalam raidiuk bharau. Ong jak ba mikva salih phun pala, janih raong, pandar ilamu bahrau tame pala drak, raong glang. Daok ngan saong dam dara, ong hakim jak ba nao bac bruk ngak piah duah hu bruk ngak tani tanat. Tuk raidiuk hu tani tanat, mikva chreih chrai hu mbaok tame dom bruk di palei. 

"Mboh mik va ngak mbang patagok rai duik siam mekre...         

Hu labik dang praong dalam bhap bini, dom urang hu angan je oh lac jak ba mikva ngak siam yaok bruk pakacah gauk, bo daok ba akaok nao dahlau dalam yaok bruk di palei, thau patagok bruk ngak mbang ka drei saong daong ka mikva puk palei hu tagok haong gauk. Meng kham merat, tari taring, dom thun tapa, ong Thạch Vương, bangsa Khơ me, urang hu angan je daok di ấp Bình Minh, xã Suối Cát kham merat bac megru, ba ilamu kỹ thuật bahrau tame bruk ngak mbang, pala drak, paglaong kein laba. Urak ini, sang ong hu 6 mẫu hamu, pala padai haong tangei, 4 radaih ôtô pajeng pandap, 2 jamriak jan – yuak pambuak gauk... Raidiuk trei sir saong hu ba bruk ngak mbang ka jaik 10 urang haong yaom jien bilan 7 - 10 triệu đồng sa bilan. Ong Thạch Vương daok hu daong phun jien, pajaih, tacei ilamu piah ka mikva dalam palei pasiam dom kan kandah kayua jit COVID-19, patagok bruk ngak mbang, kinh tế.   

 "Dalam jit ruak Covid 19 drei jeng hu daong ka mikva, urang halei kan kandah drei brei nyim jien oh mek laba, daong brah, pandap mbang. Hu mikva caong hu phun jien piah bayar gilang pariak, drei jeng brei nyim oh mek laba."

Umo labaih 70 min ong Sần Chín Sáng,daok di ấp Tân Minh, xã Lang Minh, tuk halei jeng nao dahlau saong kham merat jak ba mikva patagok bruk ngak mbang, patruh eik patrun kathaot, dak padang raidiuk ilamu... Peih ngak danak dak padang ngak palei pala bahrau, langiu di bruk nao tal yaok baoh sang jak ba mikva rik jien saong harei ngak bruk, sang ong hu alin hadiah yaok ratuh m2 taneh piah peih praong jalan palei. Ong sahneng lac drei brei ngak dahlau piah mikva mboh bloh meng pang tui, ngak tui:

"Jalan nao tapa sang drei ye drei njauk alin hadiah taneh. Jalan nao tapa peih praong 3m bo urak ini bahrau hu labaih 1m, drei jak ba mikva yaok sang alin brei 1m. Daok sang hulin brei 5m saong atah 120 m. Hulin daok ngak bruk nan ye brei ba kaok nao dahlau." 

Ong Nguyễn Ngọc Hoàn – Phaok Jabat bangsa huyện Xuân Lộc brei thau: Meng 25 bangsa adei sa-ai daok haong gauk dalam huyện, bruk ngak di urang hu angan je dalam bhap bini lac hu makna biak praong. Ini jeng lac dom urang oh huac kan kandah, glaih glar, nao tal yaok sang, jak ba mikva patagok kinh tế, patruh eik, patrun kathaot, klaak dom adat cambat klak oh daok lagaih; khik ramik, patagok ilamu bangsa, dak padang puk palei jum pataom, sron mbon... Ong Nguyễn Ngọc Hoàn khan lac: urang hu angan je dalam bhap bini bangsa takik yau tangin pambuak tah di karja haong bhap bini:

"Dom urang hu agan je dalam dom thun tapa hu daong ka huyện Xuân Lộc biak rilo. Tuk urang jakar trun puk palei, urang hu angan je dang tabiak ndom biai meng sap di bangsa drei brei ka mikva thau cambaih saong peih ngak siam sarak di Đảng, hukum di karja . Urang hu angan je lac gah tangin pambuak atah di karja tal mikva bangsa takik".  

Ngan saong bhap bini, abih di nyu lac bhap bini bangsa takik, panuac ndom saong bruk ngak di dom urang hu angan je hu pambak khang dalam raidiuk. Dom urang hu angan je dalam bhap bini lac urang lambaok, ba akaok nao dahlau ngak jeng bruk jum pataom, talei pambuak di pakat ủy, karja haong bhap bini, ngak siam bruk jak ba mikva kham merat ngak mbang, khang hatai ba ilamu công nghệ bahrau tame ngak piah daong paglaong raidiuk bhum bhap bini bangsa takik./.

Urang lang: Mousaphuong -21/8