Dom thun tapa, meng abih tih 39 urang hu angan je dalam bhap bini bangsa takik di dom puk palei dalam huyen tuk halei jeng ba akaok nao dahlau dalam bruk peih ngak siam dom jalan ngak, sarak di Ndang saong Kanja; ba akaok nao dahlau dalam bruk klaak dom adat cambat oh daok lagaih; kham marat jak ba rahra hu mbaok tame peih ngak siam dom bruk dalam palei.

Ndem tal xã An Định thei jeng hadar tal ong Danh Liễu (ndih tapui thun 1950), hadei di tuk padeih huu, mboh urang ngak nong gaok kan kandah dalam bruk ngak, abih di nyu nan lac bruk pala njauk, laik yaom, ong dang tabiak padang HTX ngak nong. Langiu di bruk pataom dom urang ngak nong pala drak tui jalan ba gauk trun pajaih, buh khak, njuk pruh ia, yuak padai,… hu nang suat glaong jang, ong daok duah labik pablei hadei di tuk yuak padai piah ka urang ngak nong sahanang hatai pala, ngak. Urak ini HTX kayua ong dang akaok mboh ngak mbang hu tagok, mikva dak harei dak tabiak truh kan kathaot yam tagok ngak kaya mada.

Ong Ngô Thanh Hùng, Bí thư Đảng ủy xã Định An brei thau, meng angan je di drei, ong Danh Liễu hu jak ba dom urang ngak pahla, mikva di dom labik jalan alin taneh, rik jien padai, harei ngak padang ngak bahrau, ngak pasiam veik 6 mbaik tatua, padang 4 baoh sang ka urang kan kathaot saong ngak yaok rabau met jalan palei daong ka mikva nao mai mbuan lagaih.

Ong Danh Liễu brei thau, kayua lac palei bhum atah biyah, nan ye mikva daok gaok kan kandah. Thau hu dom kan kandah nan, ong bhian trun tal yaok baoh sang sua tangi, pachreih ba mikva ngak bruk, rik prein padang ngak puk palei. Sa dalikan biak drut drui tuk ndem tal ong Danh Liễu bo rilo rahra pak ini thei jeng pok manyaom. Sa mbang tuk ong nao trun phum sóc, tal labik ribaong mboh 4 - 5 uranaih sit nao tapa tatua cầu khỉ biak mbuan gaok bala. Tuk nan, ong dang tabiak jak ba chip dom urang dalam sang, gauk gar saong dom urang hu jien dalam palei piah ngak baoh tatua khang kajap brei ka mikva, ranaih sit, anek saih nao bac.

Daok di bhum hu rilo bhap bini bangsa Khmer, ong Danh Đẹp thau lac daok hu menuac hu akaok sahaneng daok bier, rilo adat cambat klak oh daok lagaih jeng ka oh klaak. Jaik abih mikva Khmer tok jia tame dom bruk hagait “mata mboh, tangi pang”,  nan ye dom bruk ba akaok nao dahlau di urang ndang, urang hu angan je lac pachreih ba mikva ngak tui. Kayua yau nan ye, ong tuk halei jeng kham marat ba akaok nao dahlau, kham marat jak ba mikva hu mbaok tame dom danak dak, dom bruk di palei. Lac urang ndang nan ye ong mboh lac drei njauk padang ngak palei pala dak harei dak siam makre, kaya mada jang. Meng nan, tuk hu danak dak, hu bruk hagait peih ngak trun tal puk palei, ong Đẹp jeng kham marat jak ba mikva hu mbaok tame ginup.

Lac xa hu rilo urang Khmer daok, dom thun tapa, dom urang hu angan je dalam bhap bini Khmer xã Thới Quản, huyện Gò Quao hu dom bruk rik daong oh sit gam haong kanja padang ngak puk palei dak harei dak cak rok patagok. Pagap yau ong Danh Điện, daok di puk Hòa Lễ, oh lac kham marat dalam bruk bac, pathau khan dom jalan ngak di Ndang, sarak, hukum di Kanja, bo ong Điện daok abih drei dalam bruk ngak di palei. Puk Hòa Lễ daok hu baoh paha Khmer Cỏ Khía Cũ, rilo thun tapa, ong kham marat pambuak haong paha pathau khan, jak ba saong lac talei pambuak di Ndang haong mikva, meng nan rahra tuk halei jeng jia tame saong ngak tui.

Tui ong Danh Phúc, Akaok Mban Bangsa tỉnh Kiên Giang, dom thun tapa, urang hu angan je hu daong ngak brei talei pambuak bruk di Ndang, Kanja haong bhap bini dak harei dak khang kajap jang. Dom urang ini tuk halei jeng kham marat, duah thau hatai sahneng di manuac sia, duah thau ka raidiuk, bruk ngak mbang, hatai caong di bhap bini dom bangsa piah samar drah pathau khan tal dom jabat chuc nang.

Ong Nguyễn Vũ Huy, Akaok Mban Tuyên giáo Huyện ủy Gò Quao brei thau, meng bruk ngak saong angan je di drei, urang hu angan je dalam bhap bini bangsa Khmer di Kiên Giang jeng yau di huyện Gò Quao, lac talei pambuak khang kajap bruk jum pataom dom bangsa adei saai, daong ngak brei khang kajap jang jalan sahneng di Ndang.