Di labik ngak tabiak pandap panda sit, saai Rơ Châm Awưnh daok di palei Mrông Yố 1, xa Ia Ka, huyen Chư Păh, Gia Lai daok dak caik jammraik hana ca phe barau blei. Sap jammraik chai ca phe tuk lei jang nduac, mbau pahe parang tabiak grauk labik.

Gam haong angan je Jarai Ialy Coffee, saai Awưnh oh tok ngak tabiak ca phe hacih sa-at bo daok jak ba mikva luai pandar jru pamatai hareik, jru kanjah nerak, khik prein yava saong halau ia di ala taneh, ngak tabiak ca phe hacih saat. Ngan haong hatai kham marat saong jie hatai di makna dalam bhap bini, Awưnh hu rik daong prein pok glaong makna  di asal ca phe palei drei, daong ka rai diuk mikva di palei Mrong Yo hu siam makre.

“Kayua dahlau diah mikva oh thau nan oh bac tui, min ralo mbang jang hu manuac pato jalan ngak ga-auk khak, buh khak ka phun ca phe piah patagok siam jang. Mikva pak ni jang bac tui bruk paik ca phe 10 baoh ca phe daok hijao saong 10 ca phe tasak blaoh paghang thu, hana blaoh chai, lai manyum iek pajaih lei bingi jang. Meng nan mikva salih jalan pala, paik ca phe tasak hu siam makre, yau nan ye pabak ca phe drei ngak tabiak hu yaom pablei glaong, gam pabak ka prein yava saong jien mek tame hu ralo ka mikva”. 

Kayua ngak ca phe hacih sa-at siam makre, Tet thun ni mikva palei Brel, xa Ia Der, huyen Ia Grai, hu jien mek tame hu ralo. Urang taha di  palei Hmơnh bui sambai khan lac, ngak ca phe tui ilimo barau, dom thun ni baoh ca phe jang tani tanat. Thun ni, yaom ca phe tagok glaong, hu jien mek tame di ralo baoh sang yaok ratuh trieu tal yaok ty ndong. Hu baoh sang pablei ca phe blaoh hu blei radaih o to, hu manuac ngak sang barau.

“Thun ni mikva ngak nong biak bui sambai kayua ca phe hu baoh ralo saong yaom glaong. Dom baoh sang pablei ca phe hu ralo jien piah blei radaih oto, blei pandar pandap panda chiet jien, hu drap ar  dalam sang. Tukvak anak tal, dahlak jak ba mikva kham marat bac tui ilimo ngak hamu bein, pandap ilimo barau dalam bruk ngak, dahlau abih lac phun caphe, amraik talu, hamu padai piah ka raidiuk mikva hu tani tanat hu jien ralo, rik prein padang bhum palei, nagar dak harei dak ginup mada”.

Tinh Gia Lai ba tabiak bruk khin ngak hu lagaih di taneh pala ca phe jaik 100.000 ha tal thun 2030, dalam nan hu labaih 15% hu ngak tui jalan huu co. Piah ngak hu bruk ni, gah ngak nong hu pasang iek, salih dom bhum ca phe oh daok lagaih, nang suat biar tapa pala dom phun karei mek hu kein laba glaong. Gam haong nan, gah ngak nong daok pathau khan, pasram pato ka mikva jalan ngak pasiam veik dom bein ca phe taha meng dom pajaih barau, hu nang suat glaong saong caga hu ruak halak. Gah ngak nong jang daok ngak tanat nang suat ca phe tui dom tanut dunya.

Kayua hu thau dom tanut ngak ni, asal siam haong makna di ca phe hu pok glaong tagok, daong mikva ngak mada kajap meng phun ca phe, ngan haong nan yaih khan angan jie ca phe Gia Lai di darak pasar dalam nagar saong nagar langiu. Ong Nguyễn Ngọc Có, Phaok Yam ndok So Ngak nong saong Patagok Palei pala Gia Lai khan lac: “Dom thun jaik ini, ilimo di manuac ngak ca phe, dahlau abih lac mikva bangsa takik, hu pok glaong tagok. Mikva hu pandar  ilimo barau tame di bruk ngak tui tanut piah pok glaong baoh ca phe. Kayua yau nan, sang ngak tabiak ca phe taduan blei dom pajaih ca phe ngak tabiak tanur, hu pablei tabiak darak pasar nagar langiu saong ngak tabiak”.