Ngan haong taneh riya di sa tinh bhum ceik hu rilo mikva bangsa takik daok, jeng ye labik hu urang kumei ndih tapui manek anek di sang rilo dut saong bruk kuhria di dalam taneh ia. Peih ngak Danak dak taka 8 brei ka bruk urang kumei saong urang likei samu gauk gam haong bruk langyah dom bruk hu makna ngan haong urang kumei saong uranaih, tukvak ka I 2021-2025, Gia Lai lac sa dalam 10 tinh hu brei ngak dahlau bruk peih ngak 4 paok sarak daong ka urang kumei bangsa takik manek anek salamat saong sangka prein yava ka anek uranaih.

Tukvak tapa, dom pakat kapul hu pambuak haong gah y te peih ngak jaik 100 wan pathau khan ilamo paglaong hatai sahaneng saong jak ba urang kumei manek anek di labik y te, dui pachreih hu labaih 7000 adei saai kumei dalam umo thun daok manek hu mbaok tame. Taphia dom bruk di nan, hu buh tabiak daong ka 361 urang kumei manek anek pak di labik y tế. Tapa dom bruk daong ba ini, oh lac paglaong ilamo, jalan iek glang sangka prein yava ka urang kumei, uranaih bo daok rik tame ba prein khang piah ka adei saai kumei mai tal labik y te piah manek anek saong kham marat hu mbaok tame peih ngak njauk sarak rahra manuac urang. Saai Rơ Châm Alênh, daok pak palei Amơng, xã Ia Mơ Nông, huyện Chư Păh, tỉnh Gia Lai ndem mayai lac:

“Adei hu daong blei tã, blei bỉm ka anek. Tapa bruk nan, ye adei mboh biak uan tabuan kayua gam hu taduan bruk daong ba, gam hu pato tacei bruk sangka ka anek hu ginup. Manek pak di bilai y te xa, anek di drei daok hu klauk jru pacang caga ruak kik hu ginup, hu iek ruak ka anek.”

Tapa bruk peih ngak rilo bruk ngak dom paok sarak daong ka urang kumei bangsa takik manek anek ndih tapui salamat saong sangka ieik glang prein yava ka uranaih hu rik tame paglaong hatai sahaneng ka adei saai kumei brei ka bruk manek ndih tapui anek salamat; ka bruk ieik glang sangka prein yava di amanaik, ka uranaih; adei saai kumei hu pambuak, pandar dom dich vu y te, thau saong sangka anek sit ka nyu njauk. Saai Đinh Ly Ơn, daok pak palei Hek, xã Chư A Thai, huyện Phú Thiện, tỉnh Gia Lai brei thau lac:

“Drei manek sa urang paje, hadei di ini manek anek ka dua veik. Tuk jaik manek drei meda tabiak bilai y tế manek piah salamat ka amaik saong anek. Drei jeng kham marat sangka ka anek nyu khang kadang, hu prein yava.”

Tapa 3 thun peih ngak Danak dak ka 8 di dalam tỉnh Gia Lai mek hu dom jak jeng dalam bruk yah klak dom cuang kandah, dom bruk oh daok lagaih, daok iek glaong urang likei atau kumei, peih ngak siam jalan ba tabiak lac urang kumei saong urang likei samu gauk saong paglaong raidiuk, mbang ngui ka urang kumei saong uranaih di bhum mikva bangsa takik. Hu khan brei thau ka dom kein lagaih di bruk peih ngak Danak dak ka 8 di dalam tinh, amuk Rơ Chăm H’Hồng, Akaok Kapul urang kumei tỉnh Gia Lai ndem lac:

 “Dom bruk ngak tuk hu kapul peih ngak pak dalam tinh, ye hu rahra saong dom urang kumei dalam Kapul taduan ngak, hu bruk pachreih tui, njauk gauk di dom pakat ủy, kanja bhum palei taong yaom glaong. Dalam masa tukvak anak tal, ye dom pakat Kapul patui veik caga dahlau patagok bruk ngak di drei piah ba tabiak jalan ngak, peih ngak hu siam lagaih 16 bruk ngak di dalam 4 nyaom asal kadha hu makna di Danak dak ka 8, kham marat ngak hu saong yam tapa jalan ba tabiak di tukvak ka I ba tabiak. Bruk hu makna abih lac peih ngak dom bruk ngak salih jalan sahaneng, jalan ngak, rik tame yah klak dom bruk daok iek glaong urang likei atau kumei, adat tanarakun dalam sang saong rahra; dom adat cambat ilamo oh siam saong dom bruk samar drah ngan haong urang kumei saong uranaih.”

Tukvak masa anak tal, Kapul urang kumei tinh Gia Lai meda patui khik tani tanat dom bruk ngak gheih, piah salih jalan sahaneng, jalan ngak, paglaong bruk mbang ngui, duah jien ka urang kumei, jhul pakhang bruk samu gauk di urang kumei saong urang likei, langyah dom bruk samar drah ngan haong urang kumei saong uranaih dalam dom bruk ngak cak rok patagok kinh te, xa hoi di bol bhap rahra. Peih ngak dom bruk rami ramik pato tacei ilamo urang likei saong urang kumei samu gauk, ilamo peih ngak pablak tame bruk samu gauk di urang likei saong urang kumei ka urang jakar dalam politik, dom urang taha palei, akaok puk palei, urang hu angan je dalam rahra. Tapa nan meda ngak salih cambaih laih dalam bruk urang kumei saong urang likei samu gauk saong langyah dom bruk samar drah ngan haong urang kumei saong uranaih.

Ngan haong rilo bruk ngak lagaih saong hu makna hu saong daok hu dom pakat Kapul urang kumei dalam tinh Gia Lai kham marat peih ngak, Danak dak ka 8 hu caong meda ba mai kein lagaih piah ka dom bruk ngak karei hu peih ngak lagaih saong khang kajap di bhum mikva urang bangsa takik di tinh Gia Lai./.