Dalam baoh sang sit di palei Dhaong Panan - Bình Tiến, xa Phan Hiệp, huyen Bắc Bình, Binh Thuan, nghe nhan Lương Thị Hòa tuk halei jeng jal val haong bruk ngak tabiak pandap lan am hu pambuak harak blei dahlau meng grauk labik dalam negar. Ngak bruk oh padeih tangin min tuk halei amuk jeng halar hatian klah rabha haong manuac sia ka bruk ngak gaok glah lan am, kayua nan lac hatai takre luac rai di amuk.

 Hu urang va pato veik bruk ngak gaok glah meng di thun 1978, tal ini hu jaik 50 thun nghệ nhân Lương Thị Hòa mboh bui sambai tuk pandap panda lan am ngak gheih di baoh sang amuk hu rilo tuai damuai takre blei, abih di nyu lac tuai damuai nao rivang ma-in. Dom pandap panda pablei tabiak jeng hu rilo, mai meng nan bo jien mek tame di baoh sang hu rilo jang.

Amuk Hòa khan lac, meng tuk oh ka salih tapa bruk lan am  my nghe ngak mekre meta, pandap panda lan am meng kal brei jien mek tame biar, tok mek pren ngak jien laba, rilo nghe nhan samu thun umo haong amuk klak bruk abih, oh thei daok ngak, daok sa drei amuk kayua ba abih tung tian haong bruk ngak gaok glah, nan ye daok khik tani tanat patui ngak tal harei ini.

 Yaom lac umo glaong, praong thun min ngan haong hatai ranam bruk ngak, ngak tabiak rilo janih pandap lan am ngak gheih biak karei nan ye nghe nhan Lương Thị Hòa tuk halei jeng hu Muyim tinh Binh Thuan saong dom labik resort da-a mai ngak gaok glah lan am dalam dom harei roya prong di taneh aia piah duh ka tuai damuai.

 Yaok janih pandap lan am ngak pagheih mekre meta  kayua amuk Hòa ngak tabiak nyu ndung bak hatai hadah krah, yuk suan ilamo Cam saong parilo janih pandap panda ngak tabiak yau: kara long quy, linga yoni, bimong aia Bình Thuận, bimon Cam, kalaok bingu, gilai la-i cai, drei ikan… Yaok janih pandap lan am di baoh sang amuk ngak tabiak hu praong mbiah haong sit, meda buh tame hu dalam kadung teik, atau mba lo, biak lagaih ka tuai damuai…        

Ndam gam haong bruk ngak gaok glah jaik 50 thun, nghe nhan Lương Thị Hoà nan lac sa dalam dom urang ngak gaok glah lan am lavik thun abih di palei ngak lan am ini. Ini jeng lac bruk ngak ba brei jien mek tame ka baoh sang amuk meng rilo thun ini mai.

 Amuk Lư Thái Tuyên, Phaok Akaok Gilang khik drap ar tinh Binh Thuan brei thau: meng jaman patao bia dahlau diah tal raidiuk harei ini, pandap lan am oh kurang hu dalam raidiuk, bruk mbang angui yaok harei di yaok baoh sang saong dalam ilamo hatai jia di bhap bani Cam. Gilang khik drap ar urak ini daok pataom khik saong parang iek labaih 1.500 pandap panda, dalam nan hu dom janih pandap lan am Cam yao klak meng rilo abap saong pandap panda meng kal hu pandar yaok harei. Langiu di bruk peih ngak brei mong iek, Gilang khik drap ar jeng daok bhian da-a dom nghe nhan mai dang ngak, tacei pato ilamu ngak lan jeng yau peih bruk brei ka tuai damuai nao rivang iek bruk ngak gaok glah lan am di palei Jagaok Bình  Đức. Amuk Lư Thái Tuyên ndom ka Nghe nhan Lương Thị Hoà yau ini: “Muk Lương Thị Hòa, daok di palei Dhaong Panan ngak gaok glah tal ini 49 thun. Tukva tapa anai thau ngak khik ramik tathik siam ilamo…”

Yaom lac hu pato tacei bruk ngak gaok glah lan am meng ong akaok ong kei min urak ini palei ngak lan am njauk gaok rilo cuang kandah ngak ka dom baoh sang ngak gaok glah kurang jang. Dom urang nghe nhan hu angan je haong bruk ngak gaok glah lan am dak harei dak takik. 

Nan jeng lac kadha daok ngak ka nghe nhan Lương Thị Hoà sahneng kuhria biak rilo. Amuk drut druai: Hu dom mbang oh hu tal pato, atau khol ranaih nyu bac hu dom var blaoh nyu klak, amuk duh hatai rilo. Min amuk sahneng, hadei ini nyu praong tagok nyu thau saong takre ngak gaok glah lan am, tuk nan nyu gilac veik megru jeng daok samu. Yau nan min, tal tuk nan ye huac amuk oh daok pren piah pato.

Kadha daok ngak ka amuk hadah mbaok urak ini nan lac pandap panda lan am di baoh sang amuk hu puk palei palih ruah saong brei angan lac pandap panda OCOP 3 patuk, nan jeng lac pren khang piah ka amuk pambuak pagam haong bruk ngak di drei: “Dahlak caong khin pandap drei ngak tabiak rilo angan je pandap OCOP ini papar atah…”

Nghe nhan Lương Thị Hòa daok rik daong tame bruk khik ramik saong cak rok patagok yaom ilamo ngak gaok glah lan am meng kal di urang Cam daok di tinh Binh Thuan, ba pandap panda lan am tabiak darak pasar dalam saong langiu taneh ia ngan haong hatai caong khin hu rilo urang thau tal lan am di urang Cam Viet Nam jang./.