Yaok harei, sa-ai Danh Thị Bích Ngọc, daok di ấp 6 pablei bánh mì saong bánh cam, hadei di tuk kaoh abih jien buh tame sa-ai daok laba hu meng 100.000-200.000 đồng; pasang sa-ai Ngọc ngak phụ hồ hu 200.000 đồng/harei. Meng yaom jien mek tame ini, sang sa-ai Ngọc kuhria hu ka dua urang anek mbang bac. Labaih pluh thun dahlau, sang sa-ai Ngọc lac baoh sang kathaot, daok dalam baoh sang krem la-a di kreh mblang hamu. Sang sa-ai hu 2 công taneh  ngak padai yaok thun 2 vụ min njauk raong 3 urang anek nan ye oh ginup mbang.

Mboh sang sa-ai Ngọc kan kandah, dhar kapul urang kamei ấp 6 pathau tagok pakat angaok pasang iek daong phun jien labaih 20 triệu đồng piah ka sa-ai blei kabao raong. Bhum palei pala xã Vĩnh Hòa Hưng Nam hu rilo hareik,  nan ye tok buh pren tabiak cakak nan lac ginup pandap mbang ka kubao. Tuk kubao prong tal tuk caih menek, sa-ai Ngọc pablei kubao hu 15 triệu đồng, daok meyah piah raong jeng kubao rilow ye pablei yaom meng 40-50 triệu đồng/sa drei… Dhar kapul urang kamei ấp 6 daok buh tabiak phun jien piah daong ka sa-ai Ngọc pablei salih sit; pasang di sa-ai Ngọc nao ngak phụ hồ piah patagok jien mek tame. Meng bruk sangka di dom gah chức năng hu daong ka diuk pasang sa-ai Ngọc kham merat ngak mbang, tabiak truh kathaot, padang ngak sang.

Sa-ai  Trương Mụi Tua, Akaok kapul urang kamei xã Vĩnh Hòa Hưng Nam brei thau, di ấp 6 daok hu rilo urang kamei Khmer tabiak truh hu kan kathaot, dalam nan hu rilo adei sa-ai hu mbaok tame kapul urang kamei saong ngak dom bruk pah-la biak siam.

Ấp 6 hu jaik 390 baoh sang, dalam nan urang Khmer hu tal 78%. Dom thun 1990, dom sang kathaot biak glaong saong lac ấp kan kandah abih dalam xã. Kapul urang kamei xã pambuak bruk haong dom urang hu  angan je, pathau khan, ngak brei salih bahrau jalan saneng dalam urang kamei Khmer kathaot, daong phun jien piah ka urang kamei raong glang, pablei salih sit, ngak bruk tiểu thủ công nghiep, salih janih phun pala hu kein laba jang; sang ka brei ka anek bhik bac tagok đại học.

Meng thun 2011, tuk dom doanh nghiệp jhik pet, takhaok kalik, ngak  kaya ikan mai palei peih công ty, Kapul urang kamei xã Vĩnh Hòa Hưng Nam hu pambuak bruk haong dom jabat piah pato bruk ngak ka urang kamei Khmer ấp 6, hadei di nan ba dom sa-ai kumei nao ngak bruk di dom công ty ngan haong jien mek tame meng 4-7 triệu đồng/sa urang sa bilan. Tal harei ini, di ấp tok daok 26 baoh sang kan kathaot, rilo meng lac urang prong thun, daok sa drei, ruak kik.

Ấp hu 1 sa khang brah anit ranam piah daong ka urang kamei daok sa drei, urang kamei hu rai diuk kan kandah; hu klup kapul likei kamei samu gauk; 3 tổ daong phun jien brei mesre pa-yeng ngan haong 42 urang, yaom jien rik tame hu 8,4 triệu/bilan. Urang jakar kapul urang kamei jak ba 39 urang hội hu mbaok tame dom bruk ngak mbang kinh tế yau raong ada, raong kubao, raong pabui; tapa nan daong ka urang hội yam tapa kan kathaot, patagok bruk gul pataom gauk.

Kapul urang kamei tỉnh Kiên Giang taong yaom glaong dom bruk ngak di urang kamei Khmer ấp 6. Meng dom bruk ngak mbang nan,  bruk ngak tui sarak di Đảng, hukum di karja dalam bhap bini Khmer dak harei dak glaong. Rilo urang hu mbaok tame ngak siam bruk dak padang baoh sang “5 oh, 3 hacih”, neh rabha dom janih hareik hareim, takac lubang dhar hareik, salih hareik thải nhựa mek kaya mbang; rik daong biak siam tame bruk padang ngak palei pala bahrau... Abih di nyu nan lac, rilo urang kamei Khmer kham merat cak rok patagok bruk ngak mbang, dak padang baoh sang haniem phol saong hu mbaok tame dom bruk ngak di puk palei./.