Baoh sang sit di 3 adei sa-ai kamei Rah Lan H’Kưm di palei Chuét Ngol, xã Chư Á, ban Pleiku, tỉnh Gia Lai harei ini chreih chrai jang yaok harei. Dom sa-ai kamei công an di kapul Urang kamei Công an tỉnh Gia Lai mai ravang saong ma-in bui sambai haong dom anek. Sa-ai kacua di 2 adei sit lac H’Kưm thun ini bahrau 15 thun brei thau: ame saong amaik di 3 adei sa-ai palang lahik atah di ini 6 thun. Meng nan tal harei ini, Kapul urang kamei Công an tỉnh taduan raong, iek glang meng bruk mbang, ndih tal bruk bac ta-a ka 3 adei sa-ai. Dom adei tuk halei jeng hu dom amaik, dom anai công an pachreih ba, daong brei rilo bruk: tuk alin khan ao bahrau, tuk brei tapuk siphau saong dom pandap bac ta-a. H'Kưm lac:“Harei harei, meyah hu bruk hagait ye adei ieu dom sa-ai daong brei. Dom sa-ai jeng kakei kol adei oh klaak bac, brei thau anit ranam gauk. Adei mboh trun hu meneing dom kan kandah. Adei kham merat bac ta-a piah pabak veik hatai sangka di dom sa-ai daong raong”.

Oh ta-eng hagait adei sa-ai Rah Lan H’Kưm, di tỉnh Gia Lai daok hu 31 uranaih matui, rilo meng lac urang bangsa takik hu dom pakat kapul urang kamei Công an tỉnh Gia Lai taduan raong. Meng jien ieu pataom hu meng dom urang jakar, urang lin dalam dom đơn vị saong jak ba rahra, kapul urang kamei khik hu yaom jien cai pandar ka yaok kamuan meng 4 tal 5 triệu đồng sa thun. Yaom jien ini hu daong ka dom uranaih matui hu mbuan lagaih jang dalam bruk bac ta-a saong cai pandar yaok harei. 

Jeng meng bruk sangka di dom pakat kapul urang kamei, thun 2022 xã Phú An, huyện Đăk Pơ hu tal pato akhar haroh ka adei sa-ai kamei bangsa  Bahnar. Nan ye, meng labik oh thau akhar haroh, rilo adei sa-ai kamei thau bac, thau vak, thau cih, thau kuhria jien dalam pablei salih. Sa-ai kamei Bùi Thị Minh Dương – Akaok kapul urang kamei xã Phú An, huyện Đăk Pơ brei thau, meng siam lagaih ini, bruk peih tal pato akhar haroh hu pambak praong tabiak dom xã karei. Thun ini, kapul urang kamei dom xã Yang Bắc, Yang Hội jeng hu peih veik 2 tal pato akhar haroh, dui pachreih hu 160 adei sa-ai kamei hu mbaok tame:“Adei sa-ai kamei daok huac daok malau, oh khin bac huac suan anai gru klao atau rilo sa-ai hu bài mai sang oh ngak, oh vak. Tangi sua lac kayua halei ye dom sa-ai khan lac pan but daok kan jang pan jaleing ngak puh. Tuk vak hu akhar camereip nan lac prein pachreih ba ka dom adei sa-ai chreih chrai jang.tal urak ini, dom sa-ai thau bac, thau vak, meda bac bài haong anek saong meda duah thau angaok ineternet piah ba tame ngak tui dalam bruk pala drak, patruh eik patrun kathaot”. 

Amuk Rơ Chăm H’Hồng – Akaok kapul urang kamei tỉnh Gia Lai brei thau, taphia di bruk taduan raong uranaih matui saong peih tal pato akhar haroh ka adei sa-ai kamei urang bangsa takik, dom pakat kapul urang kamei di tỉnh daok hu kadung jien bac brei ka anek saih kan kathaot bac ta-a naih joi, kham merat yam tapa kan kandah, padang baoh sang anit ranam, daong phun jien sarak ka adei sa-ai kamei, alin phun pajaih, athur raong. Tapa nan, yaok rabau uraniah saong urang kamei hu daong brei:“Dalam tukvak anak tal, Kapul urang kamei tỉnh Gia Lai daok brei patagok jang dom bruk ngak hu; tacei pato dom pakat kapul urang kamei bac megru ilamu dom bruk ngak di dom puk palei saong di dalam tỉnh piah ngak tui dalam tuk cakrok bruk ngak mbang di sang. Gam haong nan, peih ngak dom bruk, kalup kapul, dui pachreih hu dom urang hội, pachreih ba, pok meyaom samar drah dom menuac urang, dom bruk ngak gheih piah pambak praong dalam dom pakat kapul urang kamei”.

Meng dom bruk ngak siam bak hatai anit ranam, kapul urang kamei dom pakat di tỉnh Gia Lai daok daong ka uranaih matui saong urang kamei bangsa takik trun meneing dom kan kandah, rik daong peih ngak siam bruk an sinh xã hội di puk palei./.