Hạng A Dính ndih tapui tabiak saong praong tagok di palei Séo Mý Tỷ, xã Tả Van, ban sit Sa Pa (tỉnh Lào Cai) nan ye bhian randap haong yaok candaih patau, yaok phun kayau di labik ini. Oh khin daok dalam kan kathaot, eik lipa, Hạng A Dính duah ginup jalan piah hu jien mek tame. Ngak po DC Farmer Home min Hạng A Dính jeng daok pala drak saong raong glang.

Hạng A Dính khan lac: “Ngak hamu yaok thun tok hu 10 mbao padai nan ye oh ginup mbang. Hadei di tuk duah thau saong nao rilo labik, meng Sơn La, Hà Giang tal Sa Pa, drei sahneng lac palei drei hu glai taha, hu thác Rồng, hu danao ia…, habar drei oh ngak Homestay. Meng jien patak pataom hu saong nyim di adei sa-ai, gauk gar, but pajaih hu jaik 600 triệu đồng, drei ramik veik sang danaok piah ngak du lịch”.

Ong Hạng A Tráng, akaok palei Séo Mý Tỷ brei thau: Pak ini, mikva daok khik hu dom ilamu meng kan yau jhik, pứt, menyim khan bai… Tuk rija, roya atau Tết, urang pataom gauk haong sap glaong biar di khèn Mông. Urak ini, jeng hu jaik pluh sang ngak Homestay, lingiu di tuai dalam taneh ia, ye tuai negar langiu tuk mai tal xã Tả Van jeng bhian tagok Séo Mý Tỷ duah thau raidiuk di mikva pak ini. Tuai biak takre tuk hu ndom biai nao mai haong bhap bini dalam palei, kayua oh thei thau cambaih labik ini yau mikva daok pak ini. Urang Mông daok pak ini oh tak kaoh kayau, oh am cuh hamu ngak puh, khik glai, khik caga alam langik tasik piah ka labik ini dak harei dak siam jang, piah hu rilo tuai mai tal jang... Yaok thun, mikva jeng ngak adat paling yang glai piah jum pataom bangsa, pambuak pakajap anek menuac haong langik tasik.

 Meng tuk hu bruk bayar jien khik iek glai, tui jalan jao khoán khik caga glai ka bhap bini, rilo sang daok vil val labik Bein pakat negar Hoàng Liên, hu jien mek tame daong paglaong raidiuk... 

Ong Nguyễn Hữu Hạnh, Yam ndok Bein pakat negar Hoàng Liên brei thau, meng thun 2012 tal ini, Bein pakat negar Hoàng Liên hu jao khoán bruk khik caga glai ka bhap bini daok pak nan haong taneh jao khoán yaok thun lac labaih 8.000ha, brei ka 21 palei saong 5 sang daok dalam 3 xã bhum kreih bein lac Tả Van, Hoàng Liên haong Bản Hồ saong 2 tổ di phường Ô Quý Hồ. 

Bruk jao khoán khik caga glai, ye kapul  khik iek oh karei hagait meta maong, tangin pambuak atah di gah Kiểm lâm dalam bruk khik iek glai.

Jien brei ka bruk khik iek glai dak thun dak tagok, ta-eng thun 2021 lac labaih 5 tỷ đồng. Tui bruk tacei pato, pasang iek, peih ngak di Hạt Kiểm lâm Hoàng Liên, bhap bini njauk gauk brei pandar meng 50 - 60% pok jien, piah bayar ka dom sang, daok veik piah brei ka dom bruk ngak di kapul khik iek glai. Di Séo Mý Tỷ oh ka hu đô thị hóa, langik tasik, anek menuac jeng daok khik hu yau meng kan. Di pak nan, urang Mông thau anit ranam gauk, jum pataom gauk, jak gauk khik iek glai, kayua urang mboh lac, khik hu glai lac khik hu raidiuk…

Meng jalan ngak drah samar, siam lagaih di dom mban, ngành puk palei, gam haong bruk ba tangin tame di bhap bini bangsa takik dalam khik ramik ilamu, pagam pambak tame dom kein lagaih meng langik tasik piah ngak du lịch, patagok bruk ngak mbang meng glai, dom bruk di danak dak bruk ngak negar patagok KTXH bhum bhap bini bangsa takik saong bhum ceik, meda samar ngak hu../.