Jeng yau yaok thun, meng tết dương lịch tal tết âm lịch, dom urang par akaok tỉnh Bình Dương parabha jeng rilo kapul nao rivang, alin pandap ka urang ngak gaok kan kandah. Taeng thun ini, salih ka bruk daa urang ngak mai tal hội trường, urang par akaok tỉnh hu nao tal yaok labik sang trọ alin pandap piah thau cambaih jang ka raidiuk di urang ngak. Bruk ini nyu ngak brei ka urang ngak mboh bui sambai anak bruk sangka di tỉnh Bình Dương saong di gah công đoàn.

Amuk Nguyễn Thị Hoa, urang ngak di Công ty Shyang Hung Cheng, ban Thuận An ndem lac, công ty hu takik đơn hàng nan ye jien mek tame jeng trun tui. Puac thun hu dom pakat, dom gah sangka tal, alin pandap nan ye amuk Hoa biak sambai:“Biak uan tabuan saong thau dhar phol công đoàn, urang par akaok tỉnh Bình Dương sangka, alin brei pandap mbang Tết. Harei harei drei caong ka taong abih dom doanh nghiệp hu đơn hàng piah ka urang ngak mai ngak bruk gilac veik”

Nao rivang, alin pandap di dom labik sang trọ, ong Nguyễn Văn Lợi, Bí thư Tỉnh ủy Bình Dương hu panuac dhar phol bruk rik prein tame di urang ngak ka bruk cak rok patagok di tỉnh. Tỉnh Bình Dương meda ngak abih drei piah ka urang ngak hu raidiuk takik kan kandah, glaih glar, tani tanat jang, anek bhik hu nao bac da-a siam jang. “Dahlak caong lac khol drei ba gauk kham marat yam tapa kan kandah haong gauk di dunya oh lac di taeng Việt Nam. Dahlak saneng kan kandah ini lac bruk di anak meta. Bahrau ini, hu dom doanh nghiệp khan lac hu đơn đặt hàng saong hadei di tết meda peih bruk ngak gilac veik”

Thun 2022, Bình Dương hu 37.000 urang ngak brei padeih ngak saong 250.000 urang njauk trun maong ngak bruk. Klah rabha haong urang ngak, tỉnh Bình Dương buh jien tabiak alin pandap ka dom urang gaok kan kandah meng 500.000 tal 1 triệu đồng sa urang ngan haong 46.500 paok pandap. Tết thun ini tui kuhria meda hu labaih 500.000 urang ngak daok veik di Bình Dương mbang tết. Urak ini, dom khu phố jeng hu jak ba po sang trọ trun meng 30-50% jien pah bilik daok dalam bilan Tết ka urang daok trọ, jak ba dom phun jien karei piah alin pandap Tết ka urang ngak.

Ong Trương Văn Hồng, Akaok mban khik ramik khu phố 5, phường Hòa Phú, ban Thủ Dầu Một brei thau, khu phố 5 hu 39 labik sang trọ ngan haong 353baoh sang trọ. Urak ini, mban khik ramik khu phố daok padang angan dom urang kan kathaot piah jak ba daong brei, daong ka dom urang ngak hu mbang tết trei sil, haniem phul:“Khu phố daok  jak ba kalup kapul po sang trọ pataom dom po sang trọ veik piah ginum biai hu dom jalan daong ka urang ngak, yau ye trun jien pah sang trọ; atau po sang trọ kaoh tabiak  manieng jien daong ka urang ngak nao palei mbang Tết, atau daong ka urang daok veik mbang Tết. langiu di nan, khu phố jak ba hu meda daong ka mikva raok Tết nguyên đán”.

Amuk Trương Thúy Hằng, urang ngak di Công ty TNHH Chí Hùng, daok di ban sit Tân Uyên khan lac, yaom jien bilan oh tăng ca lac 6,5 triệu đồng, oh ginup jien jru tavao ka pasang saong anek daok ruak trak. Amuk caong thun bahrau, doanh nghiệp hu đơn hàng piah hu bruk ngak, hu jien biyar saiy: “Khol dahlak caong doanh nghiệp hu pandap ka urang ngak piah hu jien. Doanh nghiệp jeng kan kandah rilo. Drei glaih 1 ye doanh nghiệp glaih tal 10 kuhria ka pandap panda, kuhria ka raidiuk di urang ngak saong jien thưởng Tết”.

Hatai caong di amuk Hằng jeng lac hatai caong di labaih 1,2 triệu urang ngak daok ngak bruk di Bình Dương. Kayua lac, mayah hu bruk ngak tani tanat, hu tăng ca rilo ye urang ngak meda hu jien mek tame glaong jang piah kuhria ka rup drei saong ka sang drei. Taphia di nan, urang ngak jeng caong khin karja Bình Dương saong doanh nghiệp hu dom sarak daong piah tani tanat raidiuk ka dom urang ngak daok atah palei./.