Labaih 18 thun kak kajap haong Cty TNHH Sonova Operations Center Việt Nam daok di ban Thuận An, amuk Trần Thị Hằng (umo 40 thun), Tổ trưởng sản xuất hu dom sahneng duah, salih bahrau jalan ngak piah patak pataom phun jien ka Cty yaok pluh tỷ đồng sa thun. Abih di nyu nan lac, puac thun 2022, amuk Hằng sahneng duah, salih bahrau bruk "Pasiam veik Electric Module" pandar piah ngak jamriak trợ thính. Bruk ramik veik nan hu daong patrun dom labaih kurang di pandap ngak tabiak, patak pataom ka doanh nghiệp jaik 15 tỷ đồng sa thun:“Yaok bilan drei ngak harak pathau khan ye mboh pandap khut, klaak biak rilo nan ye drei sahneng lac yau habar klaak bo daok abih jien ba nao klaak. Kapul di drei duah jalan salih vật tư khut, pasiam veik piah ngak ka nyu jeng pandap siam ye oh daok klaak tra”

Dalam tuk ngak bruk, sa-ai Dương Thanh Thuấn (umo 27 thun), urang ngak bruk bảo trì di Cty TNHH Hoya Lens Việt Nam daok di ban Thủ Dầu Một mboh lac, hu biak rilo máy in CT400 khut daok dalam kho pandap klaak kayua oh hu pandap salih. Mboh yau nan, sa-ai duah jalan pasiam veik jamriak klak piah ba tame pandar di dom bruk karei. Hatai sahneng ini di sa-ai hu daong ka Cty trun hu phun jien, nan ye hu mBan Yam ndok pok meyaom.

Ini bahrau lac 2 dalam yaok rabau urang ngak di Bình Dương hu dom sahneng duah hu kein, patak pataom hu menuac ngak dalam dom dây chuyền ngak pandap bo daok patak pataom hu pandap tamo ba tame ngak, paglaong yaom pandap ngak tabiak, patagok prein meriak gauk di pandap. Jeng meng kein laba nan, dom doanh nghiệp di Bình Dương hu pachreih urang ngak ba tabiak dom kadha salih bahrau, sahneng duah bahrau meng rilo jalan ngak yau ye: tagok jien bilan, jien thưởng, brei harak meyaom gam tui jien thưởng….

Ong Mã Văn Việt, Phaok Chủ tịch Công đoàn Cty TNHH Apparel Far Eastern Việt Nam brei thau, cty bahrau peih bruk pok meyaom 90 urang ngak hu kadha salih bahrau siam dalam thun ini:“Doanh nghiệp saong công đoàn cơ sở pambuak gauk siam, lagaih dalam bruk jak ba urang ngak sahneng duah bahrau. Yaok adit, yaok bilan, Cty jeng hu ba dom kadha trun ka urang ngak. mBan taong yaom salih bahrau di doanh nghiệp taduan mek kadha di dom urang ngak piah taong yaom yaok adit, yaok bilan piah hu dom kadha siam ba tabiak dalam quý, dalam thun"

Joi bruk, takre sahneng duah, hu daong ka urang ngak tani tanat bruk ngak, tani tanat jien mek tame, bo daok peih tabiak jalan patagok. Langiu di nan, sahneng duah bahrau di urang ngak hu daong ba mai kein laba ka doanh nghiệp ye doanh nghiệp jeng hu iek glang siam jang ka raidiuk, paglaong jien mek tame ka urang ngak. 

Ong Bùi Thanh Nhân, Akaok mBan Dân vận tỉnh Bình Dương mboh lac, dom pakat công đoàn njauk jhul khang pathau khan piah taong abih gauk jeng hu mbaok tame bruk pakacah “Ngak bruk naih joi, ngak bruk hadah krah”:“Liên đoàn lao động tỉnh Bình Dương njauk ndom biai nao mai haong doanh nghiệp ye yaom glaong ngak kein glaong ye doanh nghiệp sangka, pachreih ba, pasiam labik ngak bruk ka urang ngak. Liên đoàn njauk pambuak bruk khang kajap jang haong dom pakat karja dalam peih ngak, hu dom jalan pok meyaom samar drah piah pachreih ba bruk pakacah “Ngak bruk naih joi, ngak bruk hadah krah”

Mboh hu dom rik daong di urang ngak, bahrau ini, Liên đoàn lao động tỉnh Bình Dương hu peih bruk pok meyaom 249 urang ngak naih joi, urang ngak hadah krah, dalam nan hu 4 urang naih gheih di abih dalam bruk pakacah gauk anit ranam taneh ia vaktu 2021 - 2023. Dalam thun ini, Bình Dương hu 7 sahneng duah bahrau praong di urang ngak hu Tổng Liên đoàn Lao động Việt Nam pok meyaom di giải thưởng Nguyễn Đức Cảnh./.