Ong Nguyễn Đắc Thời, Akaok Jabat Kapul Kong ndoan Kongti jhik menyim TNHH Viet Nam (100% phun jien di Đài Loan), huyen Củ Chi, brei thau, harei ngak bruk ka dua hadei Tet, kongti hu 96% di dalam 2.000 urang ngak kong gilac mai ngak bruk. Tui ong Thời, dom bruk sangka, daong kuria, alin hadiah pandap nda kaya mbang Tet, yau ye: pandap panda bhian pandar, caok tham hu mayaom saong rilo panda panda hu yaom kaom glaong dui pambuak pagam kapul urang, daong urang ngak kong ngak saong kongti suai jang.

 “Akaok thun Mban Yam ndok alin hadiah jien ka urang ngak kong tame ngak, yaok sa urang tok hu 50 ribau jien ddong. Hadei mbang padeih padei, Thei thei jeng chreih chrai gilac mai ngak bruk, tari taring ngak bruk piah ngak samu dom pandap panda hu urang kakei blei dahlau. Kapul ngak mbang gam gam pablei hu rilo pandap panda, oh njauk lac mai meng sa tukvak halei”

Di Kongti TNHH Juki Viet Nam (100% phun jien di Japon), labik ngak pandap panda Tân Thuận, Quan 7, kongti tame ngak bruk meng harei 4/2 gam haong labaih 97% urang ngak kong mai tal sang ngak. Amuk Nguyễn Thị Mỹ Linh, Phaok Akaok kong ndoan kongti brei thau lac: “Dua harei akaok ye hu dom adei sa-ai padeih padei thun hu likau adat dahlau. Harei ini lac harei ka 3 nao ngak, meyah nao hu ginup urang ye lac hu 100% paje. Gah dahlak hulin hu karo ka urang ngak kong, gaok mai hu dom urang ngak kong likau padeih bruk atau kongti hu dom pandap panda kakei blei dahlau katuak ye kongti duah pabak urang ngak bruk tame”

Amuk Trần Thị Kiều Oanh - Yam ndok pan gah manuac ngak Sai Gon Food brei thau, gah urang patui ngak bruk thun ini hu kein lagaih, kongti oh hu gaok rilo kan kandah ka urang ngak bruk, srap gap yam tame ngak tabiak pandap panda, pabak samu dom pandap panda hu urang kakei blei.

Thun ini, gah pan akaok hu mai tadhau ayuh Tet, hadiah alin jien li xi, mbang huak haong baoh sang urang ngak kong daok di Thanh Hoá. Bruk rivang sua tangi tadhau ayuh harei Tet tal sang brei mboh hatai anit ranam pambuak gauk di urang pan akaok kongti saong urang ngak kong - yau ye adei saai sa baoh sang praong. Langiu di nan, Sai Gon Food daok pagun sanya ka sarak brei kein lagaih, mayaom Tet cambaih laih meng di tuk abih tamat thun. Amuk Oanh hu ndom veik: “Tuk urang ngak kong ngak bruk dalam thun bahrau saong ngak suai lawik tal tamat abih thun ye hu 2 bilan jien bilan, nan maong yau lac sa paok di sarak ka jien piah urang ngak kong hu jien patak pataom yaok thun. Daok ngan haong urang ngak kong bahrau ngak bruk oh ka bhian randap ye bruk jak jeng dalam bruk ngak daok biar, daong ka dom urang nan hu jien piah pandar tuk akaok meti”

Tui amuk Lương Thị Tới, Phaok Yam ndok So Lao dong - Thuong binh saong Xa hoi Ban raya Ho Chi Minh, hadei di raya Tet, hatai caong pilih ruah urang ngak bruk hu tagok glaong, meng 50.400 - 55.500 labik bruk ngak, tagok labaih 7% dut pachoh saong tukvak yau ini di thun dahlau. Kapul ngak bruk hu duah rilo abih lac dalam gah pablei salih - meyit meyao, hu jaik 67% abih tih hatai caong. Langiu di nan, dom gah ngak kong brei ka bruk padang, ngak nong, ngak gah glai, raong ikan hadang, jamariak cơ khí, jru hoa hoc, ngak pandap panda saong ngak tabiak ndap nda ndien tu jeng hu hatai caong urang ngak. Hu dom gah pilih ruah rilo hadei Tet dalam nan hu gah jhik menyim, kalik takhaok, pablei salih, pajeng ba saong meyit meyao lamnge. Amuk Lương Thị Tới ndom meyai lac: “Hadei di Tet, dom gah ngak mbang pablei salih pilih ruah urang ngak bruk piah pabak tame dom urang ngak padeih bruk, salih tapa bruk ngak bahrau atau gah ngak mbang pablei salih pilih ruah piah peih praong bruk ngak tabiak pandap panda pablei salih. Dut haong thun 2024, hatai caong ka urang ngak bruk hadei Tet hu tagok sa sit, labaih 7%”.

Urak ini, rilo gah ngak mbang pablei salih hu ba tangin tame jhul khang bruk ngak tabiak dom pandap panda hu kakei blei piah pablei tabiak negar langiu di akaok thun bahrau. Jaik abih dom gah ngak mbang pablei salih caong takre, dalam thun 2025 bruk ngak tabiak pandap panda pablei salih hu rilo siam lagaih./.