Tapak dom harei hadei salah blaoh raya Tet Nguyen ndan Ula Naih Bak, rilo gah ngak mbang pablei salih di Ban raya Ho Chi Minh hu gilac tame bruk ngak piah srap gap ka dom pandap kaya hu harak kakei blei dahlau piah pablei patabiak langiu negar dom harei akaok thun.

Di Kongti TNHH Kaosu Đức Minh, labaih 100 urang ngak bruk gilac mai bruk ngak hu ginup meng harei 6 bingun Tet piah srap gap ngak pandap nda kaya jao ka tuai damuai Han Quoc dalam 3 bilan akaok thun ini.

Dom ndap nda kaya hu ngak tabiak hu takai ngak meng katak ka dom janih brei pandar ka jammariak gom ndien dalam sang. Urang ngak mbang pablei salih ini hu mbaoh tangin pambuak bruk haong tuai damuai di Han Quoc saong Japon piah ngak tabiak ndap nda kaya ka karo tal abih thun ini.

Thun blaoh, Kongti TNHH Kaosu Minh Đức hu rilo harak kakei dahalau khin blei ndap nda kaya saong ngak tabiak pandap nda kaya hu karo yau nan meng hu sangka jien bilan jien meyaom mbang Tet hu lagaih ka urang ngak kong, ngak ka urang ngak bruk chreih chrai bui sambai tuk gilac mai ngak bruk di masa akaok thun.

Ong Nguyễn Quốc Anh – Yam ndok Kongti TNHH Kaosu Đức Minh brei thau:

 "yau ye abih 100% urang ngak kong daok di dom tinh hu gilac mai ngak bruk hadei di mbang Tet saong daok ngak bruk dalam dom harei akaok thun. Dom pandap nda kaya hu harak brei kakei blei dahlau di Kongti hu khik siam karo, kayua harak pambuak bruk hu mbaoh tangin brei ka luac thun, ngan haong bruk jao yaok pandap kaya cambaih laih tui yaok bilan. Tal urak ini, ndap nda kaya kakei blei dahlau rilo jang dut pacoh haong thun dahlau labaih 5-10%".

Di Ban raya Ho Chi Minh hu labaih 200 po ngak mbang pablei salih gah jhik menyim gam saong labaih 1 trieu urang ngak bruk. Tal ini, rilo meng lac urang ngak mbang pablei salih hu ndap nda kaya hu harak kakei blei dahlau tal abih bilan 6.

Tui ong Phạm Xuân Hồng – Akaok Kapul jhik menyim Ban raya Ho Chi Minh, rilo meng lac urang ngak bruk ka bruk ini thei jeng daok di atah, kayua yau nan ye rilo urang ngak mbang pablei salih brei ka urang ngak bruk padeih padei harei raya Tet 10 harei nan tal harei 8 bingun Tet ka meng gilac mai ngak bruk.

Rilo gah urang ngak mbang pablei salih jeng hu ramik brei radaih raok ba urang ngak kong saong daong jien harak radaih ka urang ngak kong piah gilac mai ngak bruk.

Jeng tui ong Hồng, darak pasar pablei tabiak gah jhik menyim thun ini biak hu siam. Gah urang ngak mbang pablei salih caong takre ka ndap nda kaya kakei blei dahlau meda hu tagok labaih meng 10%-15% dut haong thun dahlau. Kayua nan, bruk makna abih di gah ngak mbang pablei salih gah jhik menyim ini lac pasiam veik bruk ngak, tagok bruk siam lagaih piah sangka siam ka urang ngak bruk piah gam khik urang ngak bruk klak gam pilih ruah hu urang ngak bruk bahrau, patui hu hatai caong ngak tabiak ndap nda kaya hu tagok saong karo kajap. Ong Phạm Xuân Hông brei thau lac:

 "Hadei di mbang Tet, dom urang ngak kong gilac mai ngak bruk caong maong hu karo tani tanat. Min tapi, bruk ngak ka dom gah urang ngak mbang pablei salih duh hatai lac ngak habar piah tani tanat ka bruk ngak saong raidiuk ka urang ngak bruk. Kayua yau nan, dom gah ngak mbang pablei salih brei sangka iek praong ka bruk sakih bahrau, pasang iek piah patagok jak jeng di bruk ngak mbang. Tapa di nan, khik takai urang ngak bruk saong khik karo tani tanat raidiuk urang ngak bruk thun 2025 hu tagok”.

Gam pachreih hu dalam peih mbaok ngak bruk akaok thun yau nan, jie caong lac dom gah urang ngak mbang pablei salih ngak ndap nda kaya pablei tabiak negar langiu di Ban raya Ho Chi Minh brei mek hu bruk dak kuhria khin dahlau, rik daong praong tame bruk cakrok patagok kinh te di ban raya saong taneh ia./.