Huyện Lai Vung, tỉnh Đồng Tháp hu maong lac bhum taneh pala baoh quýt hồng praong abih di gah Pai negar. Dom sang bein pala quýt hồng hu caga blaoh blai quýt piah pablei Tết thun sak tapai 2023. Mai tal Lai Vung, sua tangi tal urang nong angan Lưu Văn Ràng (daok di xã Vĩnh Thới) ye thei jeng thau ong lac menuac ngak tabiak phun quýt hồng kiểng. Ong Ràng lac urang nong camriep abih hu hatai saneng salih quýt hồng dalam bein jeng phun parang iek Tết di gah Pai. Phun quýt hồng bhian praong glaong, dhar hala kapal bak, min tapa plak tangin gheih ngak di ong hu jeng phun kiểng glaong daok 1 mét tal 1 mét meteh. Yaok thun tal tuk Tết, yaok ratuh chậu quýt hồng kiểng gheih, mekre hu parang iek di Tết hu daong ka ong Ràng laba hu yaok rituh triệu đồng.

Thun ini HTX Hoa kiểng Bình An (phường Long Hòa, quận Bình Thủy, ban Cần Thơ), pala bingu, kiểng gaok kan kayua hajan rilo saong ia tagok glaong. Tui ong Đoàn Hữu Bốn, Yam ndok HTX bingu kiểng Bình An khan lac: "piah pabak ka darak pasa Tết 2023, dom urang dalam HTX pala labaih 20 janih, dalam nan rilo meng lac cúc mâm xôi, cúc Đài Loan saong cát tường. Kol dahlak caong darak pasa bingu, kiểng Tết hu mbuan lagaih piah ka urang pala bingu raok sa bilan xuân bui sambai, chreih chrai".

Ong Bùi Thanh Liêm – Akaok Jabat Ngak nong saong patagok palei pala huyện Chợ Lách, tỉnh Bến Tre brei thau, mayah dalam tuk Tết thun blaoh, dom baoh sang oh khang hatai pala kayua njauk kan kandah di jit ruak COVID-19 ye thun ini, rilo sang bein pala biak rilo chậu saong rilo janih. Tui kuhria dalam tuk Tết 2023, huyện meda ba tabiak darak pasa labaih 10 triệu pandap dom janih, rilo meng lac mai kanjik, tắc kiểng, hoa giấy, dom janih bingu raak yau ye cúc mâm xôi, cúc Hà Lan, vạn thọ... Taphia di nan, dom sang bein daok hu pala rilo janih kiểng lá, kiểng treo, kiểng bonsai haong rilo mẫu mã, rilo janih phun praong, sit, mbaih.

Meng thun 2015, ong Đoàn Anh Kiệt (daok di Long Hậu, huyện Lai Vung, Đồng Tháo) hu pandar 5 công taneh bein pala quýt hồng piah pabak ka tuai mai rivang iek du lịch mek thaot binguk, mbang baoh di bein. Ong Kiệt brei thau, tuai du lịch di dom ban praong urak ini khin mai rivang iek, ba drei tame du lịch sinh thái bein phun di gah Pai negar, kayua urang hu ba drei tame raidiuk di sang bein nan ye mboh takre jang. Meng cak rok patagok bein quýt hồng raok tuai bo yaok thun sang ong Kiệt hu jien mek tame dom ratuh triệu đồng.

Palei bingu Xáng Mới (daok di ban sit Rạch Gòi, huyện Châu Thành A, tỉnh Hậu Giang) bahrau hu labaih 10 urang min pala tal 50 ha, rilo meng lac mào gà, cúc 7 sambo màu, hướng dương saong dom janih kiểng yau ye maraik, quất. Langiu di bruk pablei bingu tuk Tết, dom baoh sang pala daok hu pabak ka darak pasar dom janih phun bingu katut harei, mbuan pala, hu laba biak rilo.

Daok di HTX ngak pandap, pablei salih - dịch vụ - raong kaya ikan Cái Bát, tỉnh Cà Mau dalam tuk Tết thun sak tapai 2023 meda pabak 4-5 tấn pandap dom janih tabiak darak pasa, tagok labaih 30% dut saong tukvak ini di thun blaoh. Dom pandap di HTX lac đặc sản hu angan je oh lac di Cà Mau bo daok hu rilo labik takre, yau ye hadang thu, chả ikan phi, ahar phồng tôm, hadang caik laar...

Labik ngak "Đặc sản gah Pai palei dahlak" (ban Cần Thơ) lac labik pablei salih dom pandap peih bruk ngak mbang saong OCOP lac dom pandap đặc sản di bhum ĐBSCL nan ye pablei biak nduac meng harei peih tabiak tal tuk jaik Tết. Urak ini, hu blaoh gah pambuak bruk min akaok bilan 11 saka ia bulan, labik ini meng peih bruk khik piah pandap pablei dalam tuk Tết 2023. Labik ini rilo meng lac ngak kadung pandap tui panuac ieu kakei di tuai piah alin hadiah dalam tuk Tết ngan haong yaom meng 500.000 đồng tal 2 triệu đồng sa kadung. Ong Trương Hòa Hội, po labik ngak "Đặc sản gah Pai palei dahlak” ngan haong caong lac đơn đặt hàng yau urak ini ye  dom pandap pablei tuk Tết anak tal meda tagok glaong jang dut saong thun 2021./.