Palak tangin lavang lavaih daok rapeik tui dom nding njuk ia meng bein cà phê labaih 1ha tabiak tal craoh Đắk Sôr, ong Lê Quang Lâm, daok di palei Quảng Thành, xã Đắk Sôr, huyện Krông Nô pasang iek yaok labik pambuak di dom nding raok. Meng bein sang ong tabiak tal craoh brei pambuak tal labaih pluh cuộn nding raok (yaok cuộn atah 50m), nan ye ong njauk pasang iek, khik ka nyu hu pambuak kajap. Tukvak ini, craoh Đắk Sôr labik jaik bein cà phê sang ong Lâm thu ndaong patau saong cuak, oh daok ia piah pruh.“Duh hatai lo dom harei ini mbang ndih oh hu. Craoh thu ia meng harei 6 bingun Tết tal urak ini. Caong lac ia mai piah pruh cà phê piah oh khut baoh. Thun ini mboh pandiak bhang jang, dom thun dahlau ia nduac miat oh thu”.

Craoh Đắk Sôr lac sa dalam dom baoh craoh praong abih di huyện Krông Nô, nduac tapa 2 xã Đắk Sôr saong Nam Xuân. Angaok craoh ini hu 3 danak dak thuỷ lợi lac 3 binek piah khik ia pruh ka phun pala dalam bilan thu. Min tal tukvak ini, 3 binek nan saong baoh craoh Đắk Sôr ia thu abih, 1.300 - 1.500ha phun công nghiệp di mikva urang ngak nong rah tui craoh daok dang anak bruk pandiak bhang. Rilo bein cà phê di rahra dalam bhum kayua kurang ia daok matai dhar, rilo urang nong mbang ndih oh bingi kayua duh hatai ka pandiak bhang.

Ong Nguyễn Văn Đại, Yam ndok dhar huyện Krông Nô, Cty Khai thác công trình thuỷ lợi Đắk Nông brei thau, thun ini thu lagu khang jang rilo thun. Mbaok ia di abih 33 danak dak thuỷ lợi pak ini jeng trun biak biar duk haong yaok thun, saong daok hu dom labik thu abih. Cty hu pambuak bruk haong dom gah chức năng, ngak bruk haong dom huyện jaik taphia yau Đắk Mil, Đắk Song, hu ia daok tani tanat, peih bruk ba ia mai huyện brei rahra daong ka phun pala. Min tapa bilan 5, meyah bruk pandiak thu daok rah tabiak khang, yaok rabau ha phun pala meda dang anak bruk thu lagu:“Tui bruk ba ia 2 mbang mai mangaok craoh Đắk Sôr saong 1 mbang lac meng 12-15 harei, dom ia ba meng huyện Đắk Mil saong Đắk Song mai huyện Krông Nô lac meng 300.000 - 500.000m3 sa mbang. Tui kuhria meda ngak hu tal abih mbang ka 4. Daok mbang 5 laik tame bilan 5, meyah pandiak bhang rah tabiak khang jang, oh ginup ia piah pruh”.

Ong Doãn Gia Lộc, akaok jabat ngak nong saong patagok palei pala huyện Krông Nô, tỉnh Đắk Nông brei thau, bilan đông xuân ini huyện hu 4.600ha phun yaok thun, gam haong nan, huyện hu jaik 30.000ha phun công nghiệp. Bilan pandiak thun ini mboh lac khang jang, nan ye huyện hu ba tabiak rilo jalan ngak piah tagok prein pacang pandiak yau ye salih janih phun pala, pala ngak pataom gauk, tacei pato bhap bini pandar ia patak pataom, kuac raok kraong ribaong. Min bahrau jhung bilan 2 bo mboh hu bruk kurang ia pruh, ye bruk bilan pandiak dui atah tal bilan 5, bilan 6, dom taneh phun pala di dom xã yau Đắk Sôr, Nam Nung, Nam Xuân, Tân Thành meda dang anak bruk thu lagu. Huyện Krông Nô daok ngak bruk haong dom gah chức năng piah patagok ia pruh ka dom bhum mbuan njauk pandiak bhang.

Ong Doãn Gia Lộc brei thau, huyện hu ngak bruk haong dom cty thuỷ điện angaok kraong Krông Nô yau ye: Thuỷ điện Buôn Kuốp, Thuỷ điện Chư Pông Krông piah ba ia mai dalam bilan pandiak thu ini, plaih bruk rahra caong hu min  thuỷ điện oh tathuak ia, bo tuk thuỷ điện tathuak ia ye rahra oh thau khik  piah pandar.“Kol dahlak mboh dahlau lac meng ini tal puac vụ bruk pandar ia pruh daok tagok glaong, min ia daok takik nao. Nan ye huyện hu pambuak bruk haong dom gah yau Cty thuỷ điện Buôn Kuốp, Cty khai thác công trình thuỷ lợi Đắk Nông, saong dom danak dak danao thuỷ điện dalam huyện, kuhri kuhria bruk ba ia pruh ka gah ala kraong Krông Nô, dalam nan, hu 7 xã tapen kraong lac gaok kan kandah tapak, brei ba ia pruh ka nyu lagaih”./.